NEHEMÍAS 3 - Quichua Imbabura 2016

Jatun pircata cutin shayachishcamanda

1Shinamandami, sacerdotecunata mandaj Eliasib shuti runapash, paipaj huauqui sacerdotecunandi jatarishpa, Llamacunahuan yaicuna punguta alichinajurca. Chai pungucunataca paicunami, Hamea shuti torrecaman alichinajurca. Hananeel shuti torrecamanmi, pircatapash alichinajurca.

2Paicunapaj catica, Jericó shuti pueblomanda runacunami alichinajurca. Chaipaj catica, Imri shuti runapaj churi Zacur shuti runami alichijurca.

3Senaa shuti runapaj miraicunaca, Pijihuan yaicuna pungutami alichinajurca. Chai pungucunataca, caspicunata jahualla churashpami, jarcana caspicunatapash, aldabacunatapash churanajurca.

4Paicunapaj catipica, Urías runapaj churi Meremot shuti runami alichijurca. Urías shuti runaca, Cos shuti runapaj churimi carca. Paicunapaj catipica, Berequías runapaj churi Mesulam shuti runami alichijurca. Berequías shuti runaca, Mesezabeel shuti runapaj churimi carca. Paicunapaj catipica, Baana shuti runapaj churi Sadoc shuti runami alichijurca.

5Paicunapaj catica, Tecoa shuti pueblopi causajcunami alichinajurca. Ashtahuangarin paicunata mandajcunaca, Jatun Diospajta ruranapica na yanapanajurcachu.

6Jesaná shuti Mauca pungutaca, Paseah shuti runapaj churi Joiada shuti runahuan, Besodías shuti runapaj churi Mesulam shuti runahuanmi alichinajurca. Chai pungucunataca, caspicunata jahualla churashpami, jarcana caspicunatapash, aldabacunatapash churanajurca.

7Paicunapaj catica, Gabaón gentecunamanda Melatías shuti runahuan, Meronot gentecunamanda Jadón shuti runahuan, Gabaón shuti, Mizpa shuti pueblocunapi causanajuj runacunahuanmi, chai pircataca alichinajurca. Paicunaca, jatun yacu chimbaman tiyaj llactata mandajuj runa mandajpimi causanajurca.

8Paicunapaj catipica, culquita imacunatapash ruranata yachajpura, Harhaía shuti runapaj churi Uziel shuti runahuan, mishquilla ashnajun yacucunata ruraj runapaj churi Hananías shuti runahuanmi alichinajurca. Shinami paicunaca, Jerusalén muyundi pircacunataca, ancho pircacaman alichijurca.

9Paicunapaj catipica, Hur shuti runapaj churi Refaías shuti runami alichijurca. Jerusalenbi causajcunataca, paimi chaupita mandajurca.

10Shinallata paicunapaj catipica, Harumaf shuti runapaj churi Jedaías shuti runami, paipaj huasi chimbapuracaman alichijurca. Paipaj catipica, Hasabnías shuti runapaj churi Hatús shuti runami alichijurca.

11Harim shuti runapaj churi Malquías shuti runahuan, Pahat-moab shuti runapaj churi Hasub shuti runahuanga, asha pircatapash, Hornocunapaj torretapashmi alichinajurca.

12Paicunapaj catipica, Halohes shuti runapaj churi Salum shuti runami, paipaj ushicunahuan alichijurca. Jerusalenbi causanajuj caishuj chaupitaca, Salum shuti runami mandajurca.

13Pugru pambaman llujshina pungutaca, Hanún shuti runami, Zanoa shuti pueblopi causajcunahuan alichijurca. Paicunami, jarcana caspicunata, aldabacunata churashpa, pungucunataca shayachinajurca. Pircatapash, Mapata shitana pungucamanmi alichinajurca. Paicunaca, chuscu patsaj picha chunga metro pircatami, punguman chayajta alichirca.

14Mapata shitana pungutaca, Recab shuti runapaj churi Malquías shuti runami alichijurca. Malquías runaca, Bet-haquerem shuti uchilla llactatami mandajurca. Paica, jarcana caspicunata, aldabacunata churashpa alichishpami pungucunataca shayachirca.

15Colhoze shuti runapaj churi Salum shuti runaca, Mizpa shuti llactatami mandajurca. Paica, pugyuman llujshina pungutami alichijurca. Chai pungucunataca, caspicunata jahualla churashpami, jarcana caspicunatapash, aldabacunatapash churanajurca. Pircatapash, jatun mandajpaj huertapi tiyaj Siloé shuti tanquemandaca, Davidpaj puebloman uriajuna gradacunacamanmi alichijurca.

16Paipaj catipica, Azbuc shuti runapaj churi Nehemiasmi alichijurca. Paica, Bet-sur shuti chaupi llactatami mandajurca. Paimi Davidtapash, paipaj ayllucunatapash pambashca utuju chimbapuracaman, yacuta tandachina tanquecaman, ninan Shinlli runacuna causashca huasicaman alichijurca.

17Paipaj catipica, levitacunami alichinajurca. Paicunapuramandaca, Bani shuti runapaj churi Rehum shuti runami alichijurca. Paipaj catipica, Keila shuti shuj chaupi llactata mandaj Hasabías shuti runami, pai mandajushca llactapaj shutipi alichijurca.

18Paipaj catipica, paicunapaj huauquicunami alichinajurca. Henadad shuti runapaj churi, Keila shuti caishuj chaupi llactata mandaj Bavai shuti runami alichijurca.

19Paipaj catipica, Jesúa shuti runapaj churi Ezer shuti runami, macanajunacunata alichina huasiman vichai rina chimbapura ñan tigranacaman, pircata alichijurca. Ezer shuti runaca, Mizpa shuti pueblopi causajcunatami mandajurca.

20Paipaj catipica, Zabai shuti runapaj churi Baruc shuti runami, ñan tigranamanda callarishpa, sacerdotecunata mandaj Eliasib shuti runapaj huasi pungucaman, tucui shunguhuan alichijurca.

21Paipaj catipica, Urías shuti runapaj churi Meremot shuti runami, shuj asha pircata alichijurca. Urías shuti runaca, Cos shuti runapaj churimi carca. Meremot shuti runaca, Eliasib shuti runapaj huasi pungumanda callarishpa, huasi tucuringacamanmi pircataca alichijurca.

22Paipaj catipica, pugru pambapi causanajuj sacerdotecunami alichinajurca.

23Paicunapaj catipica, Benjamín shuti, Hasub shuti sacerdotecunami, paicunapaj huasi chimbapurapillata alichinajurca. Paicunapaj catipica, Maasías shuti runapaj churi Azarías runami, paipaj huasi ñaupaj pircataca alichijurca. Maasías shuti runaca, Ananías runapaj churimi carca.

24Paipaj catipica, Henadad shuti runapaj churi Binúi shuti runami, shuj asha pircata alichijurca. Paica, Azarías runapaj huasimanda callarishpaca, jatun pirca tigranacamanmi alichijurca.

25Uzai shuti runapaj churi Palal shuti runaca, chai ñan tigrana chimbapurapi tiyajuj pircatapash, jatun mandajpaj huasi ñaupajpi tiyajuj jatun torretapashmi alichijurca. Chai torreca, prezuna huasi ñaupajpimi carca. Paipaj catipica, Faros shuti runapaj churi Pedaías shuti runami alichijurca.

26Ofel shuti uchilla pueblopi causajcunaca, Diospaj huasipi rurashpa causajcunami carca. Paicunami caishuj pircataca, Yacuman llujshina shuti pungucaman alichinajurca. Shinallata, vichai yalishca jatun torretapashmi alichinajurca.

27Paicunapaj catipica, Tecoa shuti pueblopi causajcunami, vichai yalishca jatun torremanda callarishpa, Ofel shuti uchilla pueblopi causajcuna alichishca pushtucaman, shuj asha pircata alichinajurca.

28Caballocunahuan yaicuna pungumanda callarishpami sacerdotecunaca, paicunapaj huasi chimbaman tiyaj pircataca tucuicuna alichinajurca.

29Paicunapaj catipica, Imer shuti runapaj churi Sadoc shuti runami, paipaj huasi chimbapura pircata alichijurca. Paipaj catipica, Indi llujshimujman tiyajuj pungupi ricuj, Secanías shuti runapaj churi Semaías runami alichijurca.

30Paipaj catipica, Selemías shuti runapaj churi Hananías runapaj, Salaf shuti runapaj churi Hanún shuti runapashmi, shuj asha pircata alichijurca. Hanún shuti runaca, Salaf shuti runapaj picha churicunapaj cati churimi carca. Paicunapaj catipica, Berequías shuti runapaj churi Mesulam shuti runami, pai causajuj ucu chimbaman tiyajuj pircataca alichijurca.

31Paipaj catipica, culquita imacunatapash ruranata yachaj runapaj churi Malquías runami alichijurca. Paica, Diospaj huasipi rurashpa causajcunapaj huasi pungucaman, shinallata randishpa jatushpa causajcunapaj huasicamanmi alichijurca. Paica, fiñanajushcata alichingapa tandanajuna huasi pungu chimbapuracaman, ñan tigranapi tiyaj huasicamanmi alichijurca.

32Culquita imacunatapash ruranata yachajcuna, randishpa jatushpa causajcunaca, chai ñan tigranapi tiyaj huasimanda callarishpaca, Llamacunahuan yaicuna pungucamanmi alichinajurca.