Psalms 145 - Quichua Imbabura 2016

Taita Diostaca juyaj cajpi, ninan ushaita charijpimi alicachishcaDiosta alicachingapa, David rurashca Salmomi.

1Ñuca Taita Dioslla,

ñucata Jatun Mandajlla,

Candallami jatunyachisha.

Cambaj shutitaca, causaita causaicamanmi alicachijusha.

2Punllandimi, Candaca alicachijusha.

Cambaj shutitaca, causaita causaicamanmi alicachijusha.

3Mandaj Diosca jatumbacha cajpimi, ninandapacha alicachina canchi.

Paipaj ninan ushaitaca, pipash na yachai ushanallami.

4Can imatalla rurashcacunataca, mirai miraicunami yarishpa cushijunajunga.

Cambaj ninan ushaihuan rurashcacunatami villanajunga.

5Juyaillapacha Cambaj ninan ushaitami villanajunga.

Juyaillacunata Can rurashcatami, yarijusha.

6Runacunaca, ninan ushaihuan, jatun manllarinacunata Can rurashcatami villanajunga.

Ñucapash, Cambaj ninan ushaimandami villajusha.

7Cambaj ninan juyaita yarishpami villanajunga.

Can alitalla ruraj cajpimi, candanajunga.

8Mandaj Diosca, ninanda llaquij, ninanda juyaj Diosmi.

Na ñapash fiñarij, ninanda juyaj Diosmi.

9Mandaj Diosca tucuicunapaj ali Diosmi.

Tucui Pai rurashcacunataca, juyashpami charijun.

10Mandaj Dioslla,

tucui Can rurashcacunaca ninanda alicachinajuchun.

Cambajlla causajcunapash, Canda alicachinajuchun.

11Can mandajuj llactaca, punchapamba cajta villanajuchun.

Cambaj ninan ushaimandapash parlanajuchun.

12Ninan ushaihuan Can rurashcacunata,

huañuna aichayuj runacuna yachanajuchunmi villanajunga.

Can mandajuj llactaca, punchapamba juyaillagupacha cajtami yachanajunga.

13Can mandajuj llactaca, causaita causaicamanmi canga.

Can mandanaca, mirai miraicunacamanmi canga.

14Pandarishcacunataca, Mandaj Diosmi jatarichijun.

Llaquichi tucushpa causajcunatapash, Paimi yanapajun.

15Tucuicunami, Candalla chapariyanajun.

Paicuna micuchumbash, carana punllapimi carangui.

16Na mitsashpami imagutapash carangui.

Causaita charijcunatapash, tucuicunatami ninanda bendiciajungui.

17Mandaj Diosca, tucui imata rurashpapash, alitallami rurajun.

Tucui imata cashpapash, juyaimandami rurajun.

18Mandaj Diosca, Paita mañajcunata yanapangapaca, pajtami causajun.

Tucui shunguhuan mañajcunata uyangapami chashna causajun.

19Paita manllajcuna, imata munashcataca pactachingami.

Paicuna ninanda mañashcatapash, uyashpa quishpichingami.

20Mandaj Diosca, Paita juyajcunataca tucuicunatami huacaichijun.

Ashtahuangarin, Paita na manllajcunataca, tucuchingapachami.

21Ñuca shimica, Mandaj Diosta alicachinatami villajunga.

Paipaj jucha illaj shutitaca, causaita causaicamanmi tucuicuna alicachinajuchun.