SANTIAGO CALLARI YUYAI - Quichua Imbabura 2016
CALLARI YUYAIHebreo rimaita rimaj crijcunaman quilcashcapica, “Na alita na ruranachu canguichi” nishpa quilcai callarishpaca, “Ali causaiguta charipanguichi” nishpami quilcashpa tucuchin.Shina quilcashcamandami cai quilcashcapica, “Ali causaiguta charipanguichi” nishpa quilcai callarishpaca, “Na alicunataca na ruranachu canguichi” nishpa rimashpa tucuchin.Cai Santiago quilcashcataca, tucui cai pachapi caipi chaipi causanajuj crijcunamanmi quilcashca. Crijpuracunallata caishuj chaishuj, “Paica alimi, chaica na alichu” ninajujta yachashpami, “Na shujtaca ‘Alimi’, caishujtaca ‘Na alichu’ nishpaca, na rimanachu canguichi” nishpa, aliguta yarichishca.Apunchi Jesusta crijcunataca, “Paicuna imata rurashcacunapi ricunallami” nishpami quilcashca. “Crijmi cani” nishpapash, ima alitapash na rurajushpaca, pai crishcapash huañushcashna yangallatami. Chaitaca, 2:14-26 camanmi villajun.Santiago quilcashcapica “Maijambash ali yachaita na charishpapash, Taita Diosta mañaichilla” ninmi. Chai ali yachaica, Taita Diosmandami shamun. “Taita Diosta mañashpaca, ‘¿Cuhuangachu, nachu cuhuanga?’ yashpaca, na mañanachu canguichi” nishpami, 1:1-8 caman villajun.Shinallata imagupash illaj cashpapash, ninan charij cashpapash, Taita Dios cushcahuan cushijuchun nijunmi. Llaquicuna japijpipash, na ali yuyaicuna japijpipash, mishanatami yachachijun.Shinallata Diospaj Shimi villajujta na uyajcunalla canatapash, ashtahuangarin rurajcunapacha canatami yachachijun. Chaitaca, 1:9-27 camanmi villajun.Shinallata crijpurallata shujtaca fiñashpa, shujtaca juyashpa causajunatapashmi shinlli tacurijun. Chaitaca, 2:1-13 camanmi villajun.Tucuimanda yalica, jalluta imashna jarcarinatami yachachijun. Jalluca, pipash imashna jarcaitapash na ushanalla, na ali shimicunata rimaj, venenohuan jundashnami cashca. Ashtahuangarin ñucanchi jallupi jarcaita churanshnami, ima na ali shimicunata rimanataca jarcarina canchi. Chaitaca, 3:1-12 camanmi villajun.Cai quilcashca callari yachajunapi nishcashna, ali causashpa, alita rurashpami, ali shunguhuan alipacha yachajushcata ricuchina canchi. Chaitaca, 3:13-18 camanmi villajun.Na ali yuyaicuna caita chaita yarichijujpipash mishanata, fiñanajushpalla causajcunata, ninanda charijyashpapash mitsajcunataca, jatun llaqui japinatapashmi, aliguta yarichishpa yachachijun. Chaitaca, 4:1 manda 5:6 camanmi villajun.Cai quilcashcata tucuchingapaca, ali shunguhuambacha shuyanata Diosta mañanata, ashtahuan shuj ali yuyaicunatapash cushpami, quilcashpa tucuchin. Chaitaca, 5:7-20 camanmi villajun.
