PROVERBIOS 30 - Quichua Imbabura 2016

Agur shuti runa rimashca shimicunami

1Jaqué shuti runapaj churi, Agur shuti runaca, Dios villachun cachajpimi, Itiel shuti runaman, Ucal shuti runaman, cashna nishpa villajurca:

2Shujcunapaj ñaupajpica, imatapash na yachajmi cani.

Imata yachajuitapash na ushaj runami cani.

3Ali yachajunatapash, na yachajui usharcanichu.

Jucha illaj Diosmandapash, na yachajurcanichu.

4¿Pita jahua pachaman rishpa, cutin tigramurca?

¿Pita huairataca, maquipi japishpa chari ushanga?

¿Pita yacutaca, jatun fachapi huatai ushanga?

¿Pita cai pachataca ama talirijuchun, alipacha churai ushanga?

¿Pai ima shuti cajtapash yachanguichu?

¿Paipaj churipaj shutitapash rijsinguichichu?

5Mandaj Dios rimashca shimicunaca, ima pandatapash na charinchu.

Paita shuyajcunataca, jarcarina escudoshnami jarcajun.

6Ama llaquichi tucungapami, Dios rimashca shimicunataca, na mirachishpa rimana cangui.

pactarallapash, llullapi urmanguiman.

7Ñuca Dioslla,

ishcai mañaitami charipani.

Chaitaca, ñuca nara huañujpillata pactachipangui.

8Na ali yuyaicunatapash, llulla shimicunatapash ñucamanda anchuchipailla.

Huajcha canatapash, ninan charij canatapash ama carahuaichu.

Punllandi micunagutalla carashpa charihuangui.

9Yapata micushpara, Canda cungashpa:

“¿Mandaj Diosca pita canga?” nijuiman.

Na cashpaca, huajcha caimanda shuhuashpa,

ñuca Taita Diospaj shutita, na alicachishpa rimajuiman.

10Gañan runata ama juchachishpa, paita mandajman villagringuichu.

Canda na alicachishpa rimajpira, llaquipi urmanguiman.

11Paipaj taitatallata na alicachishpa rimajcunapash tiyanmi.

Paicunaca, paipaj mamatapash na alicachishpami riman.

12Paicunallatami, “jucha illajmi canchi” ninajun.

Shina cashpapash, juchapillatami causanajun.

13Paicunallata, ninanda jariyashpa causajcunami miranajun.

Paicunaca, ninanda jariyashcatami purinajun.

14Shinallata, ñaupa quirucunapash espadashna,

juchu quirupipash cuchilloshna causajcunami miranajun.

Paicunaca, llactapi huajchacunata,

imatapash na charijcunata, micujshna tucuchingapami, chashna miranajun.

15Sanguijuela juruca, ishcai huahuacunatami charin.

Paicunaca: “¡Carailla, carailla!” ninajunllami.

Shinallata, quimsacaman, chuscucaman, charishpapash cuhuailla ninajungallami.

16Chaicunaca: Seol, huahuata na tarij huarmi,

tamiajpi chaquijujlla alpa, rupajujlla ninapashmi.

17Taitata na alicachishpa ricuj,

mama yachachishcatapash yangapi churaj churitaca,

huaicupi causaj angacuna, paipaj ñavita llujchijpi,

chai angapaj huahuacuna paitaca micuchun.

18Quimsami na yachanalla, pacalla tiyajun.

Chuscutacarin, napacha yachai ushanallachu:

19Huairapi anga maita rishca,

jaca rumita culebra maita rishca,

mama cucha yacuta canoa maita rishca,

jarihuan nara tacarishca cuitsapi, tacarishca runatapash na yachai ushanallami.

20Cusayuj cashca jahua shujcunahuan causaj huarmica, cashnami ruran:

Micushca jipalla shimita ficharishpaca:

“Ima na alitapash na rurashcanichu” nijunmi.

21Quimsa llaquicunata ricushpami cai pachapi causajcunaca, ninanda manllarinajun.

Chuscu llaquicunacarin, ashtahuan ninandapachami manllachinga.

22Chaicunaca: Gañan runara mandai callarina,

juizu illaj runara sajsajta micuna,

23na ricunayachishca huarmira cazarana,

gañan causaj huarmira, mandai callarinami.

Tucui chaicunami chashna manllachinga.

24Cai pachapica, chuscu uchilla animalcunami tiyan.

Chaicunaca, alipacha yachajushca runacunatapash yali yachajcunami:

25Añangucunaca, na shinllicuna cashpapash,

rupai punllacunapimi micunataca tandachinajun.

26Conejocunaca, na yapa ushaita charishpapash,

rumi ucucunapimi huasichishpa causanajun.

27Langostacunaca, jatun mandajta na charishpapash,

tucuicunami tandanajushpa llujshinajun.

28Maquihuan llapishpa huañuchinalla arañacunapash,

jatun mandajcuna mandana ucupimi causanajun.

29Jariyashcata purijcunapash quimsami tiyan.

Chuscucarin, ashtahuan alipachami ricurin.

30Tucui animalcunata yali shinllica, leonmi tiyan.

Paica imata ricushpapash, na huashaman tigranllu.

31Jariyashca shayajuj gallopash,

ninan shinlli chivopash,

ninan ushaita charij jatun mandajpash,

chai tucuicunami chashna ricurin.

32Juizu illaj runashna, pitapash jariyashca cashpa,

llaquichingapa yarijushca cashpaca, maquita shimipi churashpa jarcaringui.

33Lecheta ninanda cuyuchishpaca, leche viratami llujchinga.

Singata ninanda capirishpaca, yahuartami llujchinga.

Pitapash ninanda fiñachishpaca, fiñanajuitami jatarichinga.