1Jahua pacha jatun Dios huacaichijpi causajcunaca,
Tucui ushaita charij Diospaj maquipimi causan.
2Mandaj Diostaca:
“Ñuca shuyana, ñucata shinllichij Diosmi capangui.
Ñuca Taita Dioslla,
Candallami yariashpa causajusha” nijushami.
3Paimi, candaca llaquichingapa munajpaj maquimanda cacharichinga.
Huañuchishpa tucuchij ungüi ama japichumbashmi jarcanga.
4Paimi ñucanchitaca quilpajshna huacaichinga.
Alascunahuan quilpajpishnami, imatapash na manllashpa causangui.
Paipaj na llullaj Shimica, jarcarina escudoshnami.
5Tutapi llaqui japinatapash, na manllanguichu.
Punllapi flechacunata cacharijpipash, na manllanguichu.
6Yana tutapi, millai ungüi shamunatapash na manllanguichu.
Chaupi punlla huañuchishpa tucuchintapash, na manllanguichu.
7Cambaj lluqui maquimanga, huarangacunami huañushpa urmanajunga.
Cambaj ali maquimambash, chunga huarangacunami huañushpa urmanajunga.
Ashtahuangarin, candaca na llaquichingachu.
8Cambaj ñavihuambachami ricungui.
Diosta na manllajcuna llaquita apajtami ricungui.
9Mandaj Dios, canda huacaichijuchunmi mañashcangui.
Jahua pachapi causajuj Dios, canda ricujuchunmi shuyashcangui.
10Candaca, ima llaquipash na japingachu.
Millai ungüipash, can causana huasitaca na tacaringachu.
11Canda ricuchunga, Paipaj angelcunata cachamungami.
Tucui cambaj causaipi, canda ricuchunmi cachamunga.
12Paicunapaj maquihuanmi candaca pushanga.
Rumipi ama nitijachunmi, chashna pushanga.
13Leondapash, millai culebratapash sarunguillami.
Maltun leondapash, dragón animaltapash sarunguillami.
14Taita Diosca cashnami nin: “Ñucata juyashcamandami, paitaca huacaichisha.
Ñucata rijsishcamandami, jatumbi churasha.
15Ñucata mañajpimi, paitaca uyasha.
Ninan llaquihuan cajpipash, paihuan pajtami casha.
Paitaca, llaquicunamanda cacharichishpami jatumbi churasha.
16Pai causachumbash, unai huatacunatami carasha.
Quishpichishpami, paita juyashcata ricuchisha” nijunmi.
Who We AreWhat We EelieveWhat We Do
2025 by iamachristian.org,Inc All rights reserved.
