1Taita Diosca, cashnami nijun:
“Cushijuichi, cushijuichi, Ñuca agllashca gentecuna.
2Jerusalenbi causajcunamanga juyaihuan villaichi.
Cangunapaj juchacunata anchuchina punllacunaca, ña chayamushcami.
Cangunapaj juchacunamanda, Mandaj Dios llaquichinataca, chaupita yalishpami chasquircanguichi” nijunmi.
3Jichushca pambapi caparij runaca, cashnami nin:
“Mandaj Diosman ñanda alichipaichiyari.
Ñucanchi Taita Diosman, ñanda alichipaichiyari.
4Pugru pambacunapipash, alpahuan jundachinami canguichi.
Lomacunatapash, allashpa ñanda ruranami canguichi.
Quingu ñangunatapash, alichinami canguichi.
Huagli ñangunatapash, alichinami canguichi.
5Chaicunapimi Mandaj Diosca, Paipaj Ninan Ushaita charishcataca ricuchinga.
Chaitaca, tucui gentecunami tandanajushpa ricunajunga” ninmi.
Caitaca, Mandaj Diosmi, Paipaj shimihuan chashna nirca.
6Shuj rimashca uyarimushpaca: “Caparishpa villagri” nihuarcami.
Shina nijpica, “¿Imatata caparishpa villagrina cani?” nircanimi.
Shina nijpica, “Cai pachapi causaj gentecunaca jihuashnallami” nihuarcami.
“Paicuna juyailla cashcapash, pambapi sisashnami” nihuarcami.
7“Mandaj Dios huairata cachamujpica,
jihuaca chaquinllami, sisapash anguyashpa urmanllami.
Gentecunapash chashnallatami.
8Jihuaca chaquinllami, sisapash anguyashpa chaquinllami.
Ashtahuangarin, ñucanchi Taita Diospaj Shimica, causaita causajungallami” nircami.
9Sión pueblopi villajcunalla, ashtahuan urcu pundaman richilla.
Jerusalenmanda villajcunalla, ashtahuan caparishpa villaichiyari.
Judá llactapi causajcunamambash, na manllashpa, cashna caparishpa villaichiyari:
“¡Cangunapaj Diosca caipimari, nishpa caparichiyari!
10Mandaj Jatun Diosca,
Paipaj ninan ushaihuan shamushpami, tucuicunata mandanga.
Paica, Paipajta rurajcunaman carangapami apashpa shamunga.
Imata rurashcatapash ricushpa cungapami, Paica shamunga.
11Paica, Paipaj llamacunataca napacha saquishpami michinga.
Paipaj huahua llamacunataca, marcashpami pushajunga.
Chairalla huachashca llullu llamacunataca, ricuriashpami michinga” nishpa villaichi.
Israelcunapaj Dioshuanga, pipash na chimbapurai ushangachu12¿Pita mama cuchataca, paipaj maquihuan tupushcanga?
¿Pita jahua pachataca paipaj maquihuan yupashcanga?
¿Pita cai pachapi ñutu alpataca, paipaj maquihuan tandachirca?
¿Pita urcucunatapash, lomacunatapash, Paipaj pezanahuan pezashpa churarca?
13Mandaj Diospaj Espiritutaca, ¿pita yachachirca?
¿Pita Paipaj Espiritutaca, imashna canata yachachishpa saquirca?
14Imatapash alitalla rurangapaca, ¿pitata yachachihuai nishpa mañarca?
Paitaca, ¿pita imatapash alitalla rurachun yachachi ushana carca?
¿Pita Paimanga, imata alita ruranatapash yachachishpa saquirca?
15Diospaj ñaupajpica, gentecunaca, ashalla yacu shutujshnallami.
Ñutu alpata pezangapa, balanzapi churashcashnami.
Mama cucha chaupipi tiyaj llactacunatapash, ñutu alpatashnami chingachin.
16Diosman rupachishpa carangapaca,
Líbano shuti urcupi tiyaj yamdapash,
chaipi causaj animalcunapash, na pactangachu.
17Paipaj ñaupajpica, cai pachapi tiyaj llactacunaca, illashcashnami.
Paipaj ninan Ushaihuan ricujpica, imahuan chimbapuraita na ushanallami.
18¿Imahuanda, Ninan Ushaita charij Diostaca chimbapurai ushanchiman?
¿Imatata, Paiman rijchajta rurai ushanchiman?
19Jirruta tacashpa imatapash rurajcunami, imamambash rijchajta ruran.
Chaitaca, curihuanmi jahualla quilpachin.
Shinallata, cadenacunatapash culquimanda rurashpami churachin.
20Huajcha runaca, na ismujlla caspitami mascashpa agllan.
Chai jipaca, imamambash rijchajta rurachunmi, ali yachaj runata mascashpa, na cuyurij diosta rurachin.
21Cangunaca, ¿nachu yachashcanguichi, nachu uyashcanguichi? ¿Nachu pipash chaitaca villarca?
Cai pachata churashca punllamanda, ¿Cunangamanchu pipash nara yachachirca?
22Taita Diosca, cai pachataca tucuillatami ricujun.
Cai pachapi causajcunaca, langosta jurucunashnami.
Paimi, jahua pachataca, fachahuan quilpajshna churarca
Chaipi causana huasishna cachunmi churarca.
23Paica, ninan ushaita charijcunataca, yangapimi churan.
Cai pachapi jatun mandajcunatapash, yangapimi churan.
24Paicunataca, imatapash na tarpushcatashna,
ima punllapash na tarpushcatashna,
alpapi sapi illaj yuratashnami ricun.
Chaimandami, ninan huaira shamushpaca, chaquishca jupatashna apashpa tucuchin.
25Jucha illaj Diosca, cashnami nin:
“¿Imatata ñucaman rijchajta rurai ushanguichiman?
Na cashpaca, ¿imahuanda Ñucataca chimbapurai ushanguichiman?” ninmi.
26Cai tucuita churashcataca, cangunapaj ñavihuan ali ricuichiyari.
Paimi, tucui ima tiyajtapash shutichishpa churashca.
Chaicunaca, shujllapash na illangachu.
Paica, tucuita rurai ushaj cashpami, tucuita mandajun.
27Jacobmanda mirai Israelcuna,
¿Imashpata cangunaca, cashna ninajunguichi?:
“Mandaj Diosca, ñucanchi imata rurajtapash na yachanllu.
Ñucanchi Taita Diosca, ñucanchiman alita ruranataca, yaritapash na yarinllu” ninguichimi.
28Causajujlla Diosca, ñucanchita Mandaj cajtaca, ¿nachu yachashcanguichi, nachu uyashcanguichi?
Paimi, tucui cai pachataca churarca. Paica na shaijunllu. Paipaj ushaipash na tucurinllu.
Pai imata yachashcataca, pipash na yachai ushanllu.
29Shaijushca gentecunamanga, Paimi ushaita cun.
Ushai illaj, gentecunamambash, Paimi ushaita caran.
30Huambracunapash, shaijushpa, na ushanllami.
Ninan ushaita charijcunapash, shaijushpa urmanllami.
31Ashtahuangarin, Mandaj Diosta cazushpa causajcunallami, cutin ushaita japinga.
Paicunaca, angacunashna jatarishpa calpana ushaitami charinga.
Mashnata calpashpapash, mashnata purishpapash, napacha shaijungachu.
Who We AreWhat We EelieveWhat We Do
2025 by iamachristian.org,Inc All rights reserved.
