ISAÍAS 53 - Quichua Imbabura 2016

1Ñucanchi villashcataca, ¿pita cringapa munashcayari?

Mandaj Diospaj ninan ushaitaca, ¿pita ricushcayari?

2Mushujta viñajuj quirushnami, Diospaj ñaupajpica ricuringa.

Chaquishca alpapi, shinllita sapiyashca quirushnami ricuringa.

Paica, na juyailla ricurircachu.

Paita ricushpa, pipash catingapa munanaca na tiyangachu.

3Paitaca, na ricunayachishpa, yangapimi churashca carca.

Paica, ninan nanaicunahuan, ninan llaquicunatami apajurca.

Paitaca yangapi churashpami, pipash na ricunayachircanchi.

4Ñucanchipaj ungüicunatapash, nanaicunatapash Paimi aparca.

Ñucanchica, paitaca Taita Diosmi astishpa, ninanda llaquichijun yarcanchimi.

5Ashtahuangarin Paica, ñucanchi na cazushcamandami chugrichi tucurca.

Ñucanchi juchamandami, ninanda macai tucurca.

Ñucanchi ali causaita charichunmi, ñucanchipaj randi ninan llaquita aparca.

Pai chugrichi tucushpami, ñucanchi nanaicunatapash anchuchirca.

6Ñucanchica, llamacunashnami maitapash rishpa chingashcanchi.

Tucuicunami, ñanda japishpa maitapash rircanchi.

Ashtahuangarin Mandaj Diosca, ñucanchi juchacunatami Paiman apachirca.

7Paica, ninanda llaquichi tucujushpa nanaihuan cashpapash, imatapash na nircachu.

Maltun jari llamagushnami, huañuchina pushtuman apai tucurca.

Paica, milmata rutujcunapaj ñaupajpi llama upalla sirijujshnami, imatapash na rimarca.

8Paitaca, yangamanda juchachishpami, prezu aparca.

Chashna llaquicunata apajujpica, Paitaca pipash na yanaparcachu.

Paitaca, chashna llaquichishpami huañuchirca.

Dios agllashca gentecuna na cazushcamandami, chashna chugrichi tucurca.

9Paitaca, Diosta na rigsijcunahuanmi tandachishpa huañuchirca.

Paitaca, charijcunapaj pushtupimi pambarca.

Paica, ima na alitapash na rurarcachu, pitapash na llullarcachu.

10Shina cajpipash Mandaj Diosca, Paita ashtahuan llaquichingapa munashpami, chashna llaquichirca.

Ñucanchi juchamanda, Paipaj causaita cushpami, jipa punllacunapica, Paita catijcunata charinga.

Paica causaita causajushpami, Mandaj Diospaj ushaihuan mandajunga.

11“Pai llaquita apashcapash, na yanga cashcata ricushpami, ninanda cushijunga.

Mandaj Dios cachamushca, Paipajta ruraj cashpami, tucuicunapaj juchacunata ali yachashpami anchuchinga.

Paica, tucuicunapaj juchacunamandami Diosta mañajunga.

12Chaimandami Paitaca, alicachi tucushcacunahuan pacta churanga.

Paica, ninan ushaita charijcunahuanmi tucuita mishashpa cushijunga.

Chaimandami, huañuchi tucungacaman llaquichi tucurca.

Paica, tucui gentecunapaj juchacunata aparishpami, tucuicunamanda Diosta mañajurca.