DEUTERONOMIO 13 - Quichua Imbabura 2016

1Cangunapuramandaca: ‘Profeta cani nishpa, na cashpaca, muscuipi ricushcata villajmi cani nishpami’ pipash na rurai ushanallacunata, jatun manllarinacunata rurashpa ricuchinajunga.

2Chai villashcacuna pactajpimi: ‘Shuj dioscunata catishunchi, na rijsishca dioscunata alicachishunchi’ ninajunga.

3Shina nijpica, chai profetatapash, muscuipi ricushcata villajtapash na catinachu canguichi. Cangunata Mandaj Taita Diosllatami, Taita Diosta tucui shunguhuan, tucui causaipi juyajta, na juyajta yachangapa chai villajcunataca cachamunga.

4Cangunaca, Mandaj Taita Diostallami catina canguichi. Pai mandashcacunataca, manllaihuan cazushpami causana canguichi. Pai rimashcata uyashpami, Paita alicachishpa causana canguichi.

5Chai profetapash, na cashpaca muscuipi imata ricushpa villajpash huañuchi tucunami canga. Egipto llactapi gañan causajushcamanda llujchimuj, Mandaj Taita Diosta ama cazuchun yachachijushcamandami huañunga. Cangunata Mandaj Taita Dios mandashcata ama cazuchun yashpami chashna pandachijurca. Chai pandachijcunata huañuchishpami, cangunapurapi na ali tiyajtaca anchuchinguichi.

6Cangunapaj huauqui cashpa, churi cashpa, ushi cashpa, cambaj huarmillata cashpa, cambaj ali cumba runa cashpapash, candaca pacallami cashna ninga: ‘Cangunapash, cangunapaj taitacunapash, na rijsishca, shuj rurashcalla dioscunata alicachingapa jacuchi’ ningami.

7Shinallata: ‘Cai pueblopi cashpa, muyundi llactacunapi cashpa, caipilla cashpa, ashtahuan carupi cashpapash, cai alpa pachapi tiyaj dioscunataca alicachinami canchi’ ningami.

8Chaicunataca, uyaitapash na uyana canguichi, chasquitapash na chasquinachu canguichi. Paicunataca, llaquishpallapash na ricushpami, huañuchinamandaca na pacana canguichi.

9Ashtahuangarin paita huañuchingapa can callarijpimi, tucuilla gentecunapash paitaca huañuchinga.

10Egipto llactapi gañan causanajushcamanda llujchimuj, canda Mandaj Diosta ama catichun pandachingapa munashcamandami, chai runataca rumihuan huañuchina canguichi.

11Tucuilla Israel gentecuna chaita uyashpa, manllarishpa, ama cutinga na alita rurachunmi chashna rurana canguichi.

12Maijan pueblocunapi cashpapash, can causachun Mandaj Dios carashca llactacunapimi cashna rurashcacuna uyaringa.

13Chaipica, cangunapuramanda na alita yachachij, na ali runacunami cashna ninajunga: ‘Canguna na rijsishca, shuj dioscunapajta rurangapa jacuchi’ ninajungami.

14Chashna uyarijpica, shina cajta, na shina cajtapash alipacha tapushpa, mascashpami, na alitapacha rurashpa causajushcataca yachanguichi.

15Shina yachashpaca, chaipi causajcunataca, tucuillatami espadahuan huañuchina canguichi. Chaipi ima tiyashcatapash, tucuillami tucuchina canguichi. Shinallata, paicuna charishca animalcunatapash tucuillami espadahuan huañuchina canguichi.

16Chaipi ima alicunata charishcatapash, chaupi plazapi churashpami, tucuilla pueblondi rupachina canguichi. Chaicunataca, canda Mandaj Taita Diosman cushpa rupachijshnami tucuillata rupachina canguichi. Chai pueblotaca, pipash cutinga na shayachijpimi, causaita causaicaman rumicunalla siringa.

17Chaipi ima charishcacunataca, Mandaj Diosllata tucuchingapa shicanyachishca cashcamandami, imatallapash na japina canguichi. Chaicunata na japijpillami, Mandaj Diosca cangunataca na fiñashpa, ñaupa taitacunaman carashami nishcataca, ashtahuan mirachishpa pactachinga.

18Canda Mandaj Taita Dios rimashcata cazushpami, cunan ñuca yachachishpa mandashcatapash pactachina canguichi. Mandaj Taita Diospaj ñaupajpica, aliguta rurashpa pactachinatami yarina canguichi.