LEVÍTICO 20 - Quichua Imbabura 2016

Na alita rurajcunata llaquichinamanda

1Mandaj Diosca, Moisestaca cashnami nijurca:

2“Israelcunataca cashna ningui: ‘Israelpuramanda cashpa, shuj llactamanda shamushpa Israel llactapi causajuj cashpapash, paipaj huahuata, Moloc shuti diosman carashpaca, huañungapachami. Paitaca, llacta gentellatami, rumicunahuan huañuchinga.

3Shinallata, chai runataca ninandapacha fiñashpami, Israelpuramandaca anchuchisha. Moloc shuti rurashcalla diosman, paipaj huahuata carashpa, Ñucapajlla huasita mapayachishcamanda, shinallata jucha illaj Ñuca shutita yangapi churashcamandami, chashna rurasha.

4Moloc shuti diosman huahuata carashca runata ama huañuchingapa, cai llactapi causaj gentecuna na ricujshnalla purinajujpipash,

5Ñucami, chai runatapash, paipaj ayllutapash ninanda fiñashpa, Israelpuramanda anchuchisha. Shinallata, chai runashnallata na alita rurashpa, Moloc shuti dioshuan huainayanshna pandarijcunatapashmi chashna anchuchisha.

6Shinallata yumbucunata, yachajcunata uyashpa, paicunata catishpa huainayanshna pandarijcunataca, ninanda fiñashpami Israelpuramanda anchuchisha.

7Cangunaca, Ñucapajlla tucushpami, jucha illaj cana canguichi. Ñucami cangunata Mandaj Taita Dios cani.

8Ñuca mandashca shimicunataca, cazushpa pactachinami canguichi. Mandaj Dios Ñucami cangunataca, jucha illaj cachun agllarcani.

9Maijan cashpapash paipaj taitata, paipaj mamata, “ima llaquipash japishpaca alimi canman” nishpaca huañungapachami. Paipaj taitata, paipaj mamata, chashna nishcamandami, paimandallata jatun llaquita apashpa huañunga.

10Maijan runapash, shujpaj huarmihuan pacta puñushpaca, ishcandillatami huañunga.

11Maijan cashpapash, paipaj taitapaj huarmihuan pacta puñushpaca, taitapaj huarmi cashcamandami jatun na alita ruran. Chaimandami ishcandillata huañuchi tucunga. Paicunamandallatami, jatun llaquita apashpa huañunga.

12Maijan cashpapash paipaj jachunhuan pacta puñushpaca, ishcandimi huañuchi tucunga. Paicuna jatun na alita rurashcamandami, paicunamandallata jatun llaquita apashpa huañunga.

13Maijan cashpapash, jaripurallata pacta puñushpaca, jatun na alitapacha rurashcamandami ishcandillata huañuchi tucunga. Paicunamandallatami jatun llaquita apashpa huañuchi tucunga.

14Maijan cashpapash paipaj huarmipaj mamata, paipaj huarmi cachun japishpaca, na alitapachami ruran. Chaimandami, cangunapurapi chashna na alicuna ama tiyachun, quimsandita rupachina canga.

15Maijan cashpapash, shuj animalhuan pacta puñushpaca huañungapachami. Chai animaltapashmi huañuchina canga.

16Maijan huarmipash, shuj animalhuan pacta puñushca cajpica, ishcanditami huañuchinapacha canga. Paicunamandallatami, ninan llaquita apashpa huañuchi tucunga.

17Maijan cashpapash, taitamanda cashpa, mamamanda cashpapash, paipaj panihuanllata pacta puñushpaca na alitapachami ruran. Shinamandami, paicunaca, tucui gentecunapaj ñaupajpi huañuchi tucunga. Paipaj panihuanllata pacta puñushpa juchata rurashcamandami, ninan llaquita apanga.

18Maijan cashpapash, quilla nanai shamujuj huarmihuan pacta puñushpaca, ishcandillatami na alitapacha rurashca ricurin. Chaimandami, ishcandillata paicunapaj llactamanda anchuchi tucunga.

19Cambaj mamapaj ñañahuan cashpa, cambaj taitapaj panihuan cashpapash, napacha pacta puñunachu cangui. Paipaj aylluhuanllata pacta puñushpa na alita rurashcamandami, jatun llaquita apanajunga.

20Maijan cashpapash taitapaj huauquipaj huarmihuan pacta puñushpaca, taitapaj huauquitami jatun na alita rurashpa ninanda llaquichishca. Shinamandami, chai juchata rurashcamandaca, huahuacunata nara charishpallata huañuchi tucunga.

21Maijan cashpapash huauquipaj huarmita, paipaj huarmi cachun japishpaca, na alitapachami ruran. Shina rurashpaca, paipaj huauquitallata jatun na alita rurashpami ninanda llaquichijun. Chaimandami, huahuacunata na charishpallata ishcandillata huañunga.

22Pactachinajuchun Ñuca cushca shimicunata, mandashcacunata pactachinami canguichi. Na pactachijpica, canguna causachun Ñuca carashca llactamandaca, shungu tigrachijshnami llujchishpa cachanga.

23Canguna causagrina llactacunapi causanajuj gentecuna na alitalla ruranajushcataca na catinachu canguichi. Paicunataca, jatun na alicunata ruranajushcamandami, millanayachishpa calpachigrini.

24Ashtahuangarin cangunataca, Ñucami cashna nircani: Cangunami, lechepash, balun mishquipash ashtacapacha tiyaj paicunapaj llactataca, Ñucallata cangunapaj cachun carajpi japinguichi.

Cangunata Mandaj Taita Dios Ñucami, cangunataca shuj gentecunamanda shicanyachircani.

25Chaimandami animalcunataca, maijanlla mapa cajta, na mapa cajtapash shicanyachina canguichi. Shinallata alasyu animalcunatapashmi, maijanlla mapa cajta, na mapa cajtapash shicanyachina canguichi. Mapami nishpa Ñuca shicanyachishca animalcunataca, alasyu cajpipash, alpata llucashpa purij cajpipash, napacha micushpa mapayanachu canguichi.

26Cangunata Mandaj Dios Ñucapash jucha illaj cajpimi, cangunapash jucha illaj causana canguichi. Cangunataca, Ñucapajlla causachunmi shuj gentecunamanda shicanyachircani.

27Jari cashpa, huarmi cashpapash, huañushcacunata cayashpa rimashpa causajcunapash, bruju tucushpa causajcunapash, rumicunahuanmi huañuchi tucunga. Paicunamandallatami, chashna llaquita apashpa huañunajunga’ nishpa villai” nijurcami.