GÁLATAS 3 - Quichua Imbabura 2016

Crishpallami Diospaj Espiritutaca chasquin nishcamanda

1¡Galacia llactapi causajcunalla, juizu illajcunamari canguichi! Na llulla Shimita ama cazuchunga, ¿pita cangunataca pandachirca? Jesucristota chacatashcataca, cangunapaj ñaupajpi ricuchijshnami aliguta villarcanchi.

2Cunanga, cangunaca caitalla nihuaichi: ¿Mandashcata pactachishpachu, Diospaj Espiritutaca chasquircanguichi? ¿Na cashpaca, uyashpa crishpallachu chasquircanguichi?

3Cangunaca shinlli shungucunapachami canguichi. ¿Diospaj Espirituhuan callarishca jahuachu, cunanga cangunapaj munaihuanlla causangapa munanguichi?

4¿Yanga yangachu, chai tucui llaquicunataca aparcanguichi? Chai llaquicunataca, ama yanga apashca cachunmi munani.

5Diosca, Paipaj Espirituta cangunaman carashpami, cangunapurapica pipash na rurai ushanallacunata rurajun. ¿Chaitaca, mandashcacunata pactachishcamandallachu chashna rurajun? ¿Na cashpaca, uyashpa crishcamandachu chashna rurajun?

Diosca, Abrahamhuanmi pactachingapa ari nijushca

6Abrahamdaca, Taita Diosta crijpimi, alitalla rurashcatashna chasquirca.

7Shina cashcamandami, caitaca yachanapacha canguichi: Crijcunaca, taita Abrahambaj miraicunami canchi.

8Quilcashcapica, na Israelcunatapash crishcamandalla, alitalla rurashcatashna Taita Dios chasquina cashcatami villajun. Chai juyailla villanataca, taita Abrahammanmi cashna nishpa villashca: “Canmandami, shuj llactacunapi tucui causajcunapash bendiciai tucunga” nijushcami.

9Shinamandami crijcunaca, Taita Abraham crishcamandalla bendiciai tucunajun.

10“Chai mandashca shimicunata pactachishpa causajcunaca, ninan llaquiman rinapachami” nijunmi. Quilcashcapica cashnami nijun: “Mandashpa quilcashcapi ima nijujta na tucuita pactachijcunaca, ninan llaquimanmi ringa” nijunmi.

11Shina cashcamandaca, Taita Diosca mandashcata pactachishcamandalla, na pitapash chasquingachu. Shinallata, alitalla rurajcunaca crishcamandallami, causaita charinga.

12Mandashcapica, crinami canguichi nishpaca, na villajunllu. Ashtahuangarin: “Cai mandashca shimipi nijujta pactachijcunami, aliguta pactachishcamanda causanga” nijunmi.

13(Quilcashcapica cashnami nijun: “Napacha ali cashpami caspipi chacatai tucunga” nijunmi). Shina cajpimi, llaquichi tucunapacha canguichi nijujmandaca, Cristoca pai chacatai tucushpa ñucanchitaca quishpichirca.

14Cristo Jesusmandami, Abraham bendiciai tucushcataca, na Israelcunapash japinajun. Crishcamandami, Dios carashapachami nishca, Espiritutaca tucuicunallata chasquinajunchi.

15Juyashca crijcuna, gentecuna imata rurajtami, cangunaman cashna yarichimuni: Runacuna paipura ña quilcashpa ari nirishcata, na yangapi churai ushanllu, mirachitapash na ushanllu.

16Shina cashpami, Abrahammanbash, paipaj miraimambash, Diosca carashapachami nijushca. Ashtahuangarin: “Cambaj mirai” nishpaca, na taucacunaman caranataca nijunllu. Chaitaca, shujmanlla carangapami: “Cambaj miraiman” nishca. Chai miraica Cristomi.

17Shina cajpica, caitallami nijuni: Taita Diosca, Cristota cachamushpa pactachinataca, pundallatami ña ari nijushca. Mandashca shimicunaca, chuscu patsaj quimsa chunga huata jipami shamushca. Shina cashpapash, Dios carashapachami nijushcataca na yangapi churarcachu, na anchuchishcachu.

18Mandashcata pactachishpalla Dios carashcata japina cajpica, Dios carashapachami nishcapash yangami canman. Ashtahuangarin Abrahamman, Taita Dios carashapachami nishca cashpami pactachishca.

Mandashca shimicunata imapa cushcatami villajun

19Shina cashpaca, mandashca shimica, ¿imapata ali canga? Chaitaca na cazunajujta ricushpami, jipaman cachamushca. Abrahambaj miraimandami chai carasha nishcata japina carca. Pai shamungacamanllami, chai mandashcacunaca mandai usharca. Chai mandashca shimicunataca, angelcunami, Moisespaj maquipi curca.

20Chai chasquishpa yalichij runaca, na paimandalla shujcunaman imatapash rurajunllu. Ashtahuangarin Taita Diosca shujllami.

21Taita Dios pactachishami nishcataca, ¿mandashca shimica, shujtachu nijun? Napacha shinachu. Mandashca shimicuna causaita carangapa ushaita charijpica, chai mandashca shimicunata pactachijcunataca, alitalla rurashcatashnami chasquinman carca.

22Ashtahuangarin quilcachishca Shimica, tucuicunatami juchapi prezushca charijun. Dios carashapachami nishcataca, Jesucristota crishpallami tucui crijcuna japinajunga.

23Crina punllacuna nara chayamujpica, mandashca shimicunata cazushpami causanajurcanchi. Crishpa causachun Dios caramungacamanmi chashna causarcanchi.

24Mandashca shimica, Cristopajman chayachingapami huahuacunata yachachijujshna charijurca. Cristota crishcamanda, alitalla rurashcashna chasqui tucuchunmi chashna charijurca.

25Ashtahuangarin crina punllacuna ña chayamujpimi, mandashca shimica na ashtahuan huahuatashna mandajun.

26Cristo Jesusta crishcamandaca, cunanga tucuicunami Taita Diospaj huahuacuna canguichi.

27Cristohuan shujlla tucungapa bautizarishca cashpami, cangunaca, Cristohuan shujllashnalla causanajunguichi.

28Chashna cashpami, judío cashpa, griego cashpa, gañan cashpa, na gañan cashpapash, jari cashpa, huarmi cashpapash, tucuicuna, Cristo Jesushuan shujllashnalla causanajunguichi.

29Cristopaj cashpaca, taita Abrahambaj miraicunapachami canguichi. Shina cashpami, Dios carashapachami nishcataca japigrinapacha canguichi.