1Mandaj Diostaca, tucui punllacunapimi alicachijusha.
Ñuca shimihuanga, Paitaca alicachijushallami.
2Mandaj Dioshuan causashpami cushijusha.
Na jariyashpa causajcunaca uyashpa cushijungami.
3Mandaj Diostaca, tandanajushpa jatunyachishunchi.
Paipaj shutitaca, shujllashnalla tucushpa alicachishunchi.
4Mandaj Diosta mañajpimi, Paica uyahuarca.
Paica, tucui llaquimandami llujchihuarca.
5Diosta cazujcunaca, ninandami cushijurca.
Paicunaca, na pingaichi tucurcachu.
6Imatapash na charij ñuca mañajujtaca, Mandaj Diosca uyahuarcami.
Tucui llaquimandami cacharichihuarca.
7Mandaj Diosta manllajcunataca,
Diospaj angelmi, paicunapaj muyundipi ricushpa huacaichijun.
8Mandaj Dios juyaj cashcataca, cangunallatami ricuna canguichi.
Diostalla yariashpa causaj runaca, ninandami cushijun.
9Mandaj Diospajlla causajcunaca, Paita manllashpa causaichiyari.
Paita manllashpa causajcunapajca, imapash na illangachu.
10Huahua leongunaca, yarjachishpami huacanajun.
Ashtahuangarin, Mandaj Diosta cazujcunapaca, imapash na illangachu.
11Huahuacuna, ñucata uyangapa shamuichi.
Mandaj Diosta manllashpa causanatami yachachisha.
12¿Pita paipaj causaita juyan?
¿Pita unai punllacunata cushijushpa causangapa munan?
13Cambaj jalluhuan na alita rimanamandaca, jarcarinami cangui.
Cambaj shimihuan umachinatapash jarcarinami cangui.
14Na alita ruranamandaca anchurishpami, alitalla rurana cangui.
Ali causaita mascashpa, chaitalla catingui.
15Mandaj Diosca, alitalla rurajcunatami ricuriajun.
Paicuna caparishpa mañanajujtaca, aligutapachami uyariyajun.
16Mandaj Diosca, na alita rurajcunatami llaquichinga.
Paicunataca, pipash ama ashtahuan yarichunmi, cai pachamanda chingachinga.
17Alitalla rurajcuna caparishpa mañanajujta,
Mandaj Dios uyashpami, tucui llaquimanda cacharichijun.
18Mandaj Diosca, ninan llaquihuan causajcunahuan pajtami purijun.
Shungupi ninanda llaquirishpa causajcunatami quishpichijun.
19Alitalla rurashpa causajtapash, ashtaca llaquicunami japin.
Ashtahuangarin, tucui chai llaquicunamandaca, Mandaj Diosmi cacharichinga.
20Tucui paipaj tullucunatami Diosca ricujun.
Tullucunaca, shujllapash na faquiringachu.
21Na alita rurajtaca, chai na alita rurashcallatami huañuchinga.
Alitalla ruraj runata millanayachij runacunaca, llaquichi tucungapachami.
22Mandaj Diospajta rurajcunataca, Paillatami quishpichinga.
Paita yariashpa causajcunaca, napacha llaquichi tucungachu.
Who We AreWhat We EelieveWhat We Do
2025 by iamachristian.org,Inc All rights reserved.