SOFONÍAS 3 - Quichua Imbabura 2016

Jerusalenbi causajcunata quishpichina cashcamanda

1Imatapash na cazuj, tucuita mapayachishpa, huajchacunatapash llaquichishpa causajcuna,

¡aij imachari tucunga!

2Ali tucuchun, Mandaj Dios imata rimashcatapash na uyanayachishpa, napacha cazujcunami canguichi.

Na ali cashcamanda llaquirishpa, Mandaj Diospajman tigraringapapash, napacha munajcunami canguichi.

3Cangunata mandajcunapash, millai leongunashnami purinajun.

Chai pueblopi cati mandajcunapash, atucunashna shuj animalta tuta japishpa,

tullundi micushpa tucuchishnami purinajun.

4Profetacunapash, ninanda yachaj tucushpa, pandachishpami villanajun.

Sacerdotecunapash, Diospaj huasita mapayachishpami, mandashca shimicunatapash na cazushpa purinajun.

5Mandaj Diosca, paicunapaj chaupipimi imatapash alitalla rurajun.

Paica, imatapash na alitaca na ruranllu.

Paica, punllandimi tucuita alitapacha rurashpa pactachijuj cajta ricuchijun.

Paica chashna ruranataca napacha saquingachu.

Ashtahuangarin na alita ruraj runaca, ima pingaitapash na charishpami na alita rurajun.

6Diosca cashnami nin: “Ñucami tucuilla llactacunata tucuchishcani.

Paicuna causana huasicunapash, tucuilla shitashcami saquirishca.

Ñangunapipash, pipash na purijpimi shitashca saquirishca.

Pueblocunapipash, tucuilla tucurishpa pipash illajpimi, jichushcapacha saquirishca.

7Chashna rurajpica, Jerusalén pueblopi causajcunaca manllashpa, cazuhuangami.

Ñuca mandashca shimicunatapash cazungami.

Paicuna cazushpa causajpica, tucuita bendiciasha yajurcanimi.

Ashtahuangarin paicunaca, na alitalla ruranatami munarca.

8Chashna cashcamandami, cangunata llaquichina punlla chayangacaman, purinajuichilla.

Ñucami ninanda fiñarishpa, tucui llactapi causajcunatapash, jatun mandajcunatapash tucuillata tandachishpa,

paicunapaj jahuapi ninan llaquicunata cachamushpa tucuchigrini.

Ñucapajlla cachun munashcata, na cazushcamandami, cai pachapi ninahuan rupachijpi tucuringa” Mandaj Dios, Ñucami chashna nini.

9Shinallata: “Cai pachapi, causajcunapaj jallucunataca, ama na alita rimachunmi alichisha.

Chashna rurajpimi, Ñuca Shutipi mañashpa, Ñucapajtalla rurashpa causanajunga.

10Etiopía llacta jatun yacu manñapi causajcunami, Ñucataca mañashpa causanajunga.

Tucui llactacunaman calpachi tucushca Israelcunami,

ofrendacunata apashpa Ñucapajman shamunajunga.

11Chai punllapica, Ñucata na cazushpa, ima na alita rurashcamandapash, na pingai tucunguichu.

Cangunapaj chaupimandaca, Ñucata na cazushpa, jariyashpa jatun tucun runacunataca anchuchishami.

Chaimandami Ñucapajlla urcupica, cutinga na jariyashpa jatun tucunguichi.

12Cambaj chaupipica, imatapash na yapata charishpapash, ali yuyaihuan causaj gentecunatallami saquisha.

Paicunami, Mandaj Dios Ñucataca, yariashpa causanajunga.

13Huaquin puchushca Israelcunaca, na alita ruranatapash, llullanatapash saquishcami canga.

Paicunaca, pitapash na umashpa rimangachu.

Paicunataca, ali michijpimi, imatapash na manllashpa puñunajunga” ninmi.

14Tucuilla, Sión pueblopi causajcunami, candana canguichi.

Israelpi, causajcunapash ninanda cushijushpami caparina canguichi.

Jerusalenbi causajcunaca, ninandami cushijuna canguichi.

15Mandaj Diosca, na ashtahuan cangunata, llaquichingachu.

Cangunata fiñajcunatapash, llujchishpami cachashca.

Israelcunata Jatun Mandaj Diosca, cangunapaj chaupipimi.

Llaquicunataca cutinga na ricushpami causanguichi.

16Chai punllacunapica, Jerusalenbi causajcunataca cashnami ninga:

“Sión pueblopi causajcunaca, imatapash na manllanachu canguichi.

Cangunaca ninan ushaitami charinguichi” ninajungami.

17Mandaj Diosmi, cangunahuan causajun.

Paimi ninan ushaihuan, cangunataca quishpichinga.

Cangunata juyashpami, ninanda cushijunga.

Pai ninan juyaita charishpami ninandapacha alicachishpa cushijunga.

18Mandaj Diosca cashnami nin: “Unai huatacunata, llaquichi tucushpa causajcunatami tandachisha.

Paicunaca, cangunapurallatami carca.

Paicunaca na alicachi tucushpami causanajurca.

19Cunanga, cangunata llaquichishpa charijcunatami, llaquichishpa tucuchisha.

Jangacunashna llaquita apajcunatapash alichishpami,

chingashca causajcunatapash cutin tandachisha.

Tucui llactacunapash, caipachapi tucui causajcunapash, alicachinajuchunmi, cangunataca churasha.

20Chai huatacunapica, Ñucami cangunataca pushamusha.

Chai huatacunapica, Ñucami cangunataca tandachisha.

Prezu cashcamandapash llujchimushpami,

tucui cai pachapi causajcunapash, alicachinajuchun, caipi churasha” nijunmi.