HECHOS 28 - Quichua Imbabura 2016

Mama cucha chaupipi tiyajuj Malta shuti llactapimi, Pabloca purijushca

1Tucuilla ña quishpirishca cashpami, chai mama cucha chaupipi tiyaj Malta shuti llactapi cashcata yacharcanchi.

2Chai llactapi causajcunaca ñucanchitaca, ali shunguhuanmi chasquirca. Tamiapi chiri chiri cajpimi, ninata japichishpa, ñucanchitaca cunuchun cayarca.

3Chaipimi Pabloca, chaquishca yamdacunata tandachishpa, ninapi churajurca. Shina churajujpimi, nina rupajunmandaca, shuj huañuchijlla culebra ñapash llujshimushpa, Pablopaj maquipi pillurishpa canirca.

4Chaipi causajcunaca, Pablopaj maquipi culebra huarcuriyajujta ricushpami, cashna ninajurca: “Cai runaca huañuchij runapachami yarin. Yacupi na huañushpa llujshimujpipash, alitalla ruraj diosca, nallata causachun saquijunllu” ninajurcami.

5Ashtahuangarin Pabloca, chafsishpa, chai culebrataca ninapi shitashpaca, na imapash tucurcachu.

6“Ñami punguinga, na cashpaca ñami huañunga” nishpami, paicunaca ricunajurca. Ashtahuangarin, unaita shuyanajushpapash na imapash tucujpimi: “Cai runaca diosmari cashca” ninajurca.

7Chai alpacunaca, mandaj Publio shuti runapajmi cashca carca. Paimi, ñucanchitaca llaquishpa, quimsa punllacaman mingachirca.

8Chai Publio shuti runapaj taitaca, tabardillo ungüihuan, yahuarta ishpai ungüihuambash huañujujmi sirijurca. Chai huañujujta Pablo ricungapa rishpami, maquita umapi churashpa Diosta mañashpa alichirca.

9Shinamandami, chai llactapi shuj huañunajuj gentecunapash shamushpa, ali tucunajurca.

10Chai gentecunapash, ñucanchita ninanda alicachishpami, imatapash ricuriashpa caranajurca. Barcopi ña rigrinajujpica, ñucanchi imata munashcatapash carashpami cacharca.

Roma pueblomanmi Pabloca chayashca

11Quimsa quillacuna yalishca jipami, Alejandría shuti pueblomanda shamushpa, huairahuan tamia quillacuna yalingacaman chaipi shayajuj barcota japircanchi. Chai barcoca, Cástor shuti, Pólux shuticunata ñaupajpi churashcami carca.

12Siracusa shuti puebloman chayashpaca, quimsa punllacamanmi chaipi saquirircanchi.

13Chaimanda llujshishpaca, chai llacta manñatalla muyushpa rishpami, Regio shuti puebloman chayarcanchi. Chai cayandica, uraimanda vichaiman huairamushpami, barcota apajpi ishcai punllahuanga, Puteoli shuti puebloman chayarcanchi.

14Chai pueblopi causaj crijcuna tuparishpami: “Canchis punllacaman caipi saquiripaichi” nishpa mañajpi, chaipi carcanchi. Chai jipaca, Roma puebloman rircanchillami.

15Roma pueblopi causanajuj crijcunaca, ñucanchi shamunajun nijta uyashpami, Foro de Apio shuti pushtupipash, Quimsa Taberna shuti pushtupipash, ñucanchitaca tuparimurca. Paicunata Pablo ricushpaca, “Taita Diosta pashi” nishpami, ashtahuan shinlli tucurca.

16Roma puebloman chayashpaca, patsaj macanajuj runacunata mandajca, chai prezucunataca chai llactapi macanajuj runacunata mandajmanmi curca. Ashtahuangarin Pablotaca, shuj huasipimi, shuj macanajuj runa ricuriyajpi causachun saquirca.

Roma pueblopimi Pabloca villajushca

17Quimsa punlla jipami, cashna tucurca: Judiocunata mandajcunata cayachun cachajpi tandanajujpimi Pabloca, cashna nijurca:

“Caiman shamushca huauquicuna. Ñucanchi llactapi causajcunataca, na fiñachircanichu. Ñucanchipaj ñaupa taitacuna, imata rurachun saquishcatapash na alicachishpaca, na imatapash nijurcanichu. Ashtahuangarin Jerusalenbi causajcunaca, Roma llactamanda mandajcunamanmi, ñucataca prezu japichishpa cachamuhuarca.

18Chai mandajcunami, imashna cashcata ricungapa tapuchihuarca. Shina tapuchishpaca, na alita rurashcamanda huañuchi tucunapacha cashcataca na tarishpami, ‘cacharishunlla’ ninajurca.

19Ashtahuangarin judiocunaca, ñucata ninanda fiñajujpimi: ‘Ñucataca Cesarmi tapuchihuanga’ nircani. Shina nishpaca, na ñuca llactapi causajcunata, imatapash juchachishpa villajurcanichu.

20Israelcuna cushijushpa shuyanajuchunmi, cashna cadenahuan huatai tucushca cani. Chaimandami chimbapura parlangapa, cangunataca cayachiparcani” nijurcami.

21Pablo chashna nijpimi, paicunaca cashna ninajurca:

“Ñucanchica, canda imatapash nishpa, Judea llactamanda cachamushca quilca fangacunataca, na japishcachu canchi. Chai llactamandaca, ‘na alitami rurajun’ nishpa, canda na alicachishpa villangapaca, shujllapash na shamushcachu.

22Ashtahuangarin, can imata yarishpa villajtapash uyangapami munanchiman. Can crishpa catijushcataca, ‘maipi cashpapash ninandami na alicachin’ nijtami uyashca canchi” ninajurcami.

23Chai jipaca, shuj punlla tandanajungapa saquirishca cashpami, Pablo mingarishpa causajuj huasiman ashtacacuna tandanajurca. Paicuna Jesusta crichunmi, Moisés mandashca shimipi imata nijujtapash, profetacuna quilcashca shimicunatapash quilca catishpa, Pabloca villajurca. Taita Dios mandajuj llactapi causagrinamandaca, tutamanda callarishpa, chishangacamanmi villajurca.

24Huaquingunaca, Pablo villajujtami alicachinajurca, shujcunaca na crinajurcachu.

25Paicunapurapi na shujlla yuyai cashpa, ña llujshi callarijpimi Pabloca, cai shimicunata cashna nijurca:

“Shina cajpimi, ñucanchipaj ñaupa taitacunaman villajuchun, Jucha illaj Diospaj Espirituca, profeta Isaiasman yarichishca. Paica cashna nishpami villashca:

26‘Cai gentecunapajman rishpa, cashna nigri:

Uyaitaca uyashpapash, yuyaipi na japishpami causanguichi.

Ricuitaca ricushpapash, napacha ricushcashnami causanguichi.

27Cai gentecunapaj shunguca, ninanda shinlliyashcami.

Rinrihuan uyashpapash, na ali uyanajunllu.

Ama ricungapa, ñavitapash vichashcami causanajun.

Rinripash ama uyachun, shungupash yuyaita ama japichun,

ñucapajmambash ama tigrachun, ñucapash ama paicunata alichijuchunmi, chashna tucushca’ nircami.

28Caita yachachunmi, cashna nini: Taita Diosca, na Israelcunata quishpichingapami, villachun cachamuhuashca. Paicunarami, aliguta uyanajunga” nijurcami.

29Pablo chashna nijpimi, judiocunaca, paicunapura ninanda fiñanajushpa rimarishpa rinajurca.

30Pabloca, ishcai huatatami, culquipaj mañashca shuj huasipi causajurca. Chaipimi, paipajman shamujcunataca, tucuicunata chasquijurca.

31Chaipillatami, Taita Dios mandajuj llactamandapash, Apunchi Jesucristomandapash, pipash na jarcajpi, na manllashpa yachachijurca.