AMÓS 7 - Quichua Imbabura 2016

Quimsa llaquihuan tucuchinata, muscuipishna ricushcamanda

1Mandaj Jatun Diosca, cashnatami ricuchihuarca: Jatun mandaj ña tucuilla cozechashca jipa, jipalla tarpushca grano ña viñajujpimi, Paica, langosta jurucunata cachamurca.

2Chai jurucuna tucuilla llactapi jihuacunata micushpa tucuchijpimi, cashna nircani:

“Mandaj Jatun Dioslla, cunanga paicuna na alita rurashcataca cungapayari. Jacobpaj huaquinlla miraicunataca, ¿pita yanapai ushangayari?” nircanimi.

3Shina nijpimi, Mandaj Diosca ninanda llaquishpa:

“Shina cashpaca na llaquichishachu” nirca.

4Mandaj Jatun Diosca, cashnatapashmi ricuchihuarca: Mandaj Jatun Diosca, ninahuan llaquichingapami cachamurca. Chai ninami, manllanayai ucu ucu jatun utujutapash, llactatapash chaupi canatashna rupachijurca.

5Chaimandami, cashna nircani:

“Mandaj Jatun Dioslla, cashna llaquichijushcataca jarcaripayari. Jacobpaj huaquinlla miraicunataca, ¿pita yanapai ushangayari?” nircanimi.

6Shina nijpimi Mandaj Diosca, ninanda llaquirca. Shina llaquishpami, Mandaj Jatun Diosca:

“Shina cashpaca cai llaquihuambash na llaquichishachu” nirca.

7Cashnatapashmi ricuchihuarca: Jatun Diosca, ali pircashca jahuapimi shayarirca. Paica, huasita ruraj runapaj plomadata chaririyajmi shayarirca.

8Mandaj Diosca, cashna nihuarca:

“Amós, ¿imatata ricujungui?” nijpimi:

“Pircata ruraj runapaj plomadatami ricujuni” nircani.

Shina nijpimi Mandaj Diosca, cashna nihuarca:

“Ricui, huasita ruraj runapaj cai plomadahuanmi, Ñuca agllashca Israelcunata ali cajta, na ali cajta ricugrini. Paicunata llaquichinataca na ashtahuan jarcarishachu.

9Isaac runapaj mirai Israelcunapaj, lomacunapi tiyaj altarcunaca tucuchi tucungami. Paicunapaj dioscunapaj huasicunapashmi, tucuchi tucunga. Jeroboam runapaj huasi ucupurataca, espadahuanmi huañuchishpa tucuchisha” nihuarcami.

Amós runamandapash, Amasías runamandapash

10Bet-el shuti pueblopi sacerdote Amasías runaca, Israelcunata jatun mandaj Jeroboam shuti runaman, cashna nishpa villachunmi cacharca: “Amós runami canda fiñashpa, Israelcunaman villashpa purijun. Cai llactapi cashna villashpa purijuchunga, na ashtahuan saquinachu canchi.

11Chai Amós runaca, cashna nishpami villajun: ‘Jeroboam runaca, espadahuanmi huañuchi tucunga. Israelcunapash, paicunapaj llactamandaca prezumi apai tucunga’ nishpami villajun” nichunmi cacharca.

12Shina villashca jipami Amasías runaca, Amós runataca cashna nirca:

“Profeta runa, caimanda llujshishpa, Judá llactamanllata rilla. Chaipi cambaj micunata micugrilla. Dios villashcataca, chaipillata villagrilla.

13Bet-el shuti pueblopica, ama ashtahuan villaichu. Caipica, jatun mandaj, Diosta mañana pueblomi. Cai puebloca, llactata mandana jatun pueblomi” nircami.

14Shina rimajpimi Amós runaca, Amasías runataca cashna nirca:

“Ñucaca, na profetachu cani. Profetapaj churipash na canichu. Ashtahuangarin huagracunata michishpa, sacha higocunata pallashpa purij runami cani.

15Mandaj Diosmi ñucataca, huagrata michijujpi cayashpa: ‘Ñuca ima nishcata, Ñuca agllashca Israelcunaman villagri’ nihuarca.

16Cunanga, Mandaj Dios ima nishcata uyai. Canga, ñucataca cashnami nihuangui: ‘Israelcunata llaquichinataca ama villaichu. Isaac runapaj miraicuna llaquichi tucunataca ama villaichu’ nihuanguimi.

17Shinamandami Mandaj Diosca, cashna nirca:

‘Cambaj huarmica, cai pueblopimi, culquimanda huainayashpa causanga.

Cambaj churicunapash, ushicunapash espadahuanmi huañuchi tucunajunga.

Cambaj alpacunatapash, pipaj urmajta ricushpami chaupirinajunga.

Canga, juchahuan mapayashca llactapimi huañungui.

Israelcunapash, paicunapaj llactamandaca carumanmi prezu apai tucunga’ ninmi” nircami.