1Jehú shuti runaca, canchis huatata Israel llactata mandajujpimi, Joás shuti runaca mandai callarirca. Paica, chuscu chunga huatatami, Jerusalenbi mandajurca. Paipaj mamaca, Beerseba pueblomanda Sibia shutimi carca.
2Joás runaca, sacerdote Joiada yachachishpa causajui punllacunapimi, Mandaj Diospaj ñaupajpica, alitalla rurashpa causajurca.
3Chashna alita rurashpapash, lomacunapi altarcunataca na anchuchircachu. Chai altarcunapimi, animalcunata cushpa huañuchishpa, inciensocunata cushnichishpa gentecunaca catinajurca.
4Joás runaca, sacerdotecunataca cashnami nirca:
“Diospajlla cachun shicanyachishca culquita Mandaj Diospaj huasiman apamun cashcashnallata apamuchun. Shinallata, imamandapash cacharichina culquitapash, paicunapaj munai cuna culquitapash Mandaj Diospaj huasiman apamuchun.
5Chai culquitaca sacerdotecunami, tucui ayllucunapaj maquimanda japina canguichi. Chaihuanga, Diospaj huasipi imatalla alichinata ricushpami alichina canguichi” nircami.
6Jatun mandaj Joás runa, ishcai chunga quimsa huatata mandangacamambash sacerdotecunaca, Diospaj huasitaca na alichishpa tucuchircachu.
7Chaimandami jatun mandaj Joás runaca, sacerdotecunata mandaj Joiada runatapash, caishuj sacerdotecunatapash cayashpa, cashna nirca:
“¿Imashpata Diospaj huasi pirca chijtarishcacunataca nara alichinguichi? Cunanga, cangunapaj ayllucuna apamushca culquitaca, na cangunaca ashtahuan japinachu canguichi. Ashtahuangarin chai culquitaca, Diospaj huasi pirca chijtarishcacunata alichinajuchunmi cuna canguichi” nircami.
8Shina nijpimi sacerdotecunaca, gentecuna apamushca culquitapash na japishpa, Diospaj huasi pirca chijtarishcatapash shujcuna rurachun saquirca.
9Shina cashpapash, sacerdotecunata mandaj Joiada runaca, shuj cajonda utujushpami, Mandaj Diospaj huasi altar quimiriapi churarca. Chaimandami, Diospaj huasi pungupi ricuj sacerdotecunaca, Mandaj Diospaj huasiman apamushca culquitaca, chai cajonbi churanajurca.
10Chai cajonbi ña ashtaca culqui tiyajta ricushpami, jatun mandajpaj quilcaj runapash, sacerdotecunata mandaj runapash, Mandaj Diospaj huasipi tiyashca culquita yupashpa alichinajurca.
11Chai culquitaca, Mandaj Diospaj huasipi tucuita ricujcunami cunajurca. Paicunaca, caspita imatapash rurajcunaman, Mandaj Diospaj huasita alichijcunaman cunajurca.
12Shinallatami, pircata rurajcunamambash, rumita faquijcunamambash cunajurca. Chai culquihuanllatami, caspicunatapash, faquishca rumicunatapash, Mandaj Diospaj huasi pirca chijtarishcacunata alichingapaca randinajurca.
13Ashtahuangarin, Mandaj Diospaj huasiman apamushca culquihuanga, culqui tastacunata, pavizata anchuchinacunata, jatun tastacunata, trompetacunataca na rurachircachu. Mandaj Diospaj huasipi ima tiyanacunatapash, curita, culquitaca na imatallapash rurachircachu.
14Ashtahuangarin imatalla rurajcunaman chai culquita cujpimi, Mandaj Diospaj huasitaca alichinajurca.
15Pircata alichijcunaman cuna culquitaca, imatapash na tapushpami cunajurca. Paicunaca, imata cashpapash ali pactachij cajpimi, chashna cunajurca.
16Juchata rurashcamanda, na alita rurashcamanda cushca culquitapash, Mandaj Diospaj huasimanga na apanajurcachu. Chai culquitaca, sacerdotecunami japina carca.
17Chai punllacunallatami, Siria llactata jatun mandaj Hazael runaca, Gat shuti pueblota mishashpa quichurca. Chai jipami, Jerusalenbi causajcunahuan macanajungapa, vichai shamui callarirca.
18Chaimandami, Judá llactata jatun mandaj Joás runaca, Judá llactata jatun mandaj Josafat, Joram, Ocozías shuti paipaj ñaupa taitacuna, paillatapash alichishca tucui culquita japirca. Shinallata, Mandaj Diospaj huasi ucumandapash, jatun mandajpaj huasi ucumandapash tucuilla alichishca curitapash japirca. Chaicunatami, Siria llactata jatun mandaj Hazael runaman cuchun cacharca. Chaita cujpimi Hazael runaca, Jerusalenmandaca rirca.
19Joás runa imatalla ashtahuan rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata quilcashca libropi tiyajun?
20Joás runataca, paipajta rurajcunallatami, pacalla tandanajushpa parlarishpa huañuchirca. Paitaca, Sila shuti puebloman rijujpimi, Milo shuti pushtu huasipi huañuchirca.
21Paitaca, paipajta ruraj Simeat shuti runapaj churi Josacar runa, Somer runapaj churi Jozabad runacunami huañuchirca. Joás runataca, paipaj ñaupa taitacunata pambashca Davidpaj pueblopillatami pambarca. Paipaj randica, paipaj churi Amasías runami mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
