1Jatun Diostaca, altar jahuapi shayajujtami ricurcani. Paica cashnami nirca:
“Pungu pilarpi tiyaj capitelcunata urmachingui.
Chai pungucunapash, tucuicunapaj uma jahuapi urmashpa ñuturichun, cuyuchishpa urmachingui.
Chaipi maijambash na huañujpica, espadahuanmi huañuchisha.
Paicunamandaca pipash na calpanajungachu,
pipash na quishpiringachu.
2Seolcaman allashpa pacajujpipash, Ñuca maquihuanmi, chaimandapash llujchisha.
Jahua pachacaman vichai rijpipash, chaimandapashmi urai tigrachimusha.
3Carmelo shuti urcu pundapi pacajujpipash, chaipipash mascashpami tarisha.
Ñuca ñavimanda pacajungapa mama cucha ucu ucuman yaicujpipash, culebra canichunmi cachasha.
4Paicunata fiñajcuna, prezu apashpa huatashcashna charinajujpipash,
espadahuan huañuchinajuchunmi cachamusha.
Paicunata ñuca ñavihuan ricushpapash, llaquichingapallami ricusha.
Alita rurangapaca na ricushachu” nihuarcami.
5Tucuita Mandaj Jatun Dios tacarijpimi, cai pachaca yacuyanga.
Cai pachapi causajcunapash, tucuicunami ninanda huacanajunga.
Cai pachaca, jatun yacushnami miranga.
Chai jipaca, Egipto jatun yacushnami cutin ashalla tucunga.
6Mandaj Diosca, pai causana ucucunataca, jahua pachapimi rurashca.
Shinllipacha shicanyachijundaca, cai pacha jahuamanmi churashca.
Paimi, mama cucha yacucunata cayashpa, alpa jahuapi jichajun.
Paica, Mandaj Dios shutimi.
7Mandaj Diosca, cashnami nin:
“Israelcunalla, cangunaca Ñucapaca, ¿nachu Etiopía llactapi causajcunashna canguichi?
¿Nachu Egipto llactamanda cangunata llujchishcashnallata,
filisteo gentecunatapash Caftor llactamanda,
arameo gentecunatapash, Kir shuti llactamanda llujchimurcani?
8Mandaj Jatun Dios Ñucaca, juchatalla rurashpa causaj llactataca fiñashpami ricujuni.
Shinamandami, chai llactapi causajcunataca, anchuchishpa tucuchisha.
Shina anchuchijushpapash, Mandaj Dios Ñucaca,
Jacobpaj miraicunataca, napacha tucuillata tucuchishachu.
9Ñucami Israelcunataca, tucui llactapuracunapi shuj shushunapi shushui tucushcashna cachun saquisha.
Chaipica, shuj granogullapash na alpaman urmangachu.
10Ñuca agllashca gentecuna juchata rurashpaca, espadahuanmi huañuchi tucunajunga.
Paicunaca cashnami ninajun:
‘Llaquicuna na ñucanchipajman shamungachu, japitapash na japingachu’ ninajunmi.
Israelcunata cutin alichinamanda11Chai punllapica, Davidpaj jatun carpa urmashcataca, cutinmi shayachisha.
Paicunapaj pirca tunirishpa utujurishcatapashmi, alichisha.
Tucui imalla urmashcatapashmi shayachisha.
Ñaupa punllacunapi cashcashnallatami, paicunataca shayachisha.
12Ñuca shutipi mañashpa causajcunami,
Edom llacta asha saquirishcatapash, tucui llactacunatapash paicuna japinajuchunmi, chashna shayachisha” ninmi Mandaj Diosca.
Paica, chaitaca pactachingapachami.
13Mandaj Diosca cashnatapashmi nin: “Chai punllacunaca ñami chayamujun.
Nara tucuillata tandachijpillatami, yapuna punllacuna chayamunga.
Shinallata nara vinota rurashpa tucuilla tucuchijpillatami, uvacunata tarpuna punllacuna chayamunga.
Llullu vinoca, yacushnami urcucunapipash, lomacunapipash jicharijunga.
14Ñuca agllashca Israelcuna prezu apai tucushcataca tigrachimushami.
Paicuna tigramushpami, jichushca pueblocunata shayachishpa chaipi causanajunga.
Paicunaca, uvata tarpushpami, vinotapash ufianajunga.
Pambacunata tarpushpami, chaipi fucushcacunatapash micunajunga.
15Paicunataca, paicunapaj alpapillatami tarpujshna churasha.
Ñuca paicunaman carashca alpamandaca, napacha cutinga fitishpa anchuchishachu” ninmi cangunata Mandaj Taita Diosca.
Who We AreWhat We EelieveWhat We Do
2025 by iamachristian.org,Inc All rights reserved.
