EZEQUIEL 1 - Quichua Imbabura 2016

Diospaj ninan ushaitami, Ezequielca muscuipishna ricushca

1Chuscu quilla, picha punllapimi, prezu apai tucushcacunahuan, Quebar shuti yacu manñapi tiyajurcani. Chaipi tiyajujpi jahua pacha pascarijpimi, Taita Dios imatalla ricuchishcata muscuipishna ricujurcani.

2Jatun mandaj Joaquinda prezu apashcapash, picha huata picha punllami tucurca.

3Chai huatapimi Mandaj Diosca, Buzi shuti runapaj churi sacerdote Ezequielman, caldeo runacunapaj llactapi tiyaj Quebar shuti yacu manñapi, cai shimicunata rimarca. Chaipimi Mandaj Diospaj ninan ushaica, ñucapajman shamurca.

4Shinallata, janajmanda ninan huairahuan, ashtaca fuyupi nina rupajuj punchapamba pillurijundami ricurcani. Chai nina chaupipica, punchapamba bronceshnami ricurijurca.

5Chai fuyu chaupipica, causaita charij chuscupurami ricurirca. Paicunaca, runaman rijchajcunami carca.

6Tucuillami chuscu ñavita, chuscu alasta charirca.

7Paicunapaj chaquica, gente chaquishnalla cashpapash, shicupaj sillushnami carca. Chaicunaca, juyailla bronceshnami punchapamba ricurijurca.

8Paicunapaj chuscundi alas ucupica, gente maquitami charirca. Ñavitapash, alastapash, chuscundimanmi charirca.

9Caishuj, chaishujmi alaspura tuparinajurca. Paicunaca, paipura na ricurishpapash na shicanyarishpami, ñaupajman rinajurca.

10Paicunapaj ñavicunaca, runapaj ñavishnami carca. Chai chuscundipaj ali maquiman ricunajuj ñavicunaca, leonbaj ñavishnami carca. Lluquiman ricunajuj ñavicunaca, huagrapaj ñavishnami carca. Shinallata chai chuscundipillatami, jatun angapaj ñavishnapash carca.

11Paicunapaj ñavica, chashnami carca. Paicunapaj ishcandi alastaca, jahuaman chutashcami carca. Chai alascunahuanmi, caishujhuan chaishujhuan tuparinajurca. Caishuj ishcai alascunahuanga, paicunallata quilparishcami carca.

12Chuscundicunami na quingushpa ñaupajmanlla purinajurca. Maiman espíritu pushajpipash, na tigrarishpami ñaupajman rinajurca.

13Chai chuscundicunaca, nina rupajujshnami ricurirca. Ninanda rupajuj ninashnami, caiman chaiman paicunapaj chaupipi purijurca. Chai ninaca, ninanda punchayachijujpimi, punchalla shitajuj ricurijurca.

14Causaita charijcunaca, punchapamba shitamujshnami calpashpa, cutin tigranajurca.

15Causaita charijcunata ñuca ricujujpillatami, paicuna shayanajushca pushtupica, chuscu pirurucuna ricurirca.

16Chai pirurucunaca, crisólito rumiman rijchajcunami carca. Chaicunaca, chuscundimi chashnallata carca. Chuscundi chashnallata cashpapash, tandachijpica shujllashnallami ricurijurca.

17Chai pirurucuna purishpaca, chuscundimanmi, maimambash na tigrarishpa purinajurca.

18Chai piruru muyuchun charijuj jirrucunaca punchapambami ricurijurca. Chuscundi pirurucunami, jatun ñavihuanshna, manllanai ricurinajurca.

19Causaita charijcuna purijpica, pirurucunapash paicunahuanmi pacta purinajurca. Causaita charijcuna alpamanda jatarijpica, chaicunapashmi pacta jatarinajurca.

20Maiman richun espíritu pushajpipash rircallami. Maiman richun Espíritu pushajpipash, chai pirurucunapash catishpa rircallami. Causaita charijcunapi tiyaj espiritullatami, pirurucunapipash carca.

21Chaimandami causaita charijcuna purijpica, pirurucunapash purinajurca. Paicuna shayarijpica, pirurucunapashmi shayarirca. Shinallata, alpamanda jahuaman jatarijpica, pirurucunapash catishpa jatarircallami. Causaita charijcunapi tiyaj espiritullatami, pirurucunapipash carca.

22Causaita charijcunapaj uma vichaipica, juyailla cristalman rijchajmi shicanyachijuj ricurirca. Chaica, paicunapaj uma jahuatami tucuilla quilpajurca.

23Chai shicanyachijuj ucupica, paicunapaj alastaca caishujhuan chaishujhuan tuparingacaman ali chutashcami carca. Shinallata tucuicunallatami, ishcai alascunahuan paicunallata quilparishca carca.

24Paicuna purijpica, paicunapaj alascuna huacashcapash, ashtaca yacu huacajunshna, Tucuita Rurai Ushaj Dios rimajujshna, ashtaca runacuna purinajujshna, macanajuj runacuna caparinshnami uyarijurca. Paicuna shayarishpaca, uraimanmi alascunataca churanajurca.

25Paicuna shayarishpa alasta urai churajpica, paicunapaj uma jahuapi shicanyachijujmanda rimajujmi uyarirca.

26Chai shicanyachijuj jahuapica, mandangapa tiyarinatami, zafiro rumitashna rurashca tiyajujta ricurcani. Chai tiyarinapica, runaman rijchaj tiyajujmi ricurirca.

27Chai tiyajujca, punchapamba bronceshnami ricurijurca. Paipaj chaupipipash, paipaj muyundipipash, punchapamba rupajun ninashnami ricurijurca. Cinturasmanda vichaimambash, uraimambash, ninashna muyundi punchapamba cajtami ricurcani.

28Tamia punllacunapi, fuyu chaupipi cuichi ricurijshnami, punchapamba muyundi ricurirca.

Mandaj Diospaj ninan ushaitaca, punchapambatami, muscuipishna ricurcani. Chaita ricushpami, alpaman chayajta cungurishpa, shuj shimi rimajta uyarcani.