1 SAMUEL 23 - Quichua Imbabura 2016

Jichushca pambapi pacajungapa, David rishcamanda

1Chai jipami Davidmanga cashna nishpa villanajurca: “Filisteocunaca, Keila shuti pueblopi causajcunata macashpami, granocunata shuhuashpa apanajun” ninajurcami.

2Shina cajpimi Davidca: “¿Filisteocunahuan macanajungapa rinallachu cani?” nishpa, Mandaj Diostaca tapurca. Shina tapujpimi Mandaj Diosca, Davidtaca: “Filisteocunahuan macanajushpa, Keila shuti pueblopi causajcunata quishpichigrilla” nirca.

3Ashtahuangarin Davidta catij runacunaca cashnami ninajurca: “Cai Judá llactapi cashpapash manllaihuanmi canchi. Keila shuti puebloman rishpa, filisteocunahuan macanajungapaca ashtahuanmi ninanda manllanchi” ninajurcami.

4Davidca, cutinmi Mandaj Diostaca tapurca. Shina tapujpimi Mandaj Diosca: “Keila shuti puebloman urai rilla. Ñucami filisteocunataca, cambaj maquipi churasha” nirca.

5Shina nijpimi Davidca, paita catij runacunandi, Keila shuti puebloman rishpa, filisteocunata mishashpa, animalcunatapash quichurca. Davidmi, Keila shuti pueblopi causajcunataca quishpichirca.

6Shinallata, Ahimelec runapaj churi Abiatar runaca, Davidta catishpami, Keila shuti puebloman, efod churajunata apashpa urai rijurca.

7Shinallata, Keila shuti puebloman David shamushcata, Saúl yachashpami: “Taita Diosmi, ñuca maquipi churashca. Chaimandami, Davidllata chai puebloman yaicushpa, pungucunata jarcanacunahuan vicharishca” yajurcami.

8Shinamandami Saulca, Keila shuti puebloman urai ringapa, tucuilla runacunata tandachirca. Paica Davidtapash, paipaj runacunatapash, chaupipimi churasha yajurcami.

9Chashna huañuchingapa Saúl shamujujta yachashpami Davidca, sacerdote Abiatartaca: “Efod churajunata apamui” nirca.

10Chai jipami Davidca, cashna nirca: “Israelcunata Mandaj Dioslla. Keila shuti pueblotaca ñucamandami, Saulca tucuchingapa shamujujta yachapani.

11¿Keila shuti pueblopi causajcunaca, Saulpaj maquipi saquihuangachu? ¿Ñuca uyashcashna Saulca, caiman shamungachu? Israelcunata Mandaj Dioslla, cambajta ruraj ñucaman, ima tucunatapash villahuailla” nijpimi, Mandaj Diosca: “Ari, paica shamungami” nirca.

12Chai jipami Davidca, cashna nirca: “¿Keila shuti pueblopi causajcunaca, ñucatapash, ñucata catij runacunatapash, Saulpaj maquipi churangachu imashi?” nijpimi, Mandaj Diosca: “Ari, shinami ruranga” nirca.

13Shina nijpimi Davidca, paita catij sucta patsaj runacunandi, Keila shuti pueblomanda llujshishpa, caiman chaiman purinajurca. Chai pueblomanda pacajushpa, David rishcata Saulman villajpimi, na ashtahuan catishpa saquirca.

14Davidca, jichushca pambapimi, pacajungapa rurashca utujucunapi pacajurca. Chai pushtucunaca, Zif shuti jichushca pamba lomapimi carca. Saulca, Davidtaca punllandimi mascajurca. Ashtahuangarin Mandaj Diosca, na paipaj maquipi churarcachu.

15Davidca, paita huañuchingapa Saúl mascajujta yachashpami, Zif shuti jichushca pambapi, Hores shuti pushtuman yalirca.

16Chaita yachashpami, Saulpaj churi Jonatanga, Hores shuti pushtupi Davidhuan tuparishpa: “Taita Diospaj ushaihuan shinlli tucungui” nijurca.

17Paica cashnami nirca: “Ama manllaichu, ñuca taita Saulca, candaca na taringachu. Canmi, Israelcunata jatun mandaj tucungui. Shinallata ñucapash, cambaj cati mandajmi tucusha. Chaitaca, ñuca taitapash alimi yachan” nircami.

18Cutinllatami Mandaj Diospaj ñaupajpica, ishcandillata pactachingapa ari ninajurca. Chai jipaca, Davidca, Hores shuti pushtupillata saquirijpimi, Jonatanga paipaj huasiman tigrarca.

19Chai jipami, Zif shuti pambapi causajcunaca, Gabaa puebloman vichai rishpa, Saulman cashna ninajurca: “¿Nachu Davidca, ñucanchi llacta Hores shuti pushtupi tiyaj jaca rumicunapi pacajushca canga? Chai jaca rumica, ¿Nachu jichushca pamba uraman tiyajuj Haquila pushtupi canga?

20Shina cashcamanda jatun mandajlla, can munashcashna ucha shamunguilla. Ñucanchica, can jatun mandajpaj maquipi churashunllami” ninajurcami.

21Shina nijpimi Saulca: “Ñucata llaquishcamandaca, Mandaj Diosllata cangunatapash bendiciapachun.

22Cunanga richilla. Maipi pacajushca pushtutapash, ali ricushpa rijsigrichi. Shinallata, maijan ricushcatapash, ali yachagrichi. Paica, imapapash ninan alipacha yachaj cajtami villahuashca.

23Ali ricushpa, maipilla pacajujtapash tapushpa, tucuita alipacha yachashpa villaj shamujpica, cangunahuan rishallami. Shinallata, tucui Judá llactata mascana cajpipash, mascashallami” nijurcami.

24Shina nijpimi paicunaca, Saulpaj ñaupajmanda rishpa, Zif shuti puebloman tigrarca.

Davidca, Arabá llacta uraman tiyajuj Maón shuti jichushca pambapimi, paita catij runacunandi purijurca.

25Saulca, paita catij runacunandimi mascangapa rijurca. Chaita Davidman villajpimi, Maón shuti jichushca pambapi tiyajuj jatun rumiman urai rirca. Chaita Saúl yachashpami, Maón shuti jichushca pambacaman Davidtaca catishpa rirca.

26Saulca, chai urcupillata, shuj ñanda rinajujpimi, Davidca paita catijcunandi, caishuj ñanda Saulmanda pacajungapa calpanajurca. Ashtahuangarin Saulca, paita catij runacunahuanmi, Davidtaca, paita catij runacunandi ña chaupipi churashca carca.

27Shina cajpimi, Saulpajman shuj villaj chayamushpaca: “Ucha shamui, filisteocunami, ñucanchi llactapi macanajungapa yaicumushca” nirca.

28Shina nijpimi Saulca, Davidta huañuchingapa catijushcata saquishpa, filisteocunahuan macanajungapa tigrarca. Chaimandami chai pambataca, “Sela-hama-lecot” nishpa shutichinajurca.

29Shinamandami Davidca, chaimanda vichai rishpaca, En-gadi shuti jichushca pambapi, pacajungapa rurashca utujucunapi causajurca.