ISAÍAS 60 - Quichua Imbabura 2016

Sion puebloca jipa punllacunapi juyaillagu tucuna cashcamanda

1“Sión pueblolla, jatarishpa punchapamba shayarilla.

Canda punchayachij michaca, ñami shamushca.

Candaca, Mandaj Diosmi punchayachinga.

2Cai pachataca, yana tutami quilpanga.

Tucui llactacunapimi, amsayanga.

Ashtahuangarin candaca, Mandaj Diosmi punchayachinga.

Paica, ninan ushaihuanmi cambajman shamunga.

3Shuj llactacunapi causajcunaca, Can punchayachijpimi purinajunga.

Jatun mandajcunapash, can punchayachijpimi purinajunga.

4Cambaj ñavihuanga, muyundi vichai ricuyari.

Tucui gentecunami tandanajumushca.

Cambaj churicunami carumanda shamunajunga.

Cambaj ushicunataca, marcashpami saquij shamunajunga.

5Chaita ricushpami canga ninanda cushijungui.

Mama cuchapi ima juyailla tiyashcatami apashpa shamunga.

Shuj llactacunapi causajcunapash, tucui ima juyailla tiyashcatami apashpa shamunga.

6Ashtaca camellocunami, canda muyundi quilpashca shayanajunga.

Madián, Efa llactacunamandami camellocunapi shamunajunga.

Sabá llactamandapash, tucuicunami shamunga.

Curita, inciensota apashpa shamushpami, Mandaj Diostaca ninanda alicachinga.

7Cedar llactamandaca, tucui animalcunatami canman carangapa apamunga.

Nebaiot llactamandaca, jari llamacunatami canman caranajunga.

Chaicunataca cushijushpami, Ñuca altarpi rupachinajunga.

Shinamandami, Ñuca causana huasitaca, ninanda jatunyachisha.

8¿Picunata fuyushna shamunajun?

¿Picunata, palomacuna, paicuna tiyaj pushtuman rijshna shamunajun?

9Mama cucha manñacunapi causajcunaca, Ñucatapachami shuyanajunga.

Israelcunapaj miraicunataca, Tarsis pueblomanda barcocunami apashpa shamunajunga.

Culquindi, curindi apashpami shamunajunga.

Chaicunataca, Israelcunata Mandaj Diospaj ñaupajmanmi apamunajunga.

Israelcunapaj jucha illaj Dios Ñucami, cangunataca chashna bendiciarcani.

10Cambaj muyundi pircacunataca, shuj llactacunamanda runacunami shayachinajunga.

Paicunata mandajcunami, Canbajtaca ruranajunga.

Ñuca fiñarishca cashpami llaquichircani.

Ashtahuangarin cunanga, cangunata llaquishpami, ninanda juyashcata ricuchisha.

11Jerusalén puebloman yaicuna pungucunaca, pascarishcami saquiringa.

Tutapash, punllapash na vichangachu.

Shuj llactacunamanda, mandajcunami caranacunahuan shamunga.

Chai llactacunata jatun mandajcunatapash, cambajman pushashpa yaicuchunmi, chashna pascariyajunga.

12Maijan llactacuna cashpapash, mandajcuna cashpapash,

Cambajta rurangapa na munashpaca, tucuillami llaquichi tucunga.

13Líbano urcumandami, ciprés, pino, boje shuti juyailla quirucunata apamunajunga.

Chaicunahuanmi, Ñuca causana huasitaca juyaillaguta ruranga.

Ñuca causana chai huasitaca, Ñucami jatumbi churasha.

14Canda llaquichijcunapaj churicunaca, cambaj ñaupajman shamushpami, pingai tucushpa urai cumurinajunga.

Canda na alicachishpa asijcunami, cambaj ñaupajpi cungurinajunga.

Paicunami candaca: ‘Mandaj Dios causana Pueblo,

Israelcunapaj jucha illaj Dios causana Sión Pueblomi’ ninajunga.

15Jichushca cajpi, pipash na ricunayachishpami, cambaj ñangunataca pipash na yalinajurca.

Shina cajpipash, Ñucami candaca causaita causaicaman, jatumbi churashpa ninanda cushichisha.

16Shuj llactacunamanda, micunata apamujpimi micungui.

Jatun mandajcunami, canmanga caranacunata apamunga.

Shina rurajpimi Mandaj Dios Ñucataca, canda Quishpichij cashcata yachangui.

Shinallata, Jacobpaj Dios, ninan ushaihuan canda quishpichij cajtapashmi yachangui.

17Broncepaj randica, curitami apamusha.

Jirrupaj randica culquitami apamusha.

Caspipaj randica, broncetami apamusha.

Rumicunapaj randica jirrutami apamusha.

Impuestopaj randica, ali causaitami cusha.

Llaquichijcunata apamungapa randica, ali causaitami apamusha.

18Cambaj llactapica, llaquicunaca napacha uyaringachu.

Shinallata, llaquichishpa tucuchijcunapash illangami.

Ashtahuangarin cambaj pueblo muyundi jatun pircacunataca: ‘Ñucata Quishpichij’ ninguimi.

Cambaj pueblo pungucunataca: ‘Diosta alicachinami’ ninguimi.

19Punllapash, indica na punchayachingachu.

Tutapash, lunaca na punchayachingachu.

Ashtahuangarin Mandaj Diosmi, causaita causaicaman, canda punchayachij micha canga.

Cambaj Taita Dios Ñucami, candaca ricuriajusha.

20Indipash, napacha huashajungachu.

Lunapash, napacha yanayangachu.

Mandaj Diosmi, causaita causaicaman canda punchayachij micha canga.

Cambaj llaqui punllacunapash tucuringami.

21Jerusalenbi causajcunaca, tucuicunami alitalla rurashpa causanga.

Paicunaca chai llactapimi, causaita causanajunga.

Paicunaca, Ñuca maquihuan tarpujpi, mushujta viñaj yuracunashnami canga.

Ñucata ninanda alicachingapaca, chashna canga.

22Huaquinlla cashpapash, huaranga huarangashnami tucunga.

Ashtahuan uchilla llacta cashpapash, ninan shinlli llactami tucunga.

Mandaj Dios Ñucallatami, chashna tucuna punllacunataca, ñalla pactachisha” nijurcami.