2 REYES 23 - Quichua Imbabura 2016

1Shina cajpimi, jatun mandajca, Judá llactamanda, Jerusalenmanda tucui ancianocunata, tandanajumuchun mandarca.

2Chai jipami jatun mandajca, Judá llactamanda, Jerusalenmanda gentecunandi, sacerdotecunandi, profetacunandi, uchillamanda callarishpa, jatungunacaman, Mandaj Diospaj huasiman vichai rinajurca. Chaipimi, Mandaj Diospaj huasipi tarishca libropi imatalla nijujta quilca catijpi, Dioshuan ari ninajushpa tucui imatalla nijushcata tucuicuna uyanajurca.

3Chai jipami jatun mandajca, pilarman chayanapi shayarishpa, Mandaj Diosta catishunmi nishpa, Mandaj Diospaj ñaupajpi ari nijurca. Pai mandashcacunata, pai yachachishcacunata, pactachinajuchun pai cushca shimicunataca, Dioshuan ari ninajushcata chai libropi quilcashcatapash tucui shunguhuan, tucui almahuan pactachishunmi nishpami ari ninajurca. Dioshuan ari nishcataca tucui gentecunami, pactachingapa ari ninajurca.

Josías runa, mushuj mandashcacunata churashcamanda(2 Crón. 34:3-7)

4Shinamandami, jatun mandaj Josías runaca, sacerdotecunata mandaj Hilcías shuti runatapash, cati mandaj sacerdotecunatapash, pungupi ricujcunatapash, Mandaj Diospaj huasipi imalla tiyashcacunata llujchinajuchun mandarca. Baal shuti, Asera shuti dioscunaman, jahua pachapi tiyaj tucui luzerocunaman rurashcacunata, Jerusalenmanda llujchishpami, Cedrón shuti pambapi rupachirca. Chai rupashca uchufataca, Bet-el shuti pushtupimi shitachun cacharca.

5Paica, rurashcalla dioscunata mañashpa, inciensota cushnichinajuchun, Judá llactata jatun mandajcuna churashca sacerdotecunatapashmi anchuchirca. Paicunataca, Judá llacta pueblocunapi, Jerusalén muyundicunapi tiyaj altarcunapi rupachinajuchunmi churashca carca. Shinallata, Baal shuti diosman, indiman, lunaman, quillacunata ricuchij luzerocunaman, jahua pachapi tiyaj tucui luzerocunaman cushpa, inciensota cushnichijcunatapashmi anchuchirca.

6Shinallata, Asera shuti huarmi diosman rijchajta rurashca diostapashmi, Mandaj Diospaj huasimanda llujchinajuchun mandarca. Chaitaca Jerusalenmanda llujchishpa, Cedrón shuti pambaman apashpami, chaipillata rupachishpa, uchufata rurarca. Chai uchufataca, chai pueblomanda gentecunata pambashca jahuapimi shitarca.

7Shinallata, Mandaj Diospaj huasipi churashca tiyanajuj rurashcalla dioscunata mañashpa, huainayana ucucunatapashmi urmachirca. Chai ucucunapimi huarmicunaca, Asera shuti huarmi diospaj churajunacunata ahuashpa causan carca.

8Chai jipami, Judá llactapi tiyaj pueblocunapi causaj tucui sacerdotecunata tandachishpa, lomacunapi tiyaj altarcunataca, Geba shuti pueblomanda callarishpa, Beerseba pueblocaman tucuchishpa saquirca. Chai altarcunapimi sacerdotecunaca, inciensota cushnichinajun carca. Shinallata, pueblota mandaj Josué rurachishca punguman chayanapi tiyanajuj altarcunatapashmi urmachirca. Chai altarcunaca, puebloman yaicuna pungu lluquimanmi tiyanajurca.

9Shina cashpapash, lomacunapi tiyaj altarcunapi imatalla ruraj sacerdotecunaca, Jerusalenbi tiyaj Mandaj Diospaj altarmanga na vichai rinajurcachu. Ashtahuangarin paicunaca, paicunapaj huauquicunahuanmi, levadura illaj tandata micunajurca.

10Shinallata, Moloc shuti diosman cushpa, paicunapaj churicunata, ushicunata, ama ninapi rupachinajuchunmi, Hinom runapaj churipaj pugru pambapi tiyaj Tofet shuti altartapash tucuchishpa saquirca.

11Judá llactata jatun mandajcuna, caballocunata, indiman carashpa, Mandaj Diospaj huasiman yaicuna punguman chayanapi churashcatapashmi anchuchirca. Chaicunaca, michina pambacunataca ricuj Natán-melec shuti eunuco runa causajuj huasiman chayanapimi carca. Josías runaca, indiman cushca carretacunatapashmi rupachirca.

12Jatun mandaj Josías runaca, Judá llactata jatun mandajcuna, Acaz runapaj huasi jahuapi rurashca altarcunatapash, Mandaj Diospaj huasi ishcandi patiocunapi Manasés rurachishca altarcunatapashmi urmachirca. Chaicunataca, ñutushpa apashpami, Cedrón shuti jatun larca yacupi shitagrirca.

13Shinallata, Jerusalén chimbapura lomacunapi tiyaj altarcunatapashmi, jatun mandajca tucuchishpa saquirca. Chai altarcunaca, olivo shuti loma uramanmi tiyanajurca. Chaicunataca, Israelcunata jatun mandaj Salomonmi rurachishca carca. Chai altarcunataca, Sidón pueblopi causajcunapaj Astoret shuti, Moab llactapi causajcunapaj Quemos shuti, Amón llactapi causajcunapaj Milcom shuti na ricunayai, rurashcalla dioscunamanmi rurachishca carca.

14Rurashcalla dioscunatapash, Asera shuti huarmi diosman rijchajcunatapashmi faquirca. Chaicuna tiyanajushca pushtucunapica, gentecunapaj tullucunatami jundachirca.

15Bet-el shuti pushtupi tiyaj altartapash, Nabat runapaj churi Jeroboam runa, lomapi rurachishpa, Israelcunata juchata rurachishcatapashmi chashnallata tucuchirca. Chai altartapash, lomapi tiyaj altarcunatapash faquishpa tucuchishpami, rupachishpa uchufata rurarca. Asera shuti huarmi diosman rijchajtapashmi rupachirca.

16Josías tigrashpa ricushpaca, huañushcacunata pambashca utujucunatami lomapi ricurca. Chai utujucunamanda tullucunata llujchigrichun cachashpami, chai altarcunata mapayachingapa, chaicunapi rupachirca. Chaicunataca, Taita Diospajta ruraj runaguman Mandaj Dios villashcashnami, tucuita rurarca.

17Chai jipami Josiasca:

“¿Chai jatun rumica, imata?” nijpi, chai pueblopi causajcunaca:

“Chaica, Judá llactamanda shamushca, Taita Diospaj runaguta pambashca utujumi. Paimi, Bet-el shuti pushtupi tiyaj altarta can cashna ruranataca villarca” ninajurcami.

18Shina nijpimi, Josiasca:

“Saquichilla, chai tullucunataca, pipash chaimandaca na anchuchinachu” nirca.

Chashnami, Juda llactamanda profetapaj tullucunatapash, Samaria llactamanda shamushca profetapaj tullucunatapash, chaipillata saquinajurca.

19Samaria llacta pueblocunapi tiyaj lomacunapi, huasicunatapashmi Josiasca anchuchirca. Chaicunata rurashpami, Israelcunata jatun mandajcunaca, Taita Diosta ninanda fiñachishca carca. Chaicunataca, Bet-el shuti pueblopi rurashcashnami rurarca.

20Chai jahuapash, lomacunapi tiyaj altarcunapi rupachishpa causaj sacerdotecunatapashmi, chai altarcunapillata huañuchirca. Chai huañushca runacunapaj tullucunatapash, chai altarcunapillatami rupachirca. Chai jipami Josiasca, Jerusalenman tigrarca.

Josías runa pascua micuita rurashcamanda(2 Crón. 35:1-25)

21Chai jipami, jatun mandaj Josiasca, tucui gentecunata cashna nishpa mandarca: “Ari ninajushpa quilcashca cai libropi nijushcashna, cangunata Mandaj Diosta jatunyachingapa, pascua punlla jatun micuita ruraichi” nishpami mandarca.

22Israelcunata, Juezcuna mandanajui punllacunapipash, shinallata, Israel llactata, Judá llactata, jatun mandajcuna mandanajui punllacunapipash, pascua punllapi jatun micuitaca na rurashcachu carca.

23Chai pascua punllapi jatun micuitaca, jatun mandaj Josías, chunga pusaj huatacunata mandajushpami, Mandaj Diosman, Jerusalenbi rurarca.

Judá llactapi causajcunata, Mandaj Diosca fiñashpa catishcamanda

24Josías runaca, yumbucunata, yachajcunata, terafín dioscunatapashmi tucuilla anchuchirca. Judá llactapi, Jerusalen pueblopi, na ricunayaicunataca, tucuillatami anchuchirca. Mandaj Diospaj huasipi, sacerdote Hilcías tarishca libropi quilcashcata pactachingapami, chashna rurarca.

25Paipaj pundapash, jipamambash, Josías runashna, Moisés mandashcapi nijushcashnalla, tucui shunguhuan, tucui almahuan, tucui ushaihuan, Mandaj Diosta cazuj runaca, maijan jatun mandajpash na tiyarcachu.

26Tucuita chashna rurajpipash, Judá llactapi causajcunahuanga, Mandaj Diosca, ninandapacha fiñarishpami catirca. Tucui na alicunata rurashpa, Manasés runa ninanda fiñachishcamandami, chashna tucurca.

27Shinamandami Mandaj Diosca, cashna nirca: “Judá llactapi causajcunataca, Israel llactapi causajcunata, Ñuca ñaupajmanda anchuchishcashnami anchuchisha. Ñuca agllashca cai Jerusalén pueblotapash, Ñuca shuti causana huasitapashmi, anchuchigrini” nircami.

Josías huañushcamanda(2 Crón. 35:20-27)

28Josías runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata quilcashca libropi tucuilla tiyajun?

29Chai punllacunapimi, Egipto llactata jatun mandaj Necao shuti Faraonga, Asiria llactata jatun mandajhuan macanajungapa, Éufrates shuti jatun yacu manñaman vichai shamurca. Chaimanmi jatun mandaj Josiasca, paihuan macanajungapa llujshirca. Ashtahuangarin Faraonga, Meguido shuti pambapi tuparishpami huañuchirca.

30Chashna huañuchijpimi, Josiaspajta rurajcunaca chai huañushcataca, shuj carretapi churashpa, Meguido pambamanda, Jerusalenman apamunajurca. Shina apamushpaca, paita pambana utujupillatami pambarca. Chai jipami, Judá llactapi causajcunaca, Josiaspaj churi Joacaz runata, aceiteta talishpa javinajurca. Chashna rurashpami, paipaj taitapaj randi, jatun mandaj cachun churanajurca.

Joacaz shuti runa mandajushcamandami anchuchi tucushca(2 Crón. 36:1-4)

31Joacaz shuti runaca, ishcai chunga quimsa huatata charishpa, mandai callarishpami, quimsa quillatalla Jerusalenbi mandajurca. Paipaj mamaca, Libna shuti pueblopi causajuj Jeremiaspaj ushi Hamutal shutimi carca.

32Joacaz runaca, paipaj ñaupa taitacuna tucui na alita rurashcashnami, Mandaj Diospaj ñaupajpica na alita rurajurca.

33Paitaca, Jerusalenbi ama ashtahuan mandachunmi, Necao shuti Faraonga, Hamat shuti llactapaj Ribla shuti pueblopi prezu churarca. Chai jipami, Judá llactapi causajcunataca, sucta chunga pusaj quintal culquita, quimsa chunga chuscu kilo curita cushpa causanajuchun mandarca.

34Chashna rurashpami, Necao shuti Faraonga, Josiaspaj churi, Eliaquim shuti runata, paipaj taitapaj randi mandachun churarca. Eliaquim runataca, Joacim shutitami shutichirca. Joacaz runataca, Egiptoman apajpimi, chaipi paica huañurca.

35Joacim shuti runaca, culquitapash, curitapashmi Faraonman cujurca. Alpacuna mashna culqui canata ricushpa cuchun, Faraón mandashcashnami paica cujurca. Chaita cungapaca, chai llactapi causaj gentecunapaj alpacuna mashna culqui canata ricushpami, culquita, curita, Necao shuti Faraonman cujurca.

Joacim shuti runa mandajushcamanda(2 Crón. 36:5-8)

36Joacim shuti runaca, ishcai chunga picha huatata charishpa, mandai callarishpami, chunga shuj huatata Jerusalenbi mandajurca. Paipaj mamaca, Ruma shuti pueblopi causaj Pedaías shuti runapaj ushi Zebuda shutimi carca.

37Paica, paipaj ñaupa taitacuna tucui na alita rurashcashnami, Mandaj Diospaj ñaupajpica na alita rurajurca.