Psalms 68 - Quichua Imbabura 2016

Taita Diosca, Sinaí urcupipash, Paipajlla huasipipash ricurishcamandaCandajcunata mandaj candachijuchun, David rurashca Salmomi.

1Taita Dioslla,

Canda fiñajcuna caita, chaita calpachun, shayaripayari.

Canda fiñajcuna, Cambaj ñaupajmanda calpachun shayaripayari.

2Paicunaca, cushnita cachajpishna chingashca cachun.

Ninapi vira yacuyajshna tucurishca cachun.

Taita Diosta na cazujcunaca, Paipaj ñaupajpimi chashna tucuringa.

3Ashtahuangarin, alitalla rurajcunaca cushijungami.

Taita Diospaj ñaupajpica ninandami cushijunga.

Cushijushpami, ninanda fahuanajunga.

4Tucuicuna Taita Diosman candaichiyari. Paipaj shutitaca, Salmocunahuan candaichiyari.

Fuyu jahuata purijuj Diosta ninanda alicachinguichiyari.

Paipaj shutica, Mandaj Diosmi.

Paipaj ñaupajpimi cushijuna canguichi.

5Paica, taita mama illajcunapaj Taitami.

Sapalla mamacunatapash, Paimi ricujun.

Paipajlla shicanyachishca huasipimi, Taita Diosca causajun.

6Jichushca gentecunataca, Taita Diosmi tandachishpa ricushpa charin.

Llaquipi causajcunataca, Paimi llujchishpa ali causaita carajun.

Ashtahuangarin, Paita na cazujcunaca, jichushca alpacunapimi causanajun.

7Taita Dioslla,

Can agllashcacunata ñaupashpami rijurcangui.

Chaquishca pambatami, pushashpa rijurcangui. Selah

8Alpa mamapash cuyurcami.

Taita Dios ricujtami, jahua pachamanda tamiapash urmamurca.

Sinaí urcuca, Taita Diospaj ñaupajpimi ninanda cuyujurca.

Israelcunapaj Taita Diospaj ñaupajpimi chashna cuyujurca.

9Taita Dioslla,

ashtaca tamiatami urmachimurcangui.

Can carashca chaquishca alpa jahuapimi tamiachimurcangui.

10Can agllashca gentecunami, chaipica causanajun.

Taita Dioslla,

juyaimandami imagutapash na charijcunamanga tucuita carashcangui.

11Jatun Dioslla,

Canmi imata villachumbash cushcangui.

Chai juyailla villanatami ashtaca huarmicuna villanajurca.

12Jatun mandajcunaca, macanajuj runacunandimi pacajushpa calpanajurca.

Huasipi saquirishca huarmicunaca, macanajuipi quichushcatami chaupirinajurca.

13Animalcunata ricungapa saquirijcunapashmi chaupirircanguichi.

Culquita rurashca paloma alastapashmi japinajurca.

Plumacunaca, curihuan rurashcami carca.

14Tucuita rurai ushaj Dios, jatun mandajcunata caita chaita cachajpica,

Salmón shuti urcupi rasu urmajshnami saquirirca.

15Basán shuti urcuca, Taita Diospaj urcumi.

Chai Basán urcuca, jatumbacha urcumi.

16Jatun urcucunalla, ¿imashpata ricunajunguichi?

Dios causangapa agllashca urcutaca ¿imashpata ricunajunguichi?

Chai urcupica, Mandaj Diosmi causaita causajunga.

17Taita Diospaj carretacunaca, ashtaca huaranga huarangacunami.

Jatun Diosca, Sinaí urcumandami, Paipajlla huasiman shamujun.

18Prezu tiyajcunata apashpami, jahuaman rircangui.

Chaipimi gentecuna carashca ofrendacunata japircangui.

Canda na cazuj gentecunapashmi, ofrendacunata cunajurca.

Mandaj Taita Diosca chashna chasquishpami chaipi causarcangui.

19Jatun Diosca, alicachi tucushca cachun.

Paica, punllandimi ninanda bendiciajun.

Paica, ñucanchita quishpichij Taita Diosmi. Selah

20Taita Diosmi, ñucanchitaca quishpichinga.

Mandaj Taita Diosmi, huañunamandapash cacharichinga.

21Taita Diosca, Paita fiñajcunataca umapimi huajtanga.

Juchapi purijcunataca, uma ajchamandami pilanga.

22Mandaj Diosca, cashnami nirca:

“Basán shuti llactamandami, candaca tigrachimusha.

Candaca, mama cucha yacu ucucunamandami llujchimusha.

23Canda fiñajcunapaj yahuarpimi sarujungui.

Chai yahuartaca, alcucunami lambinajunga” nircami.

24Taita Dioslla,

Cambaj ñangunatami ricunajurca.

Taita Diospaj ñangunatami purinajurca.

Ñucata Jatun Mandajpaj huasimanmi rinajurca.

25Candajcunaca ñaupashpa, taquijcunaca catishpami rinajurca.

Chaupipica, cuitsacunami panderocunahuan rinajurca.

26Tandanajushca Israelcuna, Taita Diostaca alimari cangui nichiyari.

Callarimandapacha causaj Israelcuna, Jatun Diostaca alimari cangui nichiyari.

27Paicunata mandaj, chairalla viñai Benjaminga chaipimi carca.

Judá aylluta mandajcunaca, paicunapaj aylluhuanmi carca.

Zabulón aylluta, Neftalí aylluta mandajcunapash chaipimi carca.

28Taita Dioslla,

Cambaj ninan ushaita ricuchipai.

Taita Dioslla,

ñucanchimanga Canmi tucuita rurashcangui.

29Jerusalenbi, Cambajlla huasita yarishpami chashna rurashcangui.

Jatun mandajcunaca, canmanmi caranacunata apamunga.

30Macanajungapa tandanajuj gentecunata llaquichipayari.

Huagracunashna, shicucunashna millai gentecunatapash llaquichipayari.

Paicunapaj charishca culquicunata tigrachingacaman llaquichipailla.

Macanajushpa cushijuj gentecunataca, calpachipailla.

31Egipto llactata mandajcunami shamunajunga.

Etiopía llactapi causajcunaca,

Can Taita Diosman carangapami shamunajunga.

32Cai pachapi llactacunata mandajcunaca, Taita Diosman candaichiyari.

Jatun Diosman candaichiyari. Selah

33Jahua pachacunapi, punda huatamandapacha purijuj Diostaca candaichiyari.

Paimi ninan ushaihuan rimamunga.

34Taita Dios ninan ushaita charijtaca ricuichiyari.

Paica, Israelcunatami ninan ushaihuan charijun.

Paipaj ninan ushaica, jahua pachapimi ricurijun.

35Cambajlla huasipi tiyajushpaca, ninan manllaihuan cazuna Taita Diosmi cangui.

Israelcunapaj Taita Diosmi,

Pai agllashca gentecuna ninan shinlli cachunga, ushaita cujun.

Taita Diosca, alicachi tucushca cachun.