FILEMON 1 - Quichua Imbabura 2016

“Alillachu capangui” nishcami

1Jesucristomanda prezu tiyajuj Pablomi, huauqui Timoteondi, Diospajta rurashpa ñucanchihuan pacta purij juyashca Filemonman quilcamunchi.

2Shinallata, Apia shuti juyashca panimambash, ñucanchi cumba alipacha villaj Arquipo shuti huauquimanbash, Filemonbaj huasipi tandanajuj crijcunamanbashmi, quilcamunchi.

3Ñucanchi Taita Diospash, Apunchi Jesucristopash, cangunaman ninan juyaita, ali causaita carachunmi munanchi.

Filemón runaca alipacha crij cashpami juyaita charishca

4Ñuca Taita Diosta mañajushpaca, canda yariashpami “pashi” nijunilla.

5“Apunchi Jesustaca alipacha crishpami, Diospajlla causajcunatapash, tucuillata juyajun” nijtami canmandaca uyarcani.

6Cambash ñucanchishnalla alipacha crishpa, Cristo Jesusmanda tucuita yachajushpa, aliguta rurashpa pactachijuchunmi mañajuni.

7Can juyashpa cushichishcamandami, ñucanchipash ninandapacha cushijushca canchi. Juyashca huauquigu, canmandami, Diospajlla causajcunapaj shungupash ninanda shinlli tucushca.

Pabloca, Onésimo shuti runagutaca “cutin chasquipangui” nishcami

8Can ali cajta yachashpami, Cristomanda ushaita charishpa, can imatalla rurachumbash mandai ushanilla.

9Shina cashpapash, candaca juyaihuanmi mañapani. Ña rucu Pablomi cani. Cunanga Jesucristomandami prezu tiyajuni.

10Caipi prezu tiyajujpimi, Onésimo runaguca crishpa, ñuca huahuashna tucurca. Paimandami candaca ninanda mañapani.

11Pundaca, paica, cambajca imapallapash na alichu carca, ashtahuangarin cunanga, cambajpash, ñucapajpash ñami alipacha tucushca.

12Paitami cambajman cutin cachamujuni. Paitaca, ñucatashnalla chasquipangui ninimi.

13Paitaca ñucahuan caipi saquirishpa, quishpirinamanda villajushcamanda ñuca prezu tiyajujpi, cambaj randi ñucapajta rurajuchunmi munaiman.

14Ashtahuangarin, can nara imatapash nijpillata, ñuca munaita rurangapaca na munarcanichu. Ama ñuca nijpilla rurashpa, ashtahuangarin, can aliguta yarishpa, canllata rurapanguilla ninimi.

15Onésimo runaguca, cambaj huasimandaca ashacamanllami llujshishpa rishcanga. Cunan can chasquijpica, huañuicamanmi canhuan causajunga.

16Ashtahuangarin, ama cambaj gañandashna charishpami, cambaj huauquitashna juyashpa charina capangui. Ñucapash, paitaca ninandami juyani. Apunchi Jesusta crij cajpimi, paitaca huauquitashna ninanda juyana cangui.

17Ñucapaj cumbapacha cashpaca, ñucatashnalla paitaca chasquipangui.

18Pai imatapash na alita rurashpa llaquichishca cajpi, imamandapash cunata charijpica, ñucaman villahuanguilla. Paimandaca ñucami ricupasha.

19Pablomi, ñuca maquihuambacha caitaca quilcamuni. Paimandaca, ñucami imata cashpapash tigrachipasha. Ashtahuangarin, cambashmi ñucaman cunata charingui nishpaca na yarichijunichu.

20Ari huauquigu, Apunchi Jesusta crij cajpi ima alitapash canmanda japingapami munani. Apunchi Jesusta crij cashcamandaca, ñuca shungupi cushichihuangui nipanimi.

21Ñuca nijujta can cazushpa, ashtahuan yalitapash ruranata yachashpami caitaca quilcamuni.

22Ñucata mingachingapapash alichijupangui. Canguna Diosta mañanajujta uyashpami, cangunapajman risha yashpa cushijushpa shuyajuni.

Aliguta causapanguichi, Dios bendiciapachun nishcamanda

23Cristo Jesusmanda ñucahuan prezu tiyajuj Epafras huauquipash, candaca “alillachu capangui” nijunmi.

24Ñucahuan Diospajta ruraj Marcos, Aristarco, Demas, Lucaspash, candaca “alillachu capangui” ninajunmi.

25Ñucanchi Apunchi Jesucristopaj ninan juyaica, cangunapi cachunmi munani. Chashna cachun.