1Job runaca, ashtahuanmi cashna rimashpa catirca:
2“¡Yalishca quillacunapi causajushcashna causajushpami ali canman!
Taita Dios juyajpi causajushcashna, causashpami ali caiman.
3Chai punllacunapica, Taita Dios bendiciajpimi causajurcani.
Taita Dios ñucahuan cajpimi, michapishna purijurcani.
4Ñucaca, huambrallara cajpimi,
Taita Diosca, ñuca huasitaca bendiciarca.
5Tucuita rurai ushaj Diosmi, ñucahuan pacta carca.
Ñuca huahuacunapash, ñucahuanmi causanajurca.
6Ñuca micungapa tiyarijpipash, lecheca na illarcachu.
Cutana rumimandaca, aceitepash ashtacami llujshijurca.
7Imata rurashcata ricungapa, pueblo punguman rijpipash,
ñuca tiyarichunga plazapimi alichij carca.
8Chairalla viñaicuna ñucata ricushpaca, pacajunllami carca.
Rucucunapash, paicuna tiyanajushcamanda jatarishpami shayarij carca.
9Mandajcunapash, upallami saquirij carca.
Paicunapaj maquihuanmi, shimita quilparinajuj carca.
10Alicachi tucushcacunapash, upalla saquirijllami carca.
Paicunapaj shimihuambash na imata ni ushajchu carca.
11Pipash ñucata uyashpaca, ‘ninanda alicachi tucushcami cangui’ ninajunmi carca.
Ñucata ricujcunapash, ñuca imashna ali cajtami parlanajun carca.
12Imagutapash na charij runa caparijujpica, ñucami caraj carcani.
Taita mama illaj huahuagutaca, ñucami tucuipi yanapaj carcani.
13Ña huañugrijuj runapash, bendiciashpami saquihuan carca.
Sapalla mamagu huacajujpipash, ñucami yanapaj carcani.
14Tucuicunamanmi alita rurashpa pactachij carcani.
Chaicunami, ñucataca quilpajshna charihuan.
Chashna ali rurashcami, jahualla churajushcashna quilpahuarca.
15Ñausashna causajcunapajca ñucami ali ricujujshna carcani.
Jangacunapajca, ñucami paicunapaj chaquishna carcani.
16Imagupash illajcunapajca, taitashnami carcani.
Carumanda shamuj gentecunamandaca, ñucami rimaj carcani.
17Na alita ruraj runacunataca upallayachishpami,
llaquichij tucunajuj gentecunataca cacharichij carcani.
18Cashnami nijuj carcani: ‘Maipi sirijushcapimi huañusha.
Nara huañushpaca, unai huatacunatami causasha’ nijujmi carcani.
19Ñuca causaica, yacu patapi yura shayajunshnami carca.
Malquicunapica, jamzi paramu urmajujshnami carca.
20Ñucataca, ninandami alicachinajun carca.
Ñucapash ashtahuanmi ushaita charishpa catijuj carcani.
21Tucuicunami ñucataca uyanajun carca.
Ali yuyaita ñuca cujpica, upallami uyanajun carca.
22Ñuca imata nishcatapash na tigrashpa tapujchu carca.
Ñuca ima nishcatapash tucuitami chasquinajun carca.
23Chaquishca punllacunapi, tamia shamunatashnami shuyanajuj carca.
Chaquishca alpa yacuta shuyajshnami shuyanajun carca.
24Imamanda ñuca asijpipash, paicunaca na crinajunllu carca.
Ñucata ricushpaca, ninandami cushijunajun carca.
25Paicuna imata ruranatapash, ñucami ricujun carcani.
Paicunapaj chaupipica, jatun mandajshnami tiyajuj carcani.
Macanajuj runacunata mandajshnami causajurcani.
Huacashpa llaquihuan causajcunatapash cushichijunmi carcani.
Who We AreWhat We EelieveWhat We Do
2025 by iamachristian.org,Inc All rights reserved.
