2 CRÓNICAS 24 - Quichua Imbabura 2016

Judá llactata, Joás mandajushcamanda(2 Rey. 12:1-21)

1Joás shuti runaca canchis huatata charishpami mandai callarirca. Paica, chuscu chunga huatatami, Jerusalenbi mandajurca. Paipaj mamaca, Beerseba pueblomanda Sibia shutimi carca.

2Joás runaca, sacerdote Joiada causajui punllacunapimi, Mandaj Diospaj ñaupajpica, alitalla rurashpa causajurca.

3Sacerdote Joiada, Joás runata ishcai huarmicunahuan cazarachijpimi, paica chai huarmicunahuanga, churicunata, ushicunata charirca.

4Chai jipami, Joás runaca, Mandaj Diospaj huasita cutin alichinata yarijurca.

5Shina cashpami, sacerdotecunata, levitacunata tandachishpa, cashna nirca: “Judá llactapi tiyaj pueblocunaman rishpa, Israel gentecuna, huatapi cuna ofrendata, Taita Diospaj huasita alichingapa tandachigrichi” nirca. Shina mandajpipash levitacunaca, na ucha pactachircachu.

6Chaimandami jatun mandajca, sacerdotecunata mandaj Joiada runata cayashpa, cashna nirca: “Judá llactamanda, Jerusalén pueblomanda, Dios yachachishca shimicunata alichina jatun carpata rurangapa, Mandaj Diospajta ruraj Moisés ofrendacunata tandachinajuchun mandashcashnaca, ¿imashpata levitacunataca na uchalla apamugrichun mandarcangui?” nircami.

7Diosta na manllaj, Atalía huarmipash, paipaj churicunapashmi, Taita Diospaj huasipi imalla tiyashcacunataca tucuilla tucuchishca carca. Shinallata, Mandaj Diospajlla shicanyachishca imalla tiyashcacunatapash, rurashcalla dioscunamanmi tucuillata apashca carca.

8Shinamandami, jatun mandajca, shuj cajonda rurachishpa, chaitaca Mandaj Diospaj huasiman yaicuna pungupi churarca.

9Chai jipaca, jichushca pambapi cashpa, Taita Diospajta ruraj Moisés, ofrendata cuchun Israelcunata mandashcashnami, Judá llactapi, Jerusalenbi ofrendata tandachingapa villachun cacharca.

10Chaita villajpica, cati mandajcunapash, tucui gentecunapashmi cushijushpa, Diosman imatalla caranataca, chai cajonbi jundangacaman churanajurca.

11Jatun mandaj imatalla rurashcata quilcaj runapajman chai cajonda levitacuna apana punlla chayajpica, ashtaca culqui tiyajta ricushpami, jatun mandajpaj quilcaj runapash, sacerdotecunata mandajpash shamunajurca. Shina shamushpami, chai cajonda apashpaca, culquita tucuillata llujchishpa, chai cajondaca cutin chaipillata churanajurca. Punllandi shina rurashpami, ashtaca culquita tandachinajurca.

12Chai culquitaca, jatun mandajhuan, sacerdote Joiadahuanmi, Mandaj Diospaj huasita alichijcunata mandajcunaman cunajurca. Paicunaca, rumita juyaillata rurajcunata, caspicunahuan imatalla rurajcunata, jirruta, bronceta imatalla ruranata yachajcunata apamushpami, Diospaj huasitaca alichinajurca.

13Imatalla ruranata yachajcunami, paicunapaj maquihuan tucuita rurashpa, Diospaj huasitaca cutin alichishpa tucuchirca. Taita Diospaj huasitaca, punda imashna rurashca cashcata cutin alichishpami, alitapacha rurashpa saquirca.

14Ña tucuillata alichijpi puchushca culquitaca, jatun mandajpajman, sacerdote Joiadapajmanmi apamunajurca. Chai culquihuanga, Mandaj Diospaj huasipi imalla tiyanacunatami rurachinajurca. Diospaj huasipi Diospajta rurangapaca, cutana rumicunata, cucharacunata, vasocunatami, curimanda, culquimanda rurachinajurca. Mandaj Diospaj huasipica, sacerdote Joiada causajui tucui punllacunapimi, animalcunata Diosman cushpa huañuchishpa, tucuillata rupachinajurca.

15Sacerdote Joiadaca, patsaj quimsa chunga huatata charishpa, ña rucugu cashpami huañurca.

16Pai huañujpica, Davidpaj pueblopimi, jatun mandajcunata pambashcapi pambarca. Paitaca, Israelcunamambash, Taita Diosmambash, Diospaj huasipipash alita rurashcamandami, chaipi pambarca.

17Sacerdote Joiada runa huañushca jipa, Judá llactata cati mandajcunaca, jatun mandajpajman shamushpa, cazushcata ricuchinajujpimi, paicuna imata mandashcata uyarca.

18Shinamandami, paicunapaj ñaupa taitacunata Mandaj Taita Diospaj huasitaca jichushpa, Asera shuti huarmi diosman rijchajcunata, rurashcalla dioscunatara catinajurca. Chashna juchata rurashcamandami Taita Diosca, Judá llactapi causajcunahuan, Jerusalenbi causajcunahuanga ninandapacha fiñarirca.

19Shina fiñarishpapash, Mandaj Diosca, Paipajman tigrarichun munashpa, profetacunata cachajpimi, chai profetacunaca shinllita tacurinajurca. Ashtahuangarin paicunaca, na uyanayachircachu.

20Shinamandami, sacerdote Joiadapaj churi Zacarías runapajman, Taita Diospaj Espíritu shamurca. Chaimandami paica, tucuicunata ricunalla shuj pushtupi shayarishpa, cashna nijurca: “Taita Diosca, cashnami nin: ‘¿Imashpata Mandaj Dios Ñuca mandashcacunataca na cazunguichi? Chashna na cazushcamandaca, imapash alica na shamungachu. Mandaj Dios Ñucata saquishcamandaca, cangunatapashmi jichushpa saquisha’ ninmi” nijurcami.

21Ashtahuangarin gentecunaca paita huañuchingapa pacalla parlarishpami, jatun mandaj mandajpi, Mandaj Diospaj huasi patiopi Zacariastaca, rumicunahuan huañuchirca.

22Chashnami jatun mandaj Joás runaca, Zacariaspaj taita, sacerdote Joiada alita paiman rurashcataca na yarishpa huañuchirca. Zacarías huañugrijushpaca, cashnami nirca: “Cashna rurashcamandaca, Mandaj Diosmi llaquichinga” nircami.

23Shuj huata jipami, Siria llactamanda runacunaca, jatun mandaj Joás runahuan macanajungapa vichai shamurca. Judá llactaman, Jerusalenman shamushpami, cati mandajcunataca tucuillata huañuchirca. Shinallata, chaipi imalla tiyashcacunata quichushpami, Damasco pueblota jatun mandajpajman cachanajurca.

24Siria llactamanda ashalla runacuna shamushpami, Judá llactamanda ashtaca runacunataca, Mandaj Diosllata, paicunapaj maquipi churajpi misharca. Paicunapaj ñaupa taitacunata Mandaj Taita Diosta saquishcamandami, chashna rurarca. Shinami Joás runataca, ninanda llaquichinajurca.

25Siria llactamanda runacunaca, Joás runataca ninanda chugrichishpami, ña huañunallata saquishpa rishca carca. Paitaca, sacerdote Joiadapaj churicunata huañuchishcamandami, paipajta rurajcunallata pacalla parlarishpa, paipaj camapillata huañuchirca. Shina huañujpimi paitaca, Davidpaj pueblopi pambarca. Ashtahuangarin jatun mandajcunata pambashca utujupica, na pambarcachu.

26Paita huañuchijcunaca: Amón llactamanda Simeat shuti runapaj churi Zabad, Moab llactamanda Simrit shuti runapaj churi Jozabad shuti runacunami carca.

27Joás shuti runapaj churicunamanda, ashtaca impuestota tandachishcamanda, Mandaj Diospaj huasita cutin alichishcamandapash, jatun mandajcuna imatalla rurashcacunata quilcashca libropimi tiyajun. Joás runapaj randica, Amasías shuti paipaj churimi mandajurca.