Psalms 115 - Quichua Imbabura 2016

Taita Diosmandapash, rurashcalla dioscunamandapash

1Mandaj Dioslla,

Canllami ninanda alicachi tucuna capangui.

Ñucanchica, yangallatami capanchi.

Ashtahuangarin, Can ninan ushaita charishcamandami alicachina canchi.

Cambaj juyaimanda, tucuita pactachij cashcamandami alicachina canchi.

2Gentecunaca:

“¿Imashpata cunanga, cambaj Taita Diosca maipitayari?” ninajunga.

3Ñucanchi Taita Diosca, jahua pachapimi.

Paica, tucui ima munashcatami rurashca.

4Paicunapaj yanga dioscunaca, curihuan, culquihuan rurashcallami.

Runacunapaj maquihuanlla, rurashcacunami.

5Shimita charishpapash, na parlanajunllu.

Ñavita charishpapash, na ricunajunllu.

6Rinrita charishpapash, na uyanajunllu.

Singata charishpapash, na ashnachinajunllu.

7Maquita charishpapash, na tacarinajunllu.

Chaquita charishpapash, na purinajunllu.

Cungata charishpapash, na rimanajunllu.

8Chai dioscunata rurajcunaca, chaicunaman rijchajcunami.

Chai dioscunata yariashpa causajcunapash, chashnallatami.

9Israelcunalla,

Mandaj Diostalla yariashpa causaichi.

Paimi, jarcarina escudoshna yanapanga.

10Aaronbaj miraicunalla,

Mandaj Diostalla yariashpa causaichi.

Paimi, jarcarina escudoshna yanapanga.

11Mandaj Diosta manllajcunaca, Mandaj Diostalla yariashpa causaichi.

Paimi, jarcarina escudoshna yanapanga.

12Mandaj Diosca, ñucanchita yarishpami bendicianga.

Taita Israelpaj miraicunataca bendiciangami.

Aaronbaj miraicunatapash bendiciangami.

13Mandaj Diosca, Paita manllajcunataca,

huajchacunatapash, charijcunatapash bendiciangami.

14Mandaj Diosca cangunataca, ashtahuan, ashtahuanmi bendicianga.

Cangunatapash, cangunapaj miraicunatapashmi bendicianga.

15Cangunaca, Mandaj Dios bendiciashcami canguichi.

Paimi, jahua pachatapash, cai pachatapash rurarca.

16Jahua pachaca, Mandaj Diospajmi.

Cai pachataca, huañuna aichayuj runacunamanmi cushca.

17Huañushcacunaca, Mandaj Diostaca na alicachi ushangachu.

Alpa ucuman urai rijcunaca, na alicachi ushangachu.

18Ashtahuangarin ñucanchica, Mandaj Diostami alicachishun.

Causaita causaicamanmi, Paitaca alicachishun.

Aleluya.