NÚMEROS 32 - Quichua Imbabura 2016

Rubenbaj, Gadpaj ayllucunaca, Jordán yacumanda indi llujshimujmanmi causai callarishca(Deut. 3:12-22)

1Rubenbaj, Gadpaj miraicunaca, ashtaca ashtaca animalcunata charishpami, Jazer shuti, Galaad shuti pambacunapi animalcunata charingapa alipacha cajta ricunajurca.

2Chaimandami, Gadpaj, Rubenbaj miraicunaca, Moisesta, sacerdote Eleazarta, tandanajushca Israelcunata mandajcunataca cashna ninajurca:

3“Atarot, Dibón, Jazer, Nimra, Hesbón, Eleale, Sebam, Nebo, Beón shuti alpacunataca,

4tandanajushca Israelcunapaj ñaupajpi, Mandaj Dios huañuchishpa tucuchishca gentecunapaj alpacunaca, animalcunata charingapa alipachamari capan. Canbajta ruraj ñucanchica, animalcunata charipanchimari” ninajurcami.

5Shina cashcamanda:

“Cambaj ñaupajpi ñucanchi ali ricurishca cajpica, cai Jordán yacuta nara chimbachishpallata, cai alpacunataca ñucanchipaj cachun carahuaichilla” ninajurcami.

6Shina nijpimi, Moisesca, Gadpaj, Rubenbaj ayllucunataca cashna nirca:

“Cangunapaj huauquicuna macanajuiman rinajujpipash, cangunaca, ¿caillapitachu saquiringapa munanguichi?

7¿Imashpata cangunaca, Mandaj Dios carashca llactaman na rishpa, Israelcunamanga na ali yuyaita cunajunguichi?

8Chashnallatami cangunapaj taitacunapash, Cades-barnea shuti pueblopi cashpa, llactata ricushpa tigramuchun cachashca punllacunapica jarcanajurca.

9Paicunaca, ninanda jatarij Escol shuti yacucaman vichai rishpami, chai llactata ricushpa tigramunajurca. Ña tigramushpami, Mandaj Dios carashca llactaman Israelcuna ama yaicuchunga, na ali yuyaita cushpa jarcanajurca.

10Chaimandami, Mandaj Diosca ninanda fiñarishpa cashna nishpa juramenturca:

11‘Egiptomanda vichai llujshimushca, ishcai chunga huatamanda vichaiman charij runacunaca, Abrahamman, Isaacman, Jacobman, Ñuca carashapachami nishpa juramentushca llactataca, napacha ricungachu. Paicunaca, Ñucata na tucui shunguhuan catinajushcamandami na ricunga’ nijurcami.

12Ricushpa tigrajcunamandaca, cenezeo gentepuramanda, Jefone shuti runapaj churi Calebhuan, Nun shuti runapaj churi Josuehuanllami, Mandaj Dios Ñucata tucui shunguhuan catinajushcamanda ricunga.

13Mandaj Diosca, Israelcunahuan ninanda fiñarishpami, jichushca pambapi chuscu chunga huatata chingashca purinajuchun saquirca. Mandaj Diospaj ñaupajpi na alita ruraj chai miraicuna tucuilla tucuringacamanmi, chashna saquirca.

14Cangunaca, juchata rurajcunapaj miraicuna cashpami, cangunapaj taitacunashna na alita ruranajunguichi. Mandaj Dios, Israelcunata ninanda fiñashcataca, cangunaca ashtahuan fiñachingapami munanguichi.

15Canguna Diosta na catingapa munashpa, huashaman tigrarijpica, cangunatapash, Diosca jichushca pambapi saquijpimi huañushpa tucuringuichi” nijurcami.

16Shina nijpimi, Moisespajman cutin shamushpa cashna ninajurca: “Ñucanchica, cai alpapica, animalcunaman corralcunata rurashpa, shinallata, ñucanchi huahuacunamambash pueblocunata shayachingapami munapanchi.

17Ñucanchica, macanajunacunahuan alichirishpa, Israelcunata ñaupashpa ripashunllami. Paicunapash, chai llactata japingacamanmi, ñucanchipash macanajushun. Ñucanchi huahuacunaca, cai llactapi causajcuna ama llaquichinajuchunmi, muyundi jarcashca pueblocunapi saquiringa.

18Israelpaj tucui miraicuna, paicunapaj cachun alpacunata tucuicuna japingacamanmi, ñucanchipash, ñucanchi huasicunamanga na tigrapashun.

19Jordán yacu caiman, indi llujshimujman tiyaj cai alpata ñucanchipaj cachun ña japishpaca, Jordán yacu chimbaman tiyaj alpatapash, ashtahuan chaiman tiyaj alpatapash, paicunahuanga napacha japipashunllu” ninajurcami.

20Shina ninajujpimi Moisesca cashna nirca: “Canguna nishcata pactachishpa, Mandaj Diospaj ñaupajpi macanajuiman ringapa shayarishpaca alimi canga.

21Cangunata fiñajcunata, cangunapaj ñaupajmanda llujchishpa cachangacaman, tucui canguna macanajungapa alichirishpa, Mandaj Diospaj ñaupajpi, Jordán yacuta chimbashpaca alimi canga.

22Mandaj Diospaj ñaupajpi mishashpa japishpaca, tigramunguichillami. Shina tigramushpaca, Mandaj Diospaj ñaupajpipash, Israelcunapaj ñaupajpipash, ima llaquitapash na apanami canguichi. Canguna shina rurajpica, cai llactaca, Mandaj Diospaj ñaupajpipash, cangunapajmi saquiringa.

23Ashtahuangarin na shina rurashpaca, Mandaj Diospaj ñaupajpica, juchatami ruranguichi. Chai juchaca, cangunatallata llaquichina cashcatami yachana canguichi.

24Cangunapaj huahuacunapajpash pueblocunata ruraichilla, llamacunapajpash corralcunata ruraichilla. Shinallata, cangunapaj shimihuan ninajushcataca pactachinapachami canguichi” nijurcami.

25Shina nijpimi Gadpaj, Rubenbaj miraicunaca, Moisestaca cashna ninajurca: “Ñucanchita mandaj can mandashcashnami, cambajta rurajcunaca pactachipashun.

26Ñucanchi uchilla huahuacuna, ñucanchi huarmicuna, huagracuna, tucuilla animalcunami, cai Galaad llacta pueblocunapi saquiringa.

27Ñucanchita mandaj can mandashcashnami, cambajta rurajcunaca, macanajunacunahuan alichirishpa, Mandaj Diospaj ñaupajpi macanajungapa chimbapashun” ninajurcami.

28Shina ninajujpimi Moisesca, sacerdote Eleazartapash, Nun shuti runapaj churi Josuetapash, Israel ayllucunapaj taitacunata mandajcunatapash, cashna nishpa mandarca:

29“Gadpaj, Rubenbaj ayllucunapash, macanajunacunahuan alichirishpa, Mandaj Diospaj ñaupajpi macanajuiman ringapa, Jordán yacuta chimbashpaca alimi canga. Chai llactapi causajcunata mishashca jipaca, Galaad llactataca paicunapaj cachun cunallami canguichi.

30Ashtahuangarin, macanajunacunahuan alichirishpa, cangunahuan na chimbashpaca, paicunapash cangunahuanllatami, Canaán llactata japinajunga” nijurcami.

31Shina nijpimi Gadpaj, Rubenbaj miraicunaca cashna ninajurca:

“Cambajta ruraj ñucanchiman Mandaj Dios imata mandashcatami rurapashun.

32Ñucanchica, macanajunacunahuan alichirishpami, Mandaj Diospaj ñaupajpi macanajungapa, Canaán llactaman chimbapashun. Ashtahuangarin, ñucanchipaj cachun japina alpacunaca, Jordán yacu caimanmi saquiringa” ninajurcami.

33Shina ninajujpimi Moisesca, Gadpaj, Rubenbaj ayllucunamambash, Josepaj churi Manasespaj chaupi ayllumambash alpacunata curca. Amorreo gentecunata jatun mandaj, Sehón shuti runa mandajushca llactatapash, jatun mandaj Og shuti runa mandajushca, Basán shuti llactatapash, chai llactacunapi tiyaj pueblocunandi, pueblo muyundi uchilla llactacunandimi curca.

34Gad shuti runapaj miraicunaca, Dibón, Atarot, Aroer shuti pueblocunatami shayachirca.

35Shinallata, Atarot-sofán, Jazer, Jogbeha,

36Bet-nimra, Bet-arán shuti, muyundi pircashca pueblocunatapashmi, shayachirca. Shinallata, llama corralcunatapashmi ruranajurca.

37Rubenbaj miraicunaca: Hesbón, Eleale, Quiriataim,

38Nebo, Baal-meón pueblocunataca, (shuj shuticunatami churanajurca). Shinallata, Sibma shuti pueblotapashmi shayachirca. Shinami paicuna shayachishca pueblocunataca shuj shuticunata churanajurca.

39Manasespaj churi Maquir shuti runapaj miraicunaca, Galaad llactaman rishpami, chai llactapi causanajuj amorreo gentecunata cachashpa, chai llactataca japinajurca.

40Moisesca, Galaad llactataca, Manasespaj churi Maquir shuti runapaj miraicunaman cujpimi, paicunaca chai llactapi causanajurca.

41Manasespaj miraipura Jair shuti runapash, chai llactaman rishpaca, chai muyundi llactacunatami japirca. Chai llactacunataca, Havot-jair shutitami shutichirca.

42Shinallata Noba shuti runapash, Kenat shuti pueblotami, chai pueblo muyundi uchilla pueblocunandi quichushpa japirca. Chai pueblotaca, Noba shutitallatami shutichirca.