MATEO 23 - Quichua Imbabura 2016

Mandashca Shimita yachachijcunatapash, fariseocunatapash, Jesús rimashcamanda(Mar. 12:38-40; Luc. 11:37-54; 20:45-47)

1Chai jipami Jesusca, chai gentecunatapash, Paipaj yachajujcunatapash cashna nirca:

2“Mandashca Shimita yachachijcunapash, fariseocunapash: Moisés mandashca shimicunata yachachishpami tiyanajun.

3Shina cajpimi, tucui imata cazuchun nishcatapash, pactachina canguichi. Ashtahuangarin, paicuna ruranajunshnaca na ruranachu canguichi. Paicunallata yachachishpapash na pactachinajunllu.

4Paicunaca, llashaj quipicunata huatashpa, runacunaman apachinshnami, na pactachi ushanallata yachachinajun. Chashna yachachishpapash paicunaca, shuj dedohuanllapash na tacarijshnami, na pactachinajun.

5Imata rurashpapash, gentecuna alicachishpa ricuchun yashpallami ruranajun. Paicunaca, Diospaj Shimi quilcashcacunata frentepi, maquipi, huatarishpami purinajun. Shinallata, jahualla churajunatapash, jatun flecocunahuan rurashpami churajushpa purinajun.

6Shinallata, chishi micunaman rishpapash, pundapi tiyarinatallami ninanda munanajun. Sinagogacunapipash pundapi tiyarinatallami munanajun.

7Plazacunapipash: ‘Alillachu capangui’ ninajuchun, shinallata: ‘Yachachij, Yachachij’ nichumbashmi munanajun.

8Ashtahuangarin cangunaca: ‘Yachachij’ nichunga na munanachu canguichi. Cangunata yachachijca Shujllami tiyan, Paica Cristomi. Cangunaca, tucuillami huauquipuralla canguichi.

9Cai pachapica ni pitapash na ñucanchi taita ninachu canguichi, jahua pachapi Shujlla Diosmi, cangunapajca Taita.

10Cangunata yachachij nichunga na munanachu canguichi, cangunata Yachachijca shujllami tiyan paica Cristomi.

11Maijambash cangunata mandaj cashpaca, cangunapajta ruraj cachun ninimi.

12Jatun tucushpa purijtaca, yangapimi churanga. Shinallata, na jariyashpa causajca, jatunyachi tucungami.

13¡Aij Mandashca Shimita yachachijcunalla, fariseocunalla! Cangunaca mishqui shimi, jayaj shungucunami canguichi. Cangunaca, jahua pachapi Dios mandajuj llactaman, gentecuna ama yaicuchunmi, punguta vichanguichi. Chashna cashpami, cangunapash na yaicushpa, yaicungapa munajcunatapash jarcanajunguichi.

14¡Aij Mandashca Shimita yachachijcunalla, fariseocunalla! Cangunaca, mishqui shimi, jayaj shungucunami canguichi. Cangunaca, sapalla huarmicunapaj huasicunatapash langajshna quichushpami puringuichi. Chashna rurashpaca, alipi ricuringapa yashpami, Taita Diostaca unai unaita mañaj tucunajunguichi. Chashna cashcamandami cangunaca, ashtahuan ninanda llaquichi tucunguichi.

15¡Aij Mandashca Shimita yachachijcunalla, fariseocunalla! Cangunaca mishqui shimi, jayaj shungucunami canguichi. Canguna yachachishcata catichunmi, mama cuchatapash, alpatapash rinajunguichi. Canguna yachachishcata ña catijpica, ucu pachapi cangunatapash ashtahuan yali llaquichi tucuchunmi tigrachinguichi.

16Ñausa causajcunata pushajcuna, ¡aij cangunaca, imachari tucunguichi! Cangunaca cashnami ninajunguichi: ‘Diospaj huasipa shutipi juramentushpaca, na imapash canllu. Ashtahuangarin Diospaj huasi ucupi tiyajuj curipaj shutipi juramentushpaca, pactachinapachami’ ninajunguichimi.

17¡Ñausashna causaj, juizu illajcuna! ¿Maijanda ashtahuan yali canga? ¿Curichu yali canga, na cashpaca, curitapash Diospajlla shicanyachij Diospaj huasichu yali canga?

18Cangunaca, cashnatapashmi yachachinguichi: ‘Altarpaj shutipi juramentushpaca, na imapash canllu. Ashtahuangarin Taita Diosman imata carashca, altar jahuapi tiyajujpaj shutipi juramentushpaca, pactachinapachami’ ninguichimi.

19¡Ñausashna causaj na cazujcuna! ¿Maijanda ashtahuan yali canga? ¿Diosman carashcachu yali canga, na cashpaca Diosman carashcatapash, paipajlla cachun rurashca altarchu yali canga?

20Altarpaj shutipi, maijambash juramentushpaca altarmandapash, chai jahuapi Taita Diosman carashca tucui ima tiyajunmandapashmi juramentun.

21Diospaj huasipa shutipi juramentushpaca, chai huasimandapash chaipi causaj Taita Diosmandapashmi juramentun.

22Shinallata, Jahua pachapaj shutipi juramentushpaca, Taita Dios tiyajuj jatun tiyarinamandapash, Taita Diosmandapashmi juramentun.

23¡Aij Mandashca Shimita yachachijcunalla, fariseocunalla! Cangunaca mishqui shimi, jayaj shungucunami canguichi. Cangunaca, mentatapash, anistapash, cominotapash, chungamanda shujgutami, Diosman caranata yachanguichi. Mandashca shimipica: ‘Alitalla rurashpa causangui, shujcunatapash llaquishpa juyangui, Diostapash ali cringui’ nishpami yachachijun. Ashtahuangarin chaitarami na pactachinguichi. Chaita aliguta pactachishpami, Diosman caranatapash na saquishpa causana canguichi.

24¡Cangunaca ñausa pushajcunami canguichi! Jamzi chuspitaca shushushpa anchuchishpami, camello animaltara langanguichi.

25¡Aij Mandashca Shimita yachachijcunalla, fariseocunalla! Cangunaca mishqui shimi, jayaj shungucunami canguichi. Cangunaca, vasotapash, platotapash huashatallami ali maillanguichi. Ashtahuangarin, cangunapaj shungupica, shuhuana yuyaihuan, shujcunata llaquichina yuyaihuan jundami canguichi.

26¡Ñausashna causaj fariseocuna! vasota, platotaca ucutarami ali maillana cangui. Shina rurajpimi, huashandi tucuilla mapa illaj ricuringa.

27¡Aij Mandashca Shimita yachachijcunalla, fariseocunalla! Cangunaca mishqui shimi, jayaj shungucunami canguichi. Cangunaca, bovedata yurajyachishpa, juyailla alichishcashnami canguichi. Chashna cashpapash chai boveda ucupica, huañushcacuna ismushca tullucuna jundashcashnami canguichi.

28Chashnallatami cangunaca, ali runashna, canllamanga tucuicunaman ricuringuichi. Ashtahuangarin shungupica, nij tucushpalla, imatapash na alitallami yarinajunguichi.

29¡Aij Mandashca Shimita yachachijcunalla, fariseocunalla! cangunaca mishqui shimi, jayaj shungucunami canguichi. Cangunaca, Profetacunata pambashca bovedacunata cutin mushujyachijcunami canguichi. Alitalla rurashpa causashca runacunataca, pircashpa paicunatashnalla rurashpa yaringapapash, alichijcunami canguichi.

30Cangunaca: ‘Ñucanchipaj ñaupa taitacuna causanajui punllacunapi causashpaca, na paicunahuan cumba tucushpa profetacunapaj yahuarta jichanchimanllu carca’ ninajunguichimi.

31Chashna nishpaca, profetacunata huañuchij runacunapaj miraicuna cashcatami, cangunallata ricuchinajunguichi.

32¡Cangunapash, cangunapaj ñaupa taitacunashnalla na alita rurashpa catinajuichilla!

33¡Culebrashna na alicuna, cangunaca culebrashna na ali gentecunapaj miraicunamari canguichi! Ucu pachapi ninanda llaquichi tucunamandaca, ¿imashnashi quishpiringuichi?

34Shina cashcamanda ricuichi, profetacunata, alipacha yachajushcacunata, mandashca Shimita yachachijcunatami cangunapajman cachamuni. Shina cachamujpimi, paicunapuramanda huaquingunataca huañuchinguichi. Shujcunataca chacatanguichimi. Huaquingunataca, sinagogacunapimi astishpa, tucui pueblocunapi catiriyashpa llaquichinguichi.

35Alitalla rurashpa causanajuj runacunapaj yahuarta cai alpapi jichashcamandami ninanda llaquichi tucunguichi. Alitalla rurashpa causashca Abel runapaj yahuarmanda callarishpaca, Berequías shuti runapaj churi Zacariaspaj yahuarcamanmi chashna rurarcanguichi. Paitaca, altarhuan, Diospaj huasihuan, tiyajuj chaupipimi huañuchircanguichi.

36Na llullashpami cangunataca cashna nini: ‘Tucui chashna tucunaca, cunan cai viñaicunapimi pactanga’ ninimi.

Jerusalenbi causajcunata llaquishpami, Jesusca huacashca(Luc. 13:34-35)

37¡Jerusalén, Jerusalén, canga profetacunatapash huañuchij, Diosllata cachamushca runacunatapash rumicunahuan llaquichijmi cangui! ¡Ñucaca, shuj atalpa paipaj huahua pollocunata tandachishpa ugllajshnami, cambaj huahuacunataca cutin cutin tandachingapa munarcani! ¡Ashtahuangarin, na saquircanguichu!

38Ricuichi, cambaj huasica jichushcamari.

39Ñucaca cashnami nini: ‘Jatun Diospaj shutipi shamujujtaca, Dios bendiciashca cachun’ ninajuna punllacuna chayamungamanmi, Ñucataca na ricuhuanguichi” nircami.