JUECES 19 - Quichua Imbabura 2016

Levita runamandapash, paipaj caishuj huarmimandapash

1Chai punllacunapica, Israel llactapica, jatun mandaj na tiyajpimi, shuj levita runaca, shuj llactamanda runashna, Efraín urcu carupipacha causajurca. Chai runami, Judá llacta Belén pueblomanda caishuj huarmihuan pacta causarca.

2Chai huarmica fiñashpami, levita runataca saquishpa, Judá llactapi tiyaj Belén pueblopi paipaj taitapaj huasiman tigrarca. Chaipica, chuscu quillatami causajurca.

3Levita runaca, juyaihuan rimashpa, cutin tigrachimungapa munashpami, chai huarmita catishpa rirca. Paipajta rurashpa causaj shuj runatapash, ishcai burrucunatapash apashpa chayajpimi, chai huarmica, paipaj taitapaj huasi ucuman pusharca.

4Chaita ricushpami, chai huarmipaj taitaca cushijushpa tuparingapa llujshirca. Chai levita runapaj huarmipaj taita, paipaj huasipi mingachijpimi, micushpa, ufiashpa quimsa punllacaman chaipi saquirirca.

5Ña chuscu punlla tucujpi tutamandata jatarishpami, levita runaca ringapa tucurca. Shina cajpimi, chai huarmipaj taitaca, paipaj mashataca cashnami nirca: “Ama yarjachingapa imagutallapash micuyari. Chai jipaca ringuillami” nircami.

6Shina nijpimi micungapa, ufiangapa ishcandi tiyarirca. Chai jipami, chai cuitsapaj taitaca: “Cunan tutagulla caipi pacarishpa, cushijushpa tiyanajupashun” nircami.

7Shina nijpipash, chai runaca ucha ringapa munajpimi, paipaj huarmipaj taitaca, caipi pacaripaipacha nijujpi, chai tutaca chaipi pacarirca.

8Ña picha punlla tucujpi, ña ringapa tutamandata jatarijpimi, chai huarmipaj taitaca: “Cunanga micushpa, chishangacaman caipi tiyanajupashun” nijpimi, ishcandi micunajurca.

9Chai jipami, chai levita runaca, paipaj caishuj huarmindi, paipajta ruraj runandi ringapa callarirca.

Chaimandami, chai huarmipaj taitaca, cashna nirca: “Punllapash tucurishpa ñami tutayagrijun. Cunan tutapash caipi pacarishpa, cushijushpa tiyanajupashun nipanimi. Caya tutamandata jatarishpa, ñanda japishpa cambaj huasiman ringuillami” nircami.

10Ashtahuangarin levita runaca, chaipi pacaringapa na munashpami, jatarishpa rirca. Paica, tiyarinata churashca ishcai burrucunandi, paipaj huarmindimi, Jebús shuti Jerusalén pueblo chimbapuraman chayagrirca.

11Chai Jebús shuti puebloman ña chayagrinajujpimi, ashtahuan chishajurca. Chaimandami paipajta ruraj runaca, paita mandajtaca cashna nirca: “Cunanga, jebuseo runacunapaj cai puebloman rishpa, cai tutaca chaipimi pacarishunlla” nircami.

12Shina nijpimi paita mandaj runaca, cashna nirca:

“Israelcunapaj shuj pueblocunamanga na rishunllu. Ashtahuangarin, Gabaa shuti puebloman chayangacaman rishunlla” nishpami, paipajta ruraj runataca cashnatapash nirca:

13“Cunan tutaca Gabaa shuti pueblopi, na cashpaca Ramá shuti pueblopi pacaringapa, chai pueblocunaman maijanman cashpapash, jaculla” nircami.

14Chaimanda rishpa Benjamín ayllupaj llacta, Gabaa shuti puebloman ña chayanajujpimi, indi huashajurca.

15Chai tutaca, Gabaa shuti pueblopi pacaringapami, chai puebloman yaicugrirca. Chai pueblopica pipash na mingachijpimi, paicunaca chai pueblo plazapilla tiyanajurca.

16Ña tutayajpimi, shuj rucu taitaguca pambamanda shamujurca. Chai taitaca Efraín urcumandami carca. Paica, Gabaa shuti pueblopica, shuj llactamanda runashnami causajurca. Ashtahuangarin chai pueblopi causajcunaca, Benjamín ayllupurami carca.

17Ñanda purij runa chai pueblo plazapi tiyajujtami, chai taitaguca ricurca.

Shina ricushpami: “¿Maimandata shamungui, maimanda rijungui?” nishpa tapurca.

18Shina tapujpimi chai levita runaca, cashna nirca: “Judá llactapi tiyaj Belén pueblomandami, Efraín shuti caru urcuman rinajunchi. Ñucaca, chai urcumandami cani. Ñucaca, Judá llactapi tiyaj Belén puebloman rishpami, cunanga Mandaj Diospaj huasiman tigrajuni. Shina cajpipash, caipica pipash na mingachingapa munanllu.

19Ñucanchica, burrucunapaj jihuatapash, ujshatapash charinchimi. Ñucapajpash, ñuca huarmipash, ñucapajta ruraj runapajpash, tandatapash, vinotapash charinchimi. Tucuitami charipanchi” nirca.

20Shina nijpimi chai rucu taitaguca, cashna nirca:

“Ali causaiguta charipaichi. Cangunamandaca tucuitami ñuca ricunata charini. Cai plazapica na pacarichun saquishachu” nirca.

21Shina nishpa, paipaj huasiman pushashpami, burrucunamambash micuchun cararca. Shinallata, paicunapash, chaquita maillashca jipami, micushpa, ufiashpa tiyanajurca.

22Shina cushijushpa tiyanajujpimi, chai pueblopi causanajuj na ali runacuna shamushpa, chai rucu runagupaj huasi muyundipi shayarinajurca.

Chai huasi punguta huactachishpami, chai huasiyuj rucugutaca, cashna nishpa rimanajurca: “Cambaj huasiman shamushca runata paihuan ñucanchi siriringapa llujchimui” ninajurcami.

23Shina nijpimi chai huasiyuj runaguca, paicunapajman llujshishpa cashna nirca: “Ñuca huauquicunalla, cai jatun na alitaca na ruranachu canguichi. Cai runaca, ñuca huasipi samangapallami shamurca, cai na alitaca napacha ruranachu canguichi.

24Ricuichi, chairalla viñai ñuca ushitapash, chai runapaj huarmitapashmi, cunanga canllaman llujchimusha. Paicunataca, imata cashpapash canguna munashcata ruranallami canguichi. Cai runahuanga, chai jatun na alitaca, napacha ruranachu canguichi” nircami.

25Ashtahuangarin chai runacunaca, na uyangapa munarcachu. Shinamandami chai levita runapaj huarmita canllaman llujchijpi, chai huarmitaca tucui tuta na alita ruranajurca. Ña pacarijujpimi, saquishpa rinajurca.

26Ña punllayajujpimi chai huarmica, paipaj cusa tiyajuj chai rucu runagupaj huasiman tigrarca. Chai huasi punguman chayamujushpa urmashpami, punllayangacaman chaipi sirijurca.

27Paipaj cusaca, tutamanda jatarishpa punguta pascashpami, ñanda japishpa ringapa llujshirca. Shina llujshishpaca, paipaj huarmitaca, pungupi quinraiman churashca caspi jahuapi, maquita churashca sirijujtami ricurca.

28Chaita ricushpami paica: “Jatari, jacu” nirca.

Ashtahuangarin chai huarmica na rimarcachu.

Chaimandami chai runaca alpamanda jatarichishpa, paipaj burrupi churashpa, huasiman apashpa rirca.

29Huasiman chayashpaca, shuj cuchillota japishpami, chai huañushca huarmitaca, chunga ishcaicaman mucu tullucunapi fitirca. Shina fitishpami, Israel llactapi causanajuj tucui chunga ishcai ayllucunapajman cacharca.

30Chaita ricushpami, tucuicuna cashna ninajurca:

“Israelcuna Egipto llactamanda llujshimushca punllamanda cunangaman, cashna na alitaca napacha rurashcachu. Chaitaca, uyaitallapash na uyashpami causashcanchi. Chashna rurashcamandaca, imata rurana cashpapash aligutapachami yarina canchi” ninajurcami.