PROVERBIOS 21 - Quichua Imbabura 2016

1Larcacunatami, yacucunaca maiman cashpapash rinajun.

Chashnallatami Mandaj Diosca, jatun mandajcunapaj shungutaca,

imata ruranatapash yarichijun.

2Runaca, imata rurashpapash, paipaj yuyaipica, alimi yajunmi.

Ashtahuangarin, Mandaj Diosllami imashna cajtapash ali ricujun.

3Alitalla rurashpa, aligutapacha ricushpa mandajpimi, Mandaj Diosca alicachin.

Animalta carashpa huañuchishcatapash yalimi alicachin.

4Jariyashpa ricunapash, shungupi ninanda jariyanapash juchami.

Diosta na manllajcunashna yarijunapash juchallatami.

5Aliguta yarishpa imatapash rurajpica, tucui alimi llujshinga.

Ashtahuangarin, musparishpa, imatapash yangata rurajpica, imapash na ali llujshingachu.

6Imatapash llullashpa, yangata charijyashpaca, yangami canga.

Chashna rurashpaca huañuimanmi rinajun.

7Diosta na cazujcunataca, paicuna shuhuashcallatami tucuchinga.

Alitalla rurangapa na munashcamandami, chashna tucunga.

8Na ali runacunapaj causaica, pandarinalla na rijsishca ñanshnami.

Ashtahuangarin, alitalla rurashpa causajcunapajca, imatalla rurashcapash alimi llujshin.

9Huasi jahua uchilla ucupi causanami ashtahuan ali.

Jatun huasipi causashpapash, imatapash nirijushpa fiñachinlla huarmihuan causanapa randica.

10Diosta na manllaj runaca, na ali yuyaicunatallami charin.

Paipaj cumbatapash, napacha llaquingachu.

11Na cazushpa asij runata llaquichijta ricushpaca,

na yachajushca runapash ali yachajungallami.

Alipacha yachajushca runacarin,

shinlli tacurijpillata, ashtahuan yachajungallami.

12Diosca, na ali gentecunapaj huasitapash ricujunmi.

Chai na ali gentecuna llaquita apanajujtapash ricujunmi.

13Huajcha runagu caparishpa mañajujpipash, na uyaj runataca,

Pai mañajujpipash, Diosca napacha uyangachu.

14Imata cashpapash pacalla carashpaca, ninanda fiñarishcatapash alichinmi.

Pacalla imata carashcatapash japishpaca, ninanda fiñarishcatapash yalichinmi.

15Alitalla ruraj runaca, alitalla rurashpami cushijun.

Ashtahuangarin, na alita ruraj runaca, na alita rurashcamandami, llaquichi tucun.

16Ali yachajushpa causangapa na munaj runaca,

huañushpa chingashcacunahuanmi tandanajugringa.

17Imapipash yangata culquita tucuchij runaca, huajchami causanga.

Vinotapash, mishquilla ashnajun yacutapash alicachij runaca, napacha charijyangachu.

18Diosta na cazujcunami, alitalla rurajcunapaj randi llaquita apanga.

Shinallata, ali yuyaihuan causajcunapaj randica,

yachashpata na cazuj runacunami, llaquita apanga.

19Jichushca pambapi causajgrinami ashtahuan ali.

Imatapash nirijujlla, ninanda fiñarijlla huarmihuan causanapaj randica.

20Alipacha yachajushca runapaj huasipica,

aceitepash, tucui ima alicunapashmi tiyan.

Ashtahuangarin juizu illaj runaca, tucuillata tucuchinllami.

21Alitalla rurashpa, juyaihuan causaj runaca,

causaitapash, alitalla rurashpa, alicachi tucunatapashmi charin.

22Ali yachajushca runaca, ashtahuan shinllicunapaj pueblotapash quichurcallami.

Ashtahuan shinlli pircata, na urmachingachu yashcatapash urmachircallami.

23Imatapash cacharishcata rimanamanda jarcarij runaca,

llaquicuna japinamandami quishpirin.

24Jariyashca, na ali runataca, 'paica napacha cazuj runami' nishpami rijsin.

Paica, pitapash na cazushpa, pai munashcata rurashpami purin.

25Imata rurangapapash na munaj runaca,

imatapash munaitalla munashpami huañujun.

26Paica, punllandimi imatapash munashpalla causan.

Ashtahuangarin, alitalla ruraj runaca, na mitsashpa caranllami.

27Na ali gentecuna, animalta Diosman carashcataca, napacha chasquinchu.

¡Na ali shunguhuan carajpicarin, napacha ricunayachinllu!

28Llullashpa villaj runaca, tucuringallami.

Ashtahuangarin, uyashcatapacha villaj runaca, villashpa catijungallami.

29Diosta na manllaj runaca, na alita rurashpapash, na rurashcashnami ricujun.

Ashtahuangarin, alitalla ruraj runaca, ali causaitami charin.

30Alipacha yachajushca canapash,

ali yuyaita charinapash, ali yuyaita cushcapash,

Mandaj Diospaj ñaupajpica, imapash na canllu.

31Macanajui punllapaca, caballocunahuanmi ninanda alichirinajun.

Ashtahuangarin, Mandaj Diospaj ushaihuanllami mishai ushanga.