ÉXODO 11 - Quichua Imbabura 2016

Punda huacharishcacunata huañuchinata villashcamanda

1Mandaj Diosca, Moisestaca cashnami nirca: “Faraondapash, Egipto llactatapash, llaquichinarami cani. Chashna llaquichishca jipaca, paillatami cangunataca caimanda richun saquinga. Cangunataca, tucuillatami caimanda llujchishpa cachanga” nircami.

2Cunanga, Ñuca agllashca gentecunataca cashna ningui: “Jaricunapash, huarmicunapash, cangunapaj quimiriapi causajcunataca, curimanda, culquimanda rurashca juyaillacunatami mañagrina canguichi” nircami.

3Mandaj Diosca, Egiptopi causajcuna, Israelcunata llaquichunmi, llaquina shunguta churarca. Shinallata Moisespash, Egipto llactapica, Faraonbaj cati mandajcunapaj ñaupajpipash, chai llactapi causajcunapaj ñaupajpipashmi alicachi tucushca carca.

4Moisesca faraondaca cashnami nijurca: “Mandaj Diosca cashnami nirca: ‘Egiptopi causajcunapaj chaupitaca, Ñucami chaupi tuta yaligrini.

5Punda churicunami, Egipto llactapica tucuilla huañunga. Mandangapa tiyarinapi tiyajun Faraonbaj punda churimanda callarishpa, rumipi cutashpa shujcunapajta ruraj huarmipaj punda churicamanmi huañunga. Shinallata, punda huacharishca jari animalcunapashmi tucuilla huañunga.

6Tucuilla Egipto llactapimi, ninan caparinajui tiyanga. Ima punllapash chashnaca na tiyashcachu. Jipa punllacunapipash chashnaca na tiyangachu’ nircami.

7Ashtahuangarin, tucuilla Israelcunataca, runacunamanda callarishpa, animalcunacaman alcullapash na huacangachu. Chashna cajpimi, Egiptopi causajcunahuan, Israelcunahuan, Mandaj Dios Ñuca shicanyachishcataca yachanguichi' nircami.

8Shina cajpimi cambaj cati mandajcunapash, ñucapajman urai shamushpa, ñuca ñaupajpi cungurishpa cashna ninajunga: ‘Cambash, can mandajuj tucuilla gentecunapash ripaichilla’ ninajungami. Shina nijpimi, ñucaca llujshishpa risha” nijurcami.

Shina nishpallami Moisesca ninanda fiñarishpa, Faraonbaj ñaupajmandaca llujshishpa rirca.

9Mandaj Diosca, Moisestaca cashnami nirca:

“Faraonga, cangunataca na uyangapa munangachu. Pipash na ricushcacunata ashtahuan rurashpa, Egipto llactapi Ñuca ricuchijuchunmi chashna tucunga” nircami.

10Faraonbaj ñaupajpimi, Moisespash, Aaronbash, pipash na rurai ushanallacunata rurashpa ricuchinajurca. Shina cajpipash Mandaj Diosllata, Faraonbaj shunguta shinlliyachijpimi, Israelcunataca, Egipto llactamanda llujshichunga napacha saquirca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help