1Mandaj Dioslla,
¿imashpata ñucamanda caruyapashcangui?
Ñucata ninanda llaquicunata apajui punllacunapica,
¿imashpata saquihuarcangui?
2Na alita ruraj runaca jariyashpami, huajcha runataca catiriyashpa llaquichijun.
Llaquichingapa pai yarijushcashnami, llaquichi tucunga.
3Na alita ruraj runaca, pai munashcata rurashpami cushijun.
Charingapalla munaj runatara alicachishpami, Mandaj Diostaca yangapi churan.
4Na alita ruraj runaca, yapa jariyashca cashpami, Taita Diostaca na mascan.
Paica, Taita Diostaca napacha yarishpa causanllu.
5Paica, tucui causaipimi na alitalla rurashpa causajun.
Can mandashca shimicunataca, napacha yarinllu.
Tucui paita fiñajcunatapash, yangapimi churan.
6Paipaj shungupica:
“Pipash na pandachihuangachu, ima llaquipash na japihuangachu” yajunmi.
7Paipaj shimimandaca, na alicachishpa rimana, umachina,
llullashpa llaquichina shimicunallami llujshijun.
Paipaj jallupash, rimashpa llaquichinahuan, na alitalla rimanahuan jundami.
8Uchilla puebloman chayana ñangunapimi, pacalla chapajun.
Pacalla chapashpami, alita ruraj runataca huañuchin.
Imata ruraitapash na ushaj gentecunata llaquichingapami chashna chapariyanajun.
9Utujumanda león chapajunshnami, pacalla chapanajun.
Huajcha runata llaquichingapami chapanajun.
Chai runataca, paipaj linllihuan japishpami llaquichin.
10Huajcha runaca, cumurishpa curparishpami japi tucun.
Na ali gentecunapaj maquipimi chashna llaquita apan.
11Paipaj shungupica:
“Taita Diosca cungashcami,
Paipaj ñavita quilparishca cashpami, imatapash na ricujunga” yajunmi.
12Mandaj Taita Dioslla,
na ali gentecunataca, Cambaj ushaihuan llaquichipayari.
Huajchacunataca ama cungapaichu.
13¿Imashpata na alita ruraj runaca,
Taita Diosta yangapi churan?
Paipaj shungupica:
“Diosca, imata ricunatapash na charinchu” yajurcami.
14Diosca, maijan imatalla rurajtapash,
rimashpa llaquichijtapash, chashnallata tigrachingapami ricuriajun.
Imatapash na rurai ushaj runaca, Candallami yariajun.
Taita mama illaj huahuacunataca, Canmi yanapangui.
15Na alitalla ruraj runapaj ushaitaca, canllata quichupayari.
Na ali runa, imatalla rurashpa llaquichishcataca, ricuriashpa tucuchipayari.
16Mandaj Diosca, causaita causaicaman Jatun Mandajmi.
Dios carashca llactamandaca, tucui na ali gentecunami llujchishpa cachai tucunga.
17Mandaj Dioslla,
na jariyashpa causajcuna mañajtaca uyaparcanguimi.
Paicunata shinllichishpami, paicuna mañajtapash uyaparcangui.
18Taita mama illaj huahuacunatapash,
llaquichi tucushpa causajcunatapash ricuriyapangui.
Huañuna aichayuj runa, ama ashtahuan llaquichishpa catijuchunmi, chashna rurana capangui.
Who We AreWhat We EelieveWhat We Do
2025 by iamachristian.org,Inc All rights reserved.
