1Etiopía llactapi tiyaj jatun yacuta yalishpa,
alascunahuajshna llaquichij gentecunalla, cangunaca ¡aij imachari tucunguichi!
2Paicunaca, villajcunatami sucusta rurashca canoacunapi,
mama cucha yacupi cachanajun.
Ninanda calpashpa, punchapamba ricunajuj manllanayai jatun runacunapajman villangapa richilla.
Paicunaca, tucuicunata manllachij runacunami.
Llactacunata mishashpa quichuj, shinllipacha runacunami.
Paicunapaj llactacunaca, jatun yacucuna muyushca llactami.
3Cai pacha llactacunapi causajcuna, caita uyaichi.
Urcucunapi banderata shayachijpica, alimi ricuna canguichi.
Trompetata huacachijpipash alimi uyana canguichi.
4Mandaj Diosca, cashnami nihuarca:
“Ñuca causajuj pushtumandami,
tamia yalishca jipa, indi juyailla punchayachijshna ricujusha.
Granota tandachina punllacuna ninanda rupajujpi, paramu fuyushnami carumanda ricujusha.
5Sisajui tucurishpa, granocuna fucujpi tandachina punlla nara chayajpillatami,
malquicunataca fitishpa anchuchinga.
6Chaicunataca, sachapi tiyaj alasyu animalcuna,
cai pachapi millai animalcuna micuchunmi saquinga.
Chaitaca, tamia pascarishca punllacunapash, tamia punllacunapashmi
cai pachapi millai animalcuna micunajunga.
7Chai punllacunapica, punchapamba ricunajuj manllanayai jatun runacunaca,
tucuita Mandaj Diosman cungapami ofrendacunata apamunajunga.
Paicunaca pundapash, cunambash, tucuicunata manllachishpa, llactacunata mishashpa quichuj, shinllipacha runacunami.
Paicunapaj llactaca, jatun yacucuna muyushca llactami.
Chai llactamandami, tucuita Mandaj Diospaj shutipi ofrendata cungapa, Sion urcuman shamunajunga” nihuarcami.
Who We AreWhat We EelieveWhat We Do
2025 by iamachristian.org,Inc All rights reserved.
