JEREMÍAS 12 - Quichua Imbabura 2016

Taita Diospaj ñaupajpi, Jeremías llaquirishpa rimajushcamanda

1Mandaj Dioslla, Canga tucuita pactachij Diosmi capangui.

Candaca imata nitapash na ushapanichu.

Shina cajpipash caitallami ningapa munapani:

¿Imashpata canda na manllajcunara, tucuipi ali causanajun?

Canda na cazujcunarami, tucuita charishpa cushijunajun.

2Canmi, paicunataca, juyailla fucuj yurata tarpujshna churarcangui.

Ashtahuangarin paicunaca, shimillami Candaca alicachinajun.

Shina cashpapash na tucui shungu yarinajunllu.

3Mandaj Dioslla, ñucataca rijsihuanguimi.

Ima yuyaihuan ñuca, Canda catijujtapash yachahuanguimi.

Paicunataca, llamacunata huañuchingapa apajshna apapailla.

Paicunataca, huañuchina punlla chayajpi huañuchingapa charijupailla.

4¿Ima punllacamanshi ñucanchi alpacunapash jichushca, pambapi jihuacunapash chaquishca siringa?

Cai llactapi causajcuna na alita rurashcamandami animalcunapash, alasyu animalcunapash huañushpa tucurinajun.

Paicunaca: “Taita Diosca, ñucanchi causaitaca na ricungachu” nishpami, chashna ruranajurca.

5Taita Diosca cashnami nirca:

“Chaquilla calpajcunahuan pacta calpajushpallatami, ninanda shaijurcangui.

Caballocunahuan pacta calpaitacarin, ¿maitashi ushangui?

Cai llactapi ali causai tiyajpipash, manllaihuanmi purijurcangui.

Jordán yacu manñapi, yuracuna judashca ucupi cashpacarin, ¿imatashi rurangui?

6Cambaj huauquicunallata, cambaj taitapaj huasi ucupurallatami, candaca llaquichingapa jatarinajurca.

Paicunallatami, candaca caparishpa catinajurca.

Paicuna imata nishcatapash, na chasquinallachu cangui.

7Ñuca huasi ucupuracunataca saquircanimi.

Ñucapaj huasitapash saquishpami rircani.

Tucui ñuca imatalla juyashcacunataca, fiñajcunapaj maquipimi saquircani.

8Ñuca agllashca gentecunaca, sachapi causajuj leonshnami, Ñucataca ricunajun.

Ñucata fiñashpami, paicunaca leonshna huacanajurca.

Chaimandami, paicunataca na ricunayachini.

9Ñuca agllashca gentecunaca, juyailla plumacunata charij millai angashnami.

¿Nachu paitapash, shuj millai angacunaca muyunajun?

Sachapi causaj millai animalcuna, paicunata tucuchingapa, tucuilla tandanajushpa shamuichi.

10Ashtaca mandajcunami, Ñucapaj uva chagrataca sarushpa tucuchirca.

Ñucapaj juyailla alpataca, jichushca chaquishca pambatami saquishca.

11Chai alpataca, llaquinayaita tucuchishpami, jichushcata saquirca.

Chaipica, shuj runallapash ali yuyaitaca na charijpimi, chashna tucuchirca.

12Jichushca lomacunatami, llaquichij runacunaca shamurca.

Mandaj Dios Ñucami, cai alpapi causajcunataca, espadahuan tucuchigrini.

Chaipica, ali causaica na tiyangachu.

13Trigota tarpushpapash, cashatami tandachinajurca.

Paicunaman carashca alpapi causanajushpapash, imatallapash na charircachu.

Mandaj Dios Ñuca ninandapacha fiñarijpica, paicuna na alita rurashcamandami, ninanda pingai tucunajunga.

14Ñuca agllashca Israelcunaman carashca llactataca, chaipi quimiria llactacunapi causajcunami quichushca. Chaimandami Mandaj Dios Ñucaca, cashna nini: Paicunapaj llactamandaca llujchishpami cachasha. Shinallata Judá llactapi causajcunatapash, chashnallatami calpachisha.

15Paicunata llujchishpa cachashca jipami, ñucallata cutin paicunataca llaquisha. Shina llaquishpami paicunapaj alpaman, paicunapaj llactaman tigrachimusha.

16Chai quimiria llactacunapi causajcunaca, Baal shuti rurashcalla diosta mañashpa causanatami yachachirca. Shina cajpipash, cunanmandaca, Ñucapaj Shutita alicachishpa causajpica, Ñuca agllashca gentecunapaj chaupipi aliguta causachunmi saquisha.

17Ashtahuangarin, Ñucata na cazujpica, chai gentecunataca sapimanda llujchishpa shitajshnami tucuchisha” ninmi Mandaj Diosca.