2 CRÓNICAS 36 - Quichua Imbabura 2016

Joacaz shuti runa mandajushcamanda(2 Rey. 23:31-35)

1Chai llactapi causaj gentecunaca, Josías shuti runapaj churi Joacaz runatami, paipaj taitapaj randi jatun mandaj cachun, Jerusalenbi churanajurca.

2Joacaz shuti runaca, ishcai chunga quimsa huatata charishpa, mandai callarishpami, quimsa quillatalla Jerusalenbi mandajurca.

3Paitaca, Egipto llactata jatun mandajmi, Jerusalenmanda anchuchishpa, Judá llactapi causajcunataca, sucta chunga pusaj quintal culquita, quimsa chunga chuscu kilo curita cushpa causanajuchun mandarca.

4Egipto llactata jatun mandajca, Judá llactata, Jerusalenda jatun mandaj cachunga, Joacaz runapaj huauqui Eliaquim runatami churarca. Paitaca, Eliaquim cajpipash, Joacim shutitami shutichirca. Paipaj huauqui Joacaz runataca, Necao shuti runami Egipto llactaman aparca.

Joacim shuti runa mandajushcamanda(2 Rey. 23:36—24:7)

5Joacim shuti runaca, ishcai chunga picha huatata charishpa mandai callarishpami, chunga shuj huatata, Jerusalenbi mandajurca. Paica, paita Mandaj Taita Diospaj ñaupajpica, na alitallami rurajurca.

6Babilonia llactata jatun mandaj Nabucodonosor shuti runaca, paihuan macanajungapa vichai shamushpami, cadenacunahuan huatashpa, Babilonia llactaman aparca.

7Babilonia llactata jatun mandaj Nabucodonosor runaca, Mandaj Diospaj huasipi imatalla charishcatapashmi aparca. Chaicunataca, Babilonia llactapimi paipaj diospaj huasipi churarca.

8Ashtahuan imatalla Joacim shuti runa rurashcapash, ninan na ricunayaicunata rurashcapash, pai imashna llaquichi tucushcapash, Israel llactata, Judá llactata jatun mandajcuna imatalla rurashcacunata quilcashcapimi tiyajun. Paipaj randica, Joaquín shuti paipaj churimi mandajurca.

Joaquín runata, Babilonia llactaman prezu apashcamanda(2 Rey. 24:8-17)

9Joaquín shuti runaca, chunga pusaj huatata charishpa, mandai callarishpami, quimsa quilla chunga punllatalla, Jerusalenbi mandajurca. Paica, Mandaj Diospaj ñaupajpica, na alitallami rurajurca.

10Ña huata jipami, jatun mandaj Nabucodonosor runaca, Joaquín runata pushachun cachashpa, Babilonia llactaman aparca. Paitaca, Mandaj Diospaj huasipi tiyaj ashtahuan juyailla charishcacunandimi aparca. Paita apashpaca, paipaj huauqui Sedequías shuti runatami, Judá llactata, Jerusalén pueblota, jatun mandaj cachun churarca.

Sedequías runa mandajushcamanda(2 Rey. 24:18-20; Jer. 52:1-3)

11Sedequías runaca, ishcai chunga shuj huatata charishpa, mandai callarishpami, chunga shuj huatata, Jerusalenbi mandajurca.

12Paica, paita Mandaj Taita Diospaj ñaupajpica, na alitallami rurajurca. Profeta Jeremías, Diosmanda villajujpipash, napacha uyangapa munarcachu.

13Shinallata jatun mandaj Nabucodonosor runatapashmi, fiñashpa na cazurca. Sedequías runaca, chai jatun mandajmanmi, Taita Diospaj shutipi cazungapa juramentushca carca. Chashna shinlliyashca cashpami, shinlli shungu tucushpami, Israelcunata Mandaj Taita Diospajman tigraringapaca napacha munarca.

14Shinallata, sacerdotecunata mandajcunapash, tucui gentecunapashmi, ashtahuan na alitalla rurashpa catinajurca. Shuj llactacunapi causajcunashna, na alita rurashpami, Mandaj Diospaj huasitapash mapayachinajurca. Jerusalenbi tiyaj chai huasitaca, Mandaj Diosmi Paipajlla cachun shicanyachishca carca.

15Paicunapaj ñaupa taitacunata Mandaj Taita Diosca, Pai agllashca gentecunatapash, Paipaj huasitapash llaquishpami, Pai ima nishcata villajcunahuan, cutin cutin villajurca.

16Ashtahuangarin paicunaca, Taita Dios cachamushca villajcuna villanajujtaca, na cazushpami, yangapi churarca. Dios villachishca shimicunataca yangapi churashpami, profetacunatapash asishpa ricunajurca. Pai agllashcacuna chashna ninanda fiñachijpimi, Mandaj Dios ninanda fiñarishpa llaquichinapacha carca.

Judá llactapi causajcunata prezu apashcamanda(2 Rey. 25:8-21; Jer. 39:8-10; 52:12-30)

17Judá llactapi causajcunata llaquichinajuchunga, caldeocunapaj jatun mandajtami cachamurca. Paimi, chairalla viñaicunataca, Diospaj huasi ucupillata espadahuan huañuchijurca. Huambracunata, cuitsacunata, rucucunata, tucuicunatami na llaquishpa huañuchijurca. Paicunataca, tucuillatami jatun mandajpaj maquipi churarca.

18Shinallata, Taita Diospaj huasipi tucui imalla tiyashcatami chai mandajpaj maquipi saquirca. Mandaj Diospaj huasipi, jatun mandajpaj huasipi, cati mandajcunapaj huasipi, ima juyailla tiyashcatapash tucuillatami Babilonia llactaman aparca.

19Taita Diospaj huasitapash rupachishpami, Jerusalén muyundipi jatun pircatapash urmachinajurca. Mandashpa tiyajuna huasicunatapash rupachishpa tucuchishpami, chai huasicunapi ima juyailla tiyashcacunatapash, tucuillata tucuchinajurca.

20Espadahuan huañuchi tucunamanda pacajushpa saquirishcacunaca, Babilonia llactamanmi prezu apai tucunajurca. Paicunaca, Persia llactapi causajcunata jatun mandaj shamungacamanmi, Nabucodonosor runapash, paipaj churicunapash mandashcata rurashpa causanajurca.

21Jeremías runahuan, Mandaj Dios villachishca pactachunmi, chashna rurajurca. Paicunata chai llactaman prezu apajpimi, Judá llactapi alpacunaca canchis chunga huatacuna pactangacaman samarca.

Ciro shuti jatun mandaj, Jerusalenman tigrachun mandashcamanda(Esd. 1:1-4)

22Ciro shuti jatun mandajca, Persia llactataca ñami shuj huatata mandajurca. Chai huatapimi Mandaj Diosca, Jeremías runahuan villashca pactachun, Mandaj Diosllata, Persia llactata jatun mandaj Ciro shuti runaman shuj yuyaita curca. Shinamandami, pai mandajuj tucui llactacunapica shimihuanbash, quilcachishpapash cashna nichun mandarca:

23“Persia llactata jatun mandaj Ciro shuti runami, cashna nin: Jahua pachapi causajuj Mandaj Taita Diosmi, cai pachapi tiyaj tucui llactacunata mandachun cuhuarca. Paillatami, Judá llactapi tiyaj Jerusalén pueblopi Paipaj huasita shayachijuchumbash mandahuarca. Shina cashcamanda, Diosta catijcuna tiyashpaca, Judá llactaman tigrachunlla. Paicunata Mandaj Taita Diosca, paicunahuan cachun” nishpami villarca.