ESDRAS 10 - Quichua Imbabura 2016

Shuj llactamanda huarmicunata, llujchishpa cachashcamanda

1Esdras, Taita Diospaj huasi ñaupajpi cungurishpa huacashpa, juchacunata villashpa Diosta mañajujpimi, ashtaca Israelcuna Esdraspajman quimirimurca. Jaricuna, huarmicuna, huahuacuna quimirimushpami, tucui gentecuna ninanda llaquirishpa huacanajurca.

2Shina huacanajujpimi, Elam shuti runapaj mirai Jehiel shuti runapaj churi Secanías shuti runaca, Esdrastaca cashna nirca: “Ñucanchimi, Taita Diostaca na cazushpa shuj, llacta huarmicunahuan cazarashpa juchata rurashcanchi. Chashna cashpapash Israelcunapaca, ali tucuna tiyanrami.

3Cunanga, tucui huarmicunatapash, paicunahuan charishca huahuacunatapash llujchishpa cachangapa, ñucanchi Taita Dioshuan ari nishunchi. Chaitaca, ñuca jatun Diospash, ñucanchi Taita Diosta manllajcunapash yarichishcashnami rurangapa munapanchi. Ñucanchica mandashcapi nijujshnami rurangapa munapanchi.

4Shina cashcamandami, jatarishpa caitaca ucha ruranapacha capangui. Ñucanchipash canhuan cashcamandami shinlli tucushpa, chaitaca ucha rurana capangui” nircami.

5Shina nijpimi Esdrasca, shayarishpa sacerdotecunata, levitacunata mandajcunatapash, tucuilla Israelcunatapash, Dios mandashcapi nishcashna paicuna pactachinajuchun juramentuchijpi, tucuilla juramentunajurca.

6Chai jipami Esdrasca, Taita Diospaj huasi ñaupajmanda jatarishpa, Eliasib runapaj churi Johanán shuti sacerdotepaj ucuman yaicurca. Chaipica, prezu apai tucushcamanda tigramushcacuna juchata rurashcamandami, na micushpa, yacutapash na ufiashpa, ninanda llaquirishca tiyajurca.

7Chaimandami, prezu apai tucushcamanda tigramushcacuna, Jerusalenman tandanajuchun, Judá llactapipash, Jerusalenbipash villarca.

8Shinallata, Israelcunata mandajcuna, mandaj rucucuna, Jerusalenman tandanajuchun mandashcata na cazushpa, quimsa punllacaman na ricurijpica, paipaj tucuilla alpacunatami quichuna canga. Shinallata, prezu apai tucushcacunapaj tandanajuimandapash llujchishpa cachai tucunami nishpa villachunmi mandarca.

9Chaimandami, nara quimsa punlla chayajpillata Judá ayllu, Benjamín ayllu runacunaca, iscun quillapaj ishcai chunga punllapi, Jerusalenman tandanajumurca. Tucui gentecunami, Taita Diospaj huasi canlla plazapica, chai huarmicunata cachashcamandapash, tamiajpi chirimandapash chujchushpa tiyanajurca.

10Shina tiyanajujpimi sacerdote Esdrasca, shayarishpa cashna nijurca:

“Cangunaca, shuj llactamanda huarmicunahuan cazarashpami, juchata rurashcanguichi. Shinami Israelcunapaj jahuapica, ashtahuan juchata mirachishcanguichi.

11Cunanga, cangunapaj ñaupa taitacunata Mandaj Taita Diostami jatunyachina canguichi. Chai jipaca, cai llactapi causanajuj gentecunamanda, shuj llactamanda huarmicunamanda anchurishpa, Diospaj munaita ruraichi” nijurcami.

12Shina nijujpimi, tucuilla tandanajushcacunaca shinllita caparishpa cashna ninajurca:

“Can nishcashnami rurapashun.

13Ashtahuangarin gentecunaca ashtacamari, punllacunapash tamia punllacunamari. Chaimandami ñambilla tiyanajuitaca, na ushanchi. Ashtacacunami cai juchata rurashcanchi. Chaimandami chai ruranataca, shuj punllapi, ishcai punllapica na tucuchi ushana capanchi.

14Tucuilla caipi tandanajungapa randica, ñucanchita mandajcunalla caipi saquirishpachari ali capanman. Ñucanchi pueblocunapi causajcuna, shuj llactamanda huarmicunahuan cazarashcacunapash, ñucanchi pueblocunapi mandaj rucucunapash, chai huarmicunapaj juezcunapash, canguna cayashca punllapi shamushpachari ali capanman. Ñucanchi na alita rurashcamanda, Taita Dios ñucanchihuan ninanda fiñarishcata yalichingacamanmi, chashna rurashpa ali capanman” ninajurcami.

15Shina nishcataca, Asael shuti runapaj churi Jonatán runahuan, Ticva shuti runapaj churi Jahazías shuti runahuanllami, na alichu ninajurca. Paicunataca, Mesulam shuti, Sabetai shuti levitacunapashmi yanapanajurca.

16Prezu apai tucushcacunapaj miraicunaca, imashna mandashcatami pactachinajurca. Chaimandami sacerdote Esdraspash, ñaupa taitacunapaj huasi ucupuracunata mandajcunapash, paicunapaj ñaupa taitacunapaj huasi ucupuracuna imashna cashcashna agllai tucurca. Paicunaca, shutipi cayajpimi, chunga quilla callari punllapica, chai huarmicunata llujchishpa cachashcamanda parlangapa tiyarinajurca.

17Shuj llactamanda huarmicunahuan cazarashca chai tucui Israelcunata imashna cashcata callarishpa ricushpaca, cati huata callari quillapaj punda punllapimi tucuchirca.

18Shuj llactamanda huarmicunahuan cazarashca sacerdotecunapaj churicunaca, caicunami:

Josadac shuti runapaj churi Jesúa shuti runapaj churicunapash, paipaj huauqui Maasías, Eliezer, Jarib, Gedalías shuti sacerdotecunapashmi carca.

19Paicunaca, paicunapaj huarmicunata llujchishpa cachashun nishpami, maquita cunajurca. Paicuna chashna na alita rurashca juchamandaca, shuj jari llamatami Diosman cunajurca.

20Imer shuti runapaj miraimandaca: Hanani shuti, Zebadías shuti sacerdotecunami, chashna cazarashca carca.

21Harim shuti runapaj miraimandaca: Maasías, Elías, Semaías, Jehiel, Uzías shuti sacerdotecunami carca.

22Pasur shuti runapaj miraimandaca: Elioenai, Maasías, Ismael, Natanael, Jozabad, Elasa shuti sacerdotecunami carca.

23Levitacunamandaca: Jozabad, Simei, Kelita nishpa rijsishca Kelaía, Petaías, Judá, Eliezer shuti levitacunapashmi carca.

24Diospaj huasipi candajcunamandaca: Eliasib shuti runapashmi carca. Diospaj huasi pungupi ricujcunamandaca: Salum, Telem, Uri shuti runacunami carca.

25Shinallata, Israelpuramandaca, caicunami: Paros shuti runapaj miraimandaca: Ramía, Jezías, Malquías, Mijamín, Eleazar, Malquías, Benaía shuti runacunami carca.

26Elam shuti runapaj miraimandaca: Matanías, Zacarías, Jehiel, Abdi, Jeremot, Elías shuti runacunami carca.

27Zatu shuti runapaj miraimandaca: Elioenai, Eliasib, Matanías, Jeremot, Zabad, Aziza shuti runacunami carca.

28Bebai shuti runapaj miraimandaca: Johanán, Hananías, Zabai, Atlai shuti runacunami carca.

29Bani shuti runapaj miraimandaca: Mesulam, Maluc, Adaía, Jasub, Seal, Ramot shuti runacunami carca.

30Pahat-moab shuti runapaj miraimandaca: Adna, Quelal, Benaía, Maasías, Matanías, Bezaleel, Binúi, Manasés shuti runacunami carca.

31Harim shuti runapaj miraimandaca: Eliezer, Isías, Malquías, Semaías, Simeón,

32Benjamín, Maluc, Semarías shuti runacunami carca.

33Hasum shuti runapaj miraimandaca: Matenai, Matata, Zabad, Elifelet, Jeremai, Manasés, Simei shuti runacunami carca.

34Bani shuti runapaj miraimandaca: Madai, Amram, Uel,

35Benaía, Bedías, Quelúhi,

36Vanías, Meremot, Eliasib,

37Matanías, Matenai, Jaasai,

38Bani, Binúi, Simei,

39Selemías, Natán, Adaía,

40Macnadebai, Sasai, Sarai,

41Azareel, Selemías, Semarías,

42Salum, Amarías, José shuti runacunami carca.

43Nebo shuti runapaj miraimandaca: Jeiel, Matatías, Zabad, Zebina, Jadau, Joel, Benaía shuti runacunami carca.

44Tucui cai runacunami, shuj llactamanda huarmicunahuan cazarashca carca. Cai runacunapaj huaquin huarmicunaca, ñami huahuacunata charirca.