ISAÍAS 32 - Quichua Imbabura 2016

Alitalla Ruraj Jatun Mandaj tiyana cashcamanda

1Jipa punllacunapica, ali cashcatalla ruraj, Jatun mandajmi mandanga.

Shinallata ali ricushpa cati mandajcunapash, tiyangami.

2Chai Jatun mandajmi, tucui llaquicunamanda quishpichinga.

Chaquishca pambapi yacu llujshishpa rijujshnami canga.

Ninan rupaipi llandushpa chiriyachij rumishnami canga.

3Paita ricunataca na shaijungachu.

Imata villajujta uyanatapash na shaijungachu.

4Shinlli shungu runacunapash, aligutami yachajunga.

Rimaita na ushajcunapash, alimi rimanajunga.

5Mitsa runataca, mitsa runami cangui, nishpami, chai punllapipash cayanga.

Llulla runatapash, llulla runami cangui ningami.

6Na ali gentecunaca, na alitallami rimanajunga.

Paipaj shungupipash, na alita ruranatallami yarinajunga.

Mandaj Diostapash, na cazushpami asinajunga.

Huajchacunatapash, na llaquishpami, yacunayachishpa purinajujta ricushpapash, na caranajun.

7Umashpa purij runaca, imashna urmachinatami yarishpa purijun.

Imapipash umachingapami, na yachajushca runacunataca, llulla shimicunahuan pandachijun.

Mandajcunahuan tandanajushpami, huajchacunataca ninanda llaquichijun.

8Ashtahuangarin imagutapash na mitsashpa caraj runaca, na mitsashpa caranatami yachan.

Shinamandami, paica alicachi tucunga.

Jerusalenbi causaj huarmicunata rimashcamanda

9Yanga causangapa munaj huarmicuna, ñuca rimashcata ali uyaichi.

Imatapash rurangapa na munaj huarmicuna, ñuca yachachishcata uyaichi.

10Caimanda huata jipaca, ninan llaquicunatami japigringuichi.

¡Yuyai illaj huarmicunalla! Uva fucushcata, pallanaca na ashtahuan tiyangachu.

11¡Yanga causangapa munaj huarmicunalla!, ninanda manllarichi.

¡Yuyai illaj huarmicunalla! ali yuyaita japichi.

Cangunapaj churajunata anchuchishpa, cañamuta churajuichi.

12Llaqui punllacuna chayamujpimi, uva chagrata yarishpa,

cangunapaj maquita shungupi churashpa huacanguichi.

13Ñuca agllashca gentecunapaj pueblopica, casha yuracuna, jihuacunami viñanga.

Cushijushpa causana pueblo huasicunapimi, jihuacunaca chashna viñanajunga.

14Mandashpa tiyana, huasicunapash jichushcami saquiringa.

Pueblopi causanajun, gentecunapash tucuringami.

Chapashpa tiyana torrecunapash, sacha burrucuna causana utujuman,

huagra huanucunata jundachina utujumanmi tigranga.

15Jahua pachamanda Espirituta, cai pachaman cachamungacamanmi chashna canga.

Chai punllapica, chaquishca alpacunapash ali alpamanmi tigranga.

Alpacuna ali tucujpimi, juyailla quirucuna viñashpa jundanga.

16Jichushca pambacunapica, ima llaquipash illangami.

Chashna tucujpimi, aliguta tarpushpa, tucui alita rurana tiyanga.

17Aliguta rurashpa causajpimi, cushijushpa causanaca tiyanga.

Ali causajpica, samanapash, llaquicuna illajpi cushijunapash tiyangami.

18Ñuca agllashca gentecunaca, cushijushpa causana llactapimi causanajunga.

Pipash na llaquichi ushanalla huasipimi, samashpa causanajunga.

19Rundu tamiapash, urcu alpacunatami llaquichinga.

Pueblopi causajcunapash, jatun llaquitami apanga.

20Yacu manñapi tarpujcunapash,

huagracunata, burrucunata cacharishpa michijcunapash, cushijunami canguichi.