2 CRÓNICAS 29 - Quichua Imbabura 2016

Ezequías mandajushcamanda(2 Rey. 18:1-3)

1Ezequiasca, ishcai chunga picha huatata charishpa mandai callarishpaca, ishcai chunga iscun huatatami, Jerusalenbi mandajurca. Paipaj mamaca, Zacariaspaj ushi Abías shutimi carca.

2Ezequías runaca, paipaj ñaupa taita David alita rurashcashnami, Mandaj Diospaj ñaupajpica alitalla rurashpa causarca.

Diosta mañachun, Diospaj huasita Ezequías alichishcamanda

3Ezequiasca, mandai callarijui huata callari quillapimi, Mandaj Diospaj huasi pungucunata pascashpa cutin alichirca.

4Chai jipami sacerdotecunata, levitacunata, indi llujshimujman tiyajuj plazaman cayashpa tandachirca.

5Chaipimi cashna nijurca: “¡Uyaichi, Levitacuna! Diospajlla tucushpami, cangunapaj ñaupa taitacunata Mandaj Diospaj huasitaca, alichina canguichi. Diospaj huasi ucumandaca, tucui ima mapa tiyashcatami llujchishpa shitana canguichi.

6Ñucanchi ñaupa taitacunaca, Mandaj Diosta na cazushpami, na alita ruranajurca. Mandaj Diosta saquishpami, paipaj jatun carpamandaca, ñavita shujman churashpa huashaman tigranajurca.

7Diospaj huasiman yaicuna pungucunatapash vichashpami, lamparacunapi michatapash huañuchirca. Inciensotapash na cushnichishpami, Diospajlla huasipi, Israelcunapaj Taita Diosman animalcunata cushpa huañuchinatapash saquinajurca.

8Chaimandami Mandaj Diosca ninanda fiñarishpa, Judá llactaman, Jerusalén puebloman ninan llaquicunata cachamurca. Chai llaquicuna japijpimi, ninanda millanayachi tucushpa, asishpa ricui tucushpa causanajun. Chaitaca, cangunapaj ricunajunguichimi.

9Ñucanchi taitacunaca espadahuanmi huañuchi tucurca. Ñucanchi churicunapash, ushicunapash, ñucanchi huarmicunapash, prezumi apai tucunajurca.

10Israelcunata Mandaj Taita Dios ninanda fiñarishcamandami, Paihuan ali tucungapa imashna ari nirinatapash aliguta yarijurcani.

11Ñuca huahuacunalla, Manda Diospajta ruranataca na quillanayachinachu canguichi. Mandaj Diosca, Paipajta rurashpa, inciensota cushnichishpa causachunmi cangunataca agllarca” nijurcami.

12Shina nijpimi levitacunaca, pai nishcata rurai callarirca. Paicunaca: Coat runapaj miraimandaca, Amasai runapaj churi Mahat runapash, Azarías runapaj churi Joel runapashmi carca. Merari runapaj miraimandaca, Abdi shuti runapaj churi Cis shuti runapash, Jehalelel shuti runapaj churi Azarías runapashmi carca. Gersón runapaj miraimandaca, Zima shuti runapaj churi Joa shuti runapash, Joa shuti runapaj churi Edén shuti runapashmi carca.

13Elizafán shuti runapaj miraimandaca, Simri shuti, Jeiel shuti runacunapashmi carca. Asaf shuti runapaj miraimandaca, Zacarías, Matanías shuti runacunapashmi carca.

14Hemán shuti runapaj miraimandaca, Jehiel shuti, Simei shuti runacunapashmi carca. Jedutún shuti runapaj miraimandaca, Semaías shuti, Uziel shuti runacunapashmi carca.

15Paicunami, paicunapaj huauqui levitacunata tandachishpa Diospajlla tucunajurca. Chai jipaca, jatun mandaj mandashcashna, Mandaj Diospaj Shimipi nijushcashnami, Mandaj Diospaj huasimanda tucui mapacunata llujchishpa shitangapa yaicunajurca.

16Chaipimi sacerdotecunaca, Mandaj Diospaj huasimanda tucui mapacunata llujchingapa yaicushpa, Mandaj Diospaj huasimandaca tucui mapacunata llujchishpa canllaman shitanajurca. Chaimandaca levitacunami, Cedrón shuti huaicupi shitangapa apanajurca.

17Huata callarijui quilla punllapimi, Diospajlla tucungapa alichirinajurca. Chai quillapi, pusaj punlla chayajpimi, Mandaj Diospaj huasi yaicuna punguman chayamurca. Mandaj Diospaj huasitaca, pusaj punlla chayajpimi, Diospajlla cachun Paipaj maquipi churanajurca. Chai quillapillata chunga sucta punlla chayajpimi, tucuita tucuchirca.

18Chai jipami, jatun mandaj Ezequiaspajman shamushpa, cashna ninajurca: “Mandaj Diospaj huasimandaca, ñami mapataca tucuilla shitarcanchi. Animalta cushpa tucuillata rupachina altartapash, chaipi imalla tiyanatapash, Diospajlla tandata churana mezatapash, chaipi imalla tiyanatapash, tucuitami mapa illajta saquircanchi.

19Shinallata, jatun mandaj Acaz shuti runa na cazushpa, chai ucumanda llujchishpa shitashcacunapash, ñami Diospajlla cachun alichircanchi. Chaicunaca Diospaj altar ñaupajpimi cutin tiyanajun” ninajurcami.

20Jatun mandaj Ezequías runaca, tutamandata jatarishpami, pueblopi causaj gentecunata, cati mandajcunata tandachishpa, Mandaj Diospaj huasiman vichai rirca.

21Chaipimi, jatun mandajpaj juchamandapash, Diospaj huasimandapash, Judá ayllumandapash, canchis shicuta, canchis carnerota, canchis jari llamata, canchis jari chivota, Diosman cungapa apamunajurca. Jatun mandajmi, Aaronbaj miraicunataca: “Cai animalcunataca, Mandaj Diosman cushpa, altarpi rupachipaichi” nirca.

22Maltun shicuta huañuchijpica, sacerdotecuna yahuarta japishpami, altarpi tsirapachinajurca. Chai jipaca, jari llamacunata huañuchishpapash, yahuartaca altarpillatami tsirapachinajurca. Maltun llamacunata huañuchishpapash, yahuartaca altarpillatami tsirapachinajurca.

23Chai jipami, juchamanda cushca jari chivocunataca, jatun mandajpaj ñaupajman, tucui gentecunapaj ñaupajman apamujpi, chai chivocunapaj jahuapi maquita churanajurca.

24Chai jipami sacerdotecunaca, Israelcuna juchacunamanda Taita Dioshuan ali tucunajuchun, apamushca chivocunata huañuchishpa, chai yahuartaca altarpi tsirapachinajurca. Jatun mandajmi paicunapaj juchamanda animalcunata Diosman cushpa tucuillata rupachinajuchun mandashca carca.

25Shinallata, levitacunatapashmi, Mandaj Diospaj huasipi platillocunata, salteriocunata, arpacunata taquinajuchun churarca. Chaitaca, jatun mandaj Davidpash, Dios ricuchishcata villaj Gad shuti runapash, profeta Natán runapashmi mandashca carca. Chai mandashcacunaca, Mandaj Diosmandami shamun. Diosmi chaicunataca, profetacunahuan villashca carca.

26Levitacunaca, David rurachishca taquinacunahuan, sacerdotecunaca trompetacunahuanmi shayanajurca.

27Chaipimi Ezequiasca, Diosman cushpa altarpi tucuillata rupachina animalcunata huañuchinajuchun mandarca. Animalcunata tucuillata rupachi callarijpimi, Mandaj Diosman candanajurca. Paicunaca trompetata huacachishpami, Israel llactata jatun mandaj David rurachishca taquinacunahuan candanajurca.

28Tandanajushca gentecunapash, Diosta alicachinajujpi, candajcunapash candanajujpimi, trompetacunataca ninanda huacachinajurca. Diosman animalcunata cushpa tucuillata rupachishpa tucuchingacamanmi, chashna ruranajurca.

29Ña rupachishpa tucuchijpica, jatun mandajpash, tandanajushca gentecunapash, tucuillami urai cumurishpa, Diostaca ninanda alicachinajurca.

30Chaimandami, jatun mandaj Ezequiaspash, cati mandajcunapash, levitacunataca cashna ninajurca: “David quilcashca shimicunahuan, Dios ima nishcata villaj Asaf shuti runa quilcashca shimicunahuanmi, Mandaj Diostaca cushijushpa alicachina canguichi” ninajurcami. Shina nijpimi, ninanda cushijushpa, Mandaj Diostaca cungurishpa alicachinajurca.

31Chai jipami Ezequiasca: “Cangunaca, ñami Mandaj Diospajlla canguichi. Cunanga animalcunata cushpa huañuchingapa, Mandaj Diospaj huasipi, Paita alicachingapa quimirichilla” nirca. Shina nijpimi, gentecunaca Diosta alicachishpa, animalcunata cushpa huañuchingapa apamunajurca. Ali shunguta charijcunacarin, paicunapaj munaillatami tucuillata rupachina animalcunata apamunajurca.

32Tandanajushca gentecuna Diosman cushpa tucuillata rupachingapaca, canchis chunga huagrata, patsaj jari llamata, ishcai patsaj maltun llamatami apamurca. Chai tucui animalcunatami, Mandaj Diosman cushpa tucuillata rupachinajurca.

33Diosman cushca ofrendacunaca, sucta patsaj huagracuna, quimsa huaranga llamacunami carca.

34Ashtahuangarin, sacerdotecuna huaquinlla cashpami, animalcunata huañuchitaca, na pactanajurca. Chaimandami chaishuj sacerdotecuna, Diospajlla tucungacamanga, paicunapaj huauqui levitacuna yanapanajurca. Levitacunami, Diospajta rurangapaca, caishuj sacerdotecunapash yali, Diospajlla causanajurca.

35Shinami tucuillata rupachina animalcunapash, Dioshuan ali cangapa carashca animalcunapaj viracunapash, tucuillata rupachina animalhuan cushpa talina vinopash ashtacapacha tiyarca.

Shinami Mandaj Diospaj huasipica, cutinllata Diospajta rurashpa callarinajurca.

36Tucui gentecunata Taita Dios alichishcamandami, Ezequías runapash, tucui gentecunapash ninanda cushijunajurca. Tucui imapash ucha rurarishcamandami, chashna cushijunajurca.