Psalms 56 - Quichua Imbabura 2016

Taita Diosta yariashpa mañashcamandaGat shuti pueblopi, filisteocuna japishpa huañuchishun ninajushca jipa, carupi llaquilla, upalla purijuj palomagu nishpa, Mictam taquipi, candajcunata mandaj candachijuchun, David rurashca Salmomi.(1 Sam. 21:13-15)

1Taita Dioslla,

ñucata llaquihuayari.

Gentecunaca, huañuchigrihuanmari.

Punllandimari llaquichinajuhuan.

2Ñucata fiñajcunaca, punllandimari llaquichinajuhuan.

Ñucataca, ninanda jariyashpami, tucuilla tandanajushpa llaquichinajun.

3Chashna llaquichinajui punllapica,

Candallami yariajuni.

4Taita Dioslla,

Cambaj shimita yarishpami, ninanda alicachini.

Taita Diosta yariajlla causajushpami, na manllasha.

Ñucataca ¿Pipash llaquichi ushahuangachu?

5Punllandimi, ñucataca na alicachishpa llaquichinajun.

Paicunaca, ñucata llaquichinatallami yarinajun.

6Tandanajushpami, pacalla chapariyanajun.

Ñuca maita rijtapashmi chapariyanajun.

Huañuchingapa chapajcunashnami shuyanajun.

7Taita Dioslla,

jatun na alita rurashcamandaca llaquichipayari.

Chai gentecunataca, ninanda fiñarishpa tucuchipayari.

8Ñuca pacajushpa purijushcataca yachanguimi.

Ñuca viquita jichashcataca, ama cungapanguichu.

Chaicunaca, ¿nachu cambaj libropi quilcashca tiyajun?

9Canda ñuca mañajui punllapica,

ñucata fiñajcunaca, pacajushpami calpanga.

Taita Dios, ñucahuan cajpimi chashna tucunga.

10Taita Dioslla,

Cambaj shimita yarishpami, ninanda alicachini.

Mandaj Dios rimashca Shimitami alicachisha.

11Taita Diosta yariashpa causashpami na manllasha.

¿Pipash llaquichi ushahuangachu?

12Taita Dioslla,

ñuca imata Canman rurasha nishcatapash pactachipashami.

Ñucaca Candallami alicachisha.

13Canmi, huañunamanda quishpichihuarcangui.

Urmagrijujpipash charihuarcanguimi.

Can Taita Diospaj ñaupajpi causachun,

michapi causajcunahuan purichunmi, chashna quishpichihuarcangui.