1Siria llactata jatun mandaj Ben-adad shuti runaca, tucuilla paipaj macanajuj runacunata tandachishpami, quimsa chunga ishcai jatun mandajcunatapash paicunapaj caballocunandi, carretacunandi tandachirca. Chai jipami, Samaria puebloman vichai rishpa, chai pueblota muyundi chaupipi churashpa, chaipi causajcunahuan macanajurca.
2Ben-adad runaca, Israel llactata jatun mandaj Acab runa causajuj pueblomanmi, cashna nichun villajcunata cacharca:
3“Ben-adad runaca, cashnami nin: ‘Cambaj culquipash, curipash ñucapajmi. Cambaj huarmicunapash, juyailla cambaj churicunapash ñucapajmi’ ninmi” nichunmi cacharca.
4Shina nijpimi, Israel llactata jatun mandajca, cashna nishpa tigrachirca: “Can jatun mandaj ñucata mandaj nishcashnallata, ñucapash, ñuca imalla charishcacunapash cambajmi canchi” nircami.
5Chai villaj runacunaca, Acab runapajman cutin tigramushpami cashna ninajurca: “Ben-adad runaca, cashnami nirca: ‘Cambaj culquitapash, curitapash, cambaj huarmicunatapash, churicunatapash ñucaman cuhuai nichunga, ñami cacharcani.
6Ashtahuangarin, shinallata caya punllallatami, ñucapajta rurajcunata cambajman cachamusha. Paicunami cambaj huasipi, cambajta rurajcunapaj huasicunapi imalla tiyashcacunata ricungapa yaicunga. Paicunaca, tucui ima juyaillagucunata can charishcatami apamunajunga’ ninmi” ninajurcami.
7Shina nijpimi, Israel llactata jatun mandajca, chai llactata mandaj rucucunata cayashpa, cashna nirca:
“Cunanga, cai runaca ñucata llaquichinatallami mascajun. Chaitaca, cangunallata ali ricuichi. Ñuca huarmicunata, ñuca churicunata, ñuca charishca culquita, curita cuchun nishpami, ñucapajman cachamushca. Chaitaca cushallami nircanimi” nirca.
8Shina nijpimi tucui mandaj rucucunapash, tucui gentecunapash cashna ninajurca:
“Paitaca ama cazuichu. Pai imatalla mañashcatapash, ama cunguichu” ninajurcami.
9Shina nijpimi Acab runaca, Ben-adad runapaj randi parlajcunaman cashna nishpa tigrachirca:
“Ñucata jatun mandajtaca, cashna nigrichi: ‘Cambajta ruraj ñucata punda mandashcataca ari nircanimi. Shina cajpipash cunan cai jipa mandashcataca, na rurashachu’ ninmi nigrichi” nircami.
Shina nijpimi, jatun mandajpaj villajcunaca chashna villagrinajurca.
10Chaimandami Ben-adad runaca, Acab runaman cashna nichun cutin cacharca: “Cai Samaria puebloca, ñucata catimuj cai tucui macanajuj runacunapaca, maqui junda alpata apashpa ringapallapash na pactangachu. Na chashna rurajpica, dioscunapash ninandapacha llaquichihuachun” nichunmi cacharca.
11Shina nijpimi Israel llactata jatun mandajca, cashna nishpa tigrachirca: “Narapash macanajuiman llujshishpallata, ña macanajuita mishashcashnaca, ama jariyajuichu ninmi nigrichi” nishpami cacharca.
12Ben-adad runaca, chaishuj jatun mandajcunahuan carpacunapi, ufiashpa tiyajushpami, paiman chashna villajpi yacharca. Chaita yachashpami, paipajta rurajcunataca: “Macanajuiman ringapa alichirichi” nishpa mandarca. Shina mandajpimi paicunaca, Samaria llactapi causajcunahuan macanajugringapa alichirinajurca.
13Shina cajpimi, shuj profeta, Israel llactata jatun mandaj Acab runapajman shamushpa, cashna nirca:
“Mandaj Diosca, cashnami nin: ‘¿Chai tucui tandanajushca gentecunata ricurcanguichu? Mandaj Dios cajta can rijsichunmi, cunanga paicunataca cambaj maquipi churagrini’ ninmi” nircami.
14Shina villajpimi Acab runaca, cashna tapurca:
“¿Paicunataca, pihuanshi ñuca maquipi japichinga?” nijpimi chai profetaca, cashna nirca:
“Cambaj cati mandajcunapajta rurajcunami, macanajushpa mishanga, ninmi Mandaj Diosca” nirca.
Shina nijpimi, Acab runaca:
“¿Maijanshi macanajuitaca callaringa?” nishpa tapujpi, chai profetaca:
“Canmi callarina cangui” nirca.
15Shina nijpimi Acab runaca, llactacunata cati mandajcunapajta rurajcunataca, ishcai patsaj quimsa chunga ishcai runacunata cayashpa tandachirca. Chai jipami, tucuilla shuj gentecunatapash, tucui Israelcunatapash cayashpa tandachirca. Paicunaca, canchis huaranga runacunami carca.
16Chaupi punllami paicunaca, macanajuiman llujshirca. Ben-adad runaca, paita yanapangapa shamushca quimsa chunga ishcai jatun mandajcunahuanmi, carpacunapi ufiashpa machajurca.
17Chai macanajuipica, llactacunata cati mandajcunapajta rurajcunarami, punda llujshinajurca. Ben-adad runa chapachun cachashcacuna chaita ricushpami: “Samaria pueblomanda runacuna llujshimushcami” nishpa villanajurca.
18Chaita villajpimi Ben-adad runaca, cashna nirca: “Na macanajuna yuyaihuan shamushca cajpipash, na cashpaca, macanajungapa shamushca cajpipash, causajta japinguichilla” nishpami cacharca.
19Samaria pueblomandaca, llactacunata cati mandajcunapajta rurajcunami ñaupashpa llujshimurca. Paicunata catishpami, macanajuj runacunapash ashtacapacha llujshimunajurca.
20Paicunahuan macanajungapa shamujcunataca, tucuicunatami huañuchinajurca. Shinallata, Siria llactamanda runacuna pacajungapa calpanajujpica, Israelcunaca catishpami rinajurca. Siria llactata jatun mandaj Ben-adad runaca, caballopi tiyarishpami, caballopi tiyarij huaquin macanajuj runacunandi pacajushpa calparca.
21Chashna cajpipash, Israel llactata jatun mandajca catishpa rishpami, caballocunapi tiyarishpa macanajuj Siria llactamanda runacunatapash, carretacunatapash ashtacatapacha huañuchishpa tucuchijurca.
22Chai jipami, profetaca, Israel llactata jatun mandajpajman shamushpa cashna nirca:
“Caimanda rishpaca, ashtahuan shinlli tucushpa, imatalla rurangapapash aliguta yaringui. Siria llactata jatun mandajca, caimanda shuj huata jipaca, cutinmi canhuan macanajungapa shamunga” nircami.
23Siria llactata jatun mandajpajta rurajcunaca, cashnami ninajurca:
“Israelcunapaj dioscunaca, urcucunapi causaj dioscunamari. Chaimandamari ñucanchitaca macanajushpa misharca. Ashtahuangarin pugru pambacunapi macanajushpaca, ¿nacha mishai ushanchiman?
24Cunanga cashnami rurana cangui: Jatun mandajcunata anchuchishpa, paicunapaj randica macanajuj runacunatami, mandachunga churana cangui.
25Shinallata, canga cutinmi, macanajuj runacunata, caballocunata, carretacunata cutinmi, chashnatallata tandachina cangui. Chashna tandachishpa, pugru pambapi macanajushpaca, ¿nacha mishai ushashun?” ninajurcami.
Paicuna nishcata cazushpami, Ben-adad runaca chashnatapacha rurarca.
26Ña shuj huata yalishca jipami, Ben-adad runaca Siria llacta macanajuj runacunata cayashpa tandachirca. Chai jipami, Israelcunahuan macanajungapa Afec shuti puebloman shamurca.
27Shinallata, macanajuj Israel runacunapashmi, ña alichirishcalla shuyanajurca. Chai jipami, tucuita ali ricushpa, Siria llactamanda runacunahuan macanajungapa rinajurca. Israelcunaca, Siria llactamanda runacunapaj chimbapurapimi, carpacunata shayachishpa, ishcai corral junda chivocunashna tiyanajurca. Siria llactamanda runacunaca, pamba jundami tiyanajurca.
28Chai jipami, Taita Diospajta ruraj runaca, Israel llactata jatun mandajpajman shamushpa, cashna nirca:
“Mandaj Diosca cashnami nin: ‘Siria llactamanda runacunaca, ñucataca Mandaj Diosca urcucunapi causajuj Taita Diosmari, pugru pambacunapi causajuj Taita Diosca na canllu ninajurcami. Chaimandami, cai tucuilla ashtaca gentecunataca, cambaj maquipi churagrini. Ñucataca, Mandaj Dios cajta can rijsichunmi, chashna churagrini’ ninmi” nircami.
29Canchis punllacamanmi, carpacunata chimbapura churashca tiyanajurca. Ña pusaj punlla tucujpimi, macanajui callarirca. Israelcunaca, shuj punllapillami chaquilla purij Siria llactamanda runacunataca, patsaj huaranga runacunata huañuchirca.
30Siria llactamanda huaquin runacunataca, Afec shuti pueblomanmi pacajungapa rinajurca. Chai pueblo pirca urmashpami, pacajushpa saquirishcacunataca, ishcai chunga canchis huaranga runacunata huañuchirca. Shinallata Ben-adad runapashmi, chai pueblopi pacajungapa shamurca. Chaipimi shuj ucumanda, chaishuj ucuman pacajushpa calpariyajurca.
31Chaimandami paipajta rurajcunaca, cashna ninajurca:
“Israelcunata jatun mandajcunaca, ninanda llaquijcunami nijtami uyashcanchi. Cunanga, cañamuta churajushpa, ñucanchi cungapipash cabiata churajushpa, Israel llactata jatun mandajpajman llujshishunchi. Chashnata ricushpaca, canda llaquishpa napash huañuchingachu” ninajurcami.
32Chashnami, cañamuta huatarishpa, cungapipash cabiata churajushpa, Israel llactata jatun mandajpajman shamushpa, cashna ninajurca:
“Cambajta ruraj Ben-adad shuti runaca: ‘Ñucata ama huañuchihuaichu nishpami mañajupani’ ninmi” ninajurca.
Shina nijpimi, Acab runaca:
“¿Paica causajunrachu? Paica ñuca huauquimari” nirca.
33Shina nijpica, na huañuchingapami chashna nijun yashpami, chai runacunaca:
“Cambaj huauqui Ben-adad runaca causajupanrami” nishpa, ucha villanajurca.
Shina villajpimi, Acab runaca:
“Pushamugrichi” nishpa cacharca.
Shina cachajpi, Acab runapajman Ben-adad runa shamujpimi, paica paipaj carretapi tiyachirca.
34Chaipimi Ben-adad runaca, cashna nirca:
“Ñuca taita, cambaj taitata quichushca pueblocunataca tigrachishallami. Samaria pueblopi ñuca taita rurashca plazacunatashnallata, cambash Damasco pueblopi plazacunata ruranguilla” nircami.
Shina nijpimi Acab runaca, cashna nirca:
“Shina cashpaca, chaita ari nishcamandami, ñucapash candaca richun saquigrini” nircami.
Chaita pactachingapa paihuan ari ninajushpaca, richun saquircallami.
35Chai jipami, profetapuramanda shuj runaca, Taita Diosllata mandajpi paipaj cumba runataca:
“Cunanga, ñucata huactahuai” nirca.
Ashtahuangarin caishuj runaca, na huactangapa munarcachu.
36Chaimandami huactahuai nij runaca, cashna nirca:
“Mandaj Dios mandashcata na cazushcamandami, caimanda can rijpica, shuj león tuparishpa, candaca huañuchinga” nircami.
Pai chaimanda ña anchurishpa rijujpica, shuj león ñambi tuparishpami huañuchirca.
37Chai jipami, profetaca, shuj runahuan tuparishpa:
“Cunanda huactahuai” nijpi, chai runaca huactashpa chugrichirca.
38Chashna chugrichijpi rishpami, profetaca, jatun mandaj Acab runa yalina ñambi shayaringapa rirca. Paita ama rijsichunga, ñavita huatarishcami shayajurca.
39Jatun mandaj ña chaita yalijujpimi paica, caparishpa cashna nirca:
“Cambajta ruraj ñucaca, jatun macanajui chaupipimi carcani. Chaipimi shuj macanajuj runaca, shuj runata apamushpa ñucapajman shamushpa, cashna nihuarca: ‘Cai runata ricuriangui. Pai pacajushpa rijpica, canmi paipaj randi huañungui. Na cashpaca, quimsa chunga chuscu kilota pezaj culquitami cungui’ nihuarcami.
40Cambajta ruraj ñucaca, imacunatapash rurashpa musparijungacamanmi, chai runaca pacajushpa rishca carca” nircami.
Shina nijpimi Israel llactata jatun mandajca, cashna nirca:
“Chashnallatami llaquichi tucungui, canllatami chaitaca villarcangui” nircami.
41Shina nijpimi paica, ñavi huatarishcata ucha anchuchirca. Chashna anchuchijpimi, Israel llactata jatun mandajca, profetapura cajta rijsirca.
42Chaipimi chai profetaca, cashna nirca:
“Mandaj Diosca, cashnami nin: ‘Ñuca tucuchingapa shicanyachishca runata cambaj maquimanda cacharishcamandaca, canmi paipaj randi huañungui. Cambaj gentecunami, paipaj gentecunapaj randi huañunga’ ninmi” nircami.
43Shina nijpimi, Israel llactata jatun mandajca, ninanda llaquirishpa, fiñarishca rijushpa, Samaria pueblopi tiyaj paipaj huasiman chayarca.
Who We AreWhat We EelieveWhat We Do
2025 by iamachristian.org,Inc All rights reserved.
