JEREMÍAS 33 - Quichua Imbabura 2016

Jerusalén pueblota cutin alichinamanda

1Jeremiasca, prezuna huasi patiopi tiyajujpillatami, Mandaj Diosca cashna nishpa cutin villajurca:

2“Mandaj Dios Ñucami, cai pachataca rurarcani. Ñucami, tucuita rurashpa shinllitapacha churarcani. Ñuca shutica, Mandaj Dios shutimi. Ñucami, cashna nini:

3‘Ñucataca tucui shunguhuan mañahuailla, Ñucaca uyashallami. Can na yachai ushanalla, pacalla tiyajujtami, canmanga yachachisha’ ninmi” nijurcami.

4Israelcunata Mandaj Taita Diosca, jatun chacanacunahuan yaicushpa, hachacunahuan urmachi tucushca cai Jerusalén pueblo huasicunamandapash, Judá llactata jatun mandajcunapaj huasicunamandapash, cashnami nin:

5(“Caldeo runacuna shamushpami, tucuicunata huañuchishpa tucuchirca. Jerusalenbi causajcunataca, na alicunapacha cajpimi, ninandapacha fiñarishpa tucuchircani).

6Cangunataca Ñucallata alichishpami, jambitapash cachamusha. Chashna alichishpami, tucuipi ali causaiguta carasha.

7Judá llactamanda, Israel llactamanda, prezu apai tucushcacunatapash tigrachimushpami, pundashnallata causanajuchun churasha.

8Ñucata na cazushpa juchata rurashcatapash anchuchishami. Shinallata, Ñucata na alicachishpa jariyashpa juchata rurashcatapash cungashami.

9Cai llactapi, Ñuca ima alita rurashcatami, tucui llactapi causajcuna yachaj chayanga. Ñucata ninanda alicachinajujpimi cushijuna tiyanga. Tucui alicunata rurashpa, ali causaita carashcata ricushpami, tucui llactacuna manllarinajunga” ninmi.

10Mandaj Diosca, cashnatapashmi nin: “Cangunaca, Judá llactapi tiyaj pueblocunapipash, Jerusalén pueblocunapipash, gentecunapash, animalcunapash, tucuimi illaj saquirishca” ninajunguichimi.

11Shina cajpipash, chaipica jatun cushijuihuan candanajun uyaringarami. Cazaraipi taquicunapash uyaringami. Chaipica cashnami ninajunga:

“Tucuita Mandaj Diostami alicachina canguichi.

‘Mandaj Diosca alipachami.

Paica, causaita causaicaman juyashpami charinga’ nishpa candashcami uyaringa.

Ñucaman ofrendacunata apamushpa, Mandaj Dios Ñucapaj huasiman shamujcuna, pashi nishpa candajpashmi uyaringa.

Prezu apai tucushcacunata tigrachimushpami, pundashnallata cai llactapi causachun churasha” ninmi Mandaj Diosca.

12Tucuita Mandaj Diosca, cashnatapashmi nin: “Cai pushtucunaca, runacunapash, animalcunapash illaj, jichushca pambashnami canga. Shina cashpapash, ashtaca animalcunata michijcunami, chugllacunata rurashpa causanajunga.

13Urcu alpacunapi tiyaj pueblocunapi, Sefela shuti pamba pueblocunapi, Neguev pamba pueblocunapi, Benjamín ayllupi, Jerusalén muyundi pambacunapi, Judá llactapi tiyaj tucui caishuj pueblocunapipashmi, michijcunaca paicunapaj animalcunata michinajunga” ninmi Mandaj Diosca.

14Mandaj Diosca, cashnatapashmi nin: “Israelcunaman, Judá llactapi causajcunaman, Ñuca alita rurashpa pactachina punllacunaca chayamugrinmi.

15Chai punllacunapi, chai huatacunapica, Davidpaj miraipuramandami, ali cashcatalla ruraj shuj Runa, mushuj malquishna llujchisha. Paimi, cai llactapica, ali cashcatalla rurashpa mandajunga.

16Chai punllacunapimi, Judá llactaca llaqui illaj causaita charinga. Jerusalenbi causajcunaca, imatapash na manllashpami, aliguta causanajunga. Paicunaca: ‘Mandaj Diosmi ñucanchiman alitalla rurashca’ ninajungami.

17Mandaj Diosca, cashnatapashmi nirca: Davidpaj miraimandaca, Israelcunata mandangapa tiyarinapi tiyarijca, napacha illangachu.

18Shinallata sacerdotecunapaj, levitacunapaj miraimanda, Ñucapajta rurajcunaca napacha illangachu. Paicunami punllandi, tucuillata rupachina animalcunatapash, ofrendacunatapash apamushpa, animalcunata huañuchishpa Ñucaman cunajunga” ninmi.

19Mandaj Diosca, cai shimicunatami Jeremiasman cashna nirca:

20“Mandaj Dios Ñucami, cashna nini: Tutapash, punllapash tucurinalla cajpica, Ñuca cangunahuan ari nishcapash yanga tucurinallami canman.

21Shinallata, Ñucapajta ruraj Davidman ari nishcapash, yangami saquiringa. Shina cajpica, pai mandashpa tiyarinapi pipash na mandai ushanmanllu. Shinallata, Ñucapajta ruraj levitacunahuan, sacerdotecunahuan ari ninajushcapash, yangami saquirinman.

22Jahua pachapi punchayachijcunatapash, mama cucha manñapi tiyaj t'iyu alpatapash, pipash na yupai ushanllu. Ñucapajta ruraj Davidpaj miraicunatapash, levitacunapaj miraicunatapash, chashnallatami pipash na yupai ushanallata mirachisha” nircami.

23Mandaj Diosca, Jeremiasmanga cashnatapashmi nirca:

24“Mandaj Diosca, ishcai ayllucunatami agllarca. Ashtahuangarin, cunanga ñami jichurca nishpa, chai runacuna rimanajujtaca, ¿nachu uyarcangui? Shina nishpami paicunaca, Ñuca agllashca gentecunataca yangapi churanajurca.

25Shina cajpipash Mandaj Dios Ñucaca, cashnami nini: Punllapash, tutapash paicunahuan Ñuca ari nishcashnallata na tiyajpi, jahua pachapash, cai pachapash imashna tiyachun ñuca mandashcashna na tiyajpica,

26Ñucapash Jacobpaj miraicunataca jichuimanllami. Ñucapajta ruraj Davidpaj miraicunatapash cungaimanllami. Shamui punllapica Abrahambaj, Isaacpaj, Jacobpaj miraicunata mandachunga, Davidpaj miraipuramandaca napacha churaimanchu. Ashtahuangarin Ñucaca, caimanda prezu apai tucushcacunataca llaquishpami tigrachimusha” nijurcami.