JEREMÍAS 42 - Quichua Imbabura 2016

Johanán shuti runaman villashcamanda

1Macanajuj runacunata mandajcunapash, Carea shuti runapaj churi Johanán runapash, Osaías runapaj churi Jezanías runapash, tucui gentecunapashmi, uchillacunamanda callarishpa, rucucunacaman shamunajurca.

2Paicunaca, profeta Jeremiastaca, cashnami ninajurca: “Cunanga, imata ñucanchi mañashcatapash uyapailla. Shinallata ñucanchimandapash, huaquinlla puchushca tucui cai gentecunamandapash, canda Mandaj Taita Diosta mañapailla. (Ñucanchica ashtacapacha cashcamandaca, cai huaquinllami puchushcanchi. Chaitaca, canllata ricujunguimi).

3Maijan ñanda ñucanchi catinatapash, imata ruranatapash villachun, Canda Mandaj Taita Diosta mañapailla” ninajurcami.

4Shina nijpimi, profeta Jeremiasca, cashna nirca: “Canguna mañashcata uyashpami, cangunata Mandaj Diostaca mañagrini. Mandaj Dios imata nijpipash, tucuitami cangunaman villasha” nircami.

5Shina nijpimi paicunaca, Jeremiastaca cashna ninajurca: “Canda Mandaj Taita Dios, ñucanchiman imata villachun canda cachamujpipash, chaita pactachishunllami. Ñucanchi chaita pactachinataca, Mandaj Diosllata ricujunmi.

6Ali cajpi, na ali cajpipash, Mandaj Diosta ñucanchimanda mañachunga candami cachapanchi. Mandaj Taita Dios rimashca shimicunata cazushpami, ali causaitaca japishun” ninajurcami.

7Chunga punlla jipami, Mandaj Diosca, cai shimicunata Jeremiasman villarca.

8Shinamandami Jeremiasca, Carea shuti runapaj churi Johanán shuti runata, paihuan tandanajushca macanajuj runacunata mandajcunata, tucuilla gentecunata, uchillacunamanda callarishpa rucucunacaman cayashpa,

9cashna nijurca: “Ñucataca, Israelcunata Mandaj Diosta cangunamanda mañachunmi cachahuarcanguichi. Paica, cashnami nin:

10‘Cai llactapillata causangapa canguna saquirijpica, cutinga na tucuchingapami jatarichisha. Imatapash tarpujshna churashpami, cangunataca cutinga na tucuchisha. Canguna, chashna llaquita apanajushcamandaca, Ñucapash llaquirinimi.

11Babilonia llactata jatun mandajtaca, na manllanachu canguichi. Paitami cangunaca, ninanda manllanguichi. Paipaj maquimanda cacharichingapaca Ñucami cangunahuan cani. Mandaj Dios Ñucami, chashna nini.

12Ñucami, cangunataca llaquisha. Shinallata, chai jatun mandajpash cangunataca llaquishpami, cangunapaj llactaman cutin tigrachinga’ nircami.

13Ashtahuangarin cangunaca, cangunata Mandaj Dios mandashcata na cazushpa: ‘Cai llactapica, na causashunllu.

14Ñucanchica Egipto llactapimi causajgrishun. Chaipica, jatun macanajuitapash na ricushunllu, trompetata huacachishcatapash na uyashunllu. Chaipica, yarjaipash na tiyangachu. Chaipimi aliguta causashun’ ninguichipashchari.

15Shina cashcamanda, Judá llactapi puchushca gentecuna, Mandaj Dios rimashcata uyaichi: Tucuita Mandaj, Israelcunapaj Taita Diosca, cashnami nin: ‘Egiptopi causagringapa munashpa, chai llactapi causagrijpica,

16canguna manllashca espadahuanllatami, chai llactapi huañuchi tucunguichi. Yarjai punllacunata canguna manllashcapash, Egipto llactapi japij shamushpami huañuchinga.

17Egipto llactaman tigrashpa chaipi causangapa ninanda munajcunaca tucuicunami, espadahuan, yarjaihuan, jatun ungüihuan huañushpa tucuringa. Ñuca cachamushca llaquimandaca, shujllapash napacha quishpirishpami huañunga’ ninmi.

18Tucuita Mandaj, Israelcunapaj Taita Diosca, cashnatapashmi nin: ‘Imashnami Jerusalenbi causajcunahuan ninanda fiñarishpa llaquichircani, chashnallatami Egipto llactapi causangapa rijpica, ninandapacha llaquichisha. Chaipimi cangunaca, ninanda ricunayachijpi, ninan manllaihuan, na ali shimicunahuan rimai tucushpa, ninan manllaihuan causanguichi. Cai llactataca, cutinga na ricushpami causanguichi’ ninmi.

19Judá llactapi huaquin saquirishca gentecunataca, Mandaj Diosca: ‘Egipto llactamanga na cutinga rinachu canguichi’ nircami. Caitaca, alimi uyana canguichi. Canguna cazuchunmi villajuni.

20¿Imamandata cangunallata chashna pandaringuichi? Cangunallatami, cangunata Mandaj Diosta cashna nishpa tapuchun cachahuarcanguichi: ‘Ñucanchita Mandaj Diosta ñucanchimanda mañapai. Ñucanchita Mandaj Dios imata mandajpipash, chaitapacha yachangapa villanguilla. Ñucanchica, pai mandashcatami rurapashun’ nihuarcanguichimi.

21Shina nishcamandami, cangunata Mandaj Taita Dios, cangunaman imatalla villachun mandashcataca villarcani. Ashtahuangarin Pai imata mandashcataca, na cazushpami causanguichi.

22Chaimanda cunanga, caitaca alipachami yachana canguichi: Canguna causagringapa munashca llactapica, espadahuan, yarjaihuan, jatun ungüihuanmi huañunguichi” nijurcami.