NÚMEROS 13 - Quichua Imbabura 2016

Chunga ishcai runacuna, pacalla chapangapa rishcamanda(Deut. 1:19-33)

1Mandaj Diosca, Moisestaca cashnami nirca:

2“Canaán llactatami, Israelcunaman carana cani. Chai alpacunata pacalla ricugrichunmi, chunga ishcai ayllupuramanda, mandashpa ricunajuj runacunataca, shuj shujlla agllashpa cachana cangui” nirca.

3Shina nijpimi Moisesca, Parán shuti chaquishca pambamandaca, Mandaj Dios mandashcashna cacharca. Paicunami, Israel ayllucunata mandajcuna carca.

4Paicunapaj shuticunaca caicunami: Rubén ayllumandaca, Zacurpaj churi, Samúa shuti runa,

5Simeonbaj ayllumandaca, Hori shuti runapaj churi Safat shuti runa,

6Judapaj ayllumandaca, Jefonepaj churi Caleb,

7Isacar ayllumandaca, Josepaj churi Igal shuti runa,

8Efraín ayllumandaca, Nun shuti runapaj churi Oseas,

9Benjaminbaj ayllumandaca, Rafú shuti runapaj churi Palti shuti runa,

10Zabulonbaj ayllumandaca, Sodi shuti runapaj churi Gadiel,

11Josepaj churi Manasespaj ayllumandaca, Susi shuti runapaj churi Gadi,

12Danbaj ayllumandaca, Gemali shuti runapaj churi Amiel,

13Aserpaj ayllumandaca, Micaelpaj churi Setur,

14Neftalipaj ayllumandaca, Vapsi shuti runapaj churi Nahbi shuti runa,

15Gadpaj ayllumandaca, Maqui shuti runapaj churi Geueltami cacharca.

16Cai runacunatami Moisesca, chai alpacuna imashna cajta ricushpa tigramuchun cacharca.

Moisesca, Nun runapaj churi Oseastaca, Josuetami shutichirca.

17Moisesca, Canaán llactaman cachajushpaca cashnami nijurca:

“Caimandaca Neguev pambaman rishpami, chaimandaca urcuman vichai rina canguichi.

18Chaiman rishpami, Canaán llacta imashna cajtapash aligutapacha ricuna canguichi. Shinallata chai llactapi gentecunataca, shinlli cajta, na shinlli cajtapash, ashtaca cajta, ashalla cajtapashmi ali ricuna canguichi.

19Shinallata, paicuna causanajuj alpacuna ali cajta, na ali cajtapash, pueblocunapi carpa huasicuna cajta, na cashpaca muyundita jarcashpa shinlli patacunata rurashca cajtapashmi ricuna canguichi.

20Shinallata, alpacunapash ali cajta, na ali cajtapash, quirucunapash tiyajta, na tiyajtapashmi ricuna canguichi. Na manllashpami, chai llajtapi fucushca granocunataca apamuna canguichi” nircami.

Chai punllacunapica, punda fucushca uvata tandachina punllacunami carca.

21Paicuna vichai rishpaca, Zin shuti chaquishca pambamanda callarishpami, Rehob shuti pambacaman tucuita ricushpandi chayagrirca. Paicunaca Hamat shuti pushtumanmi yaicunajurca.

22Neguevman vichai rishca jipaca, Hebrón shuti llactacamanmi chayanajurca. Chaipimi, Anac shuti runapaj mirai Ahimán, Sesai, Talmai shuti runacuna causashca carca. Hebrón puebloca, Egiptopi tiyaj Zoán shuti pueblopash nara tiyajpillatami, canchis huatacunata pundata tiyashca carca.

23Chaimandaca, Escol shuti larca yacucamanmi chayanajurca. Chaimandami, uvacuna fucujuj malquita fitishpaca, shuj caspipi huatashpa, ishcai tucushpa apanajurca. Granadacunatapash, higocunatapashmi apanajurca.

24Uva fucujuj malquita Israelcuna apamushcamandami chai pushtutaca, “Escol shuti pugru pamba” nishpa shutichirca.

25Canaán llactata ricungapa rishpaca, chuscu chunga punllapimi tigramunajurca.

26Paicuna tigramushpaca, Cades pushtupi tiyajuj Parán shuti chaquishca pambamanmi chayamurca. Chaipimi Moisespash, Aaronbash, tucuilla Israelcunapash tandanajushca causanajurca. Chaipimi tucuicunaman, paicuna ricungapa rishca llacta imashna cashcataca villanajurca. Shinallata, chai llactamanda apamushca granocunatapashmi ricuchinajurca.

27Chaipimi, paicunaca cashna ninajurca:

“Can ricuchun cachashca llactataca ricurcanchimi. Chaipica, lechepash, balun mishquipash ninandapachami tiyan. Ricuichi, cai granocunataca chai llactamandami apamunchi ninajurcami.

28Shinallata, chai llactapi causajcunaca alipacha shinllicunami. Jatun pueblocunapash, alipacha pircacunahuan jarcashcami. Chaicunapica, Anac shuti runapaj miraicuna causanajujtapashmi ricurcanchi.

29Amalec shuti runapaj miraicunaca, Neguev llactapimi causanajun. Lomacunapica, heteo, jebuseo, amorreo gentecunami causanajun. Mama cucha manñacunapi, Jordán jatun yacu manñacunapica, cananeo gentecunami causanajun” ninajurcami.

30Shina villanajujpimi, Calebca, Moisespaj ñaupajpi shayanajuj gentecunata upallayachishpa, cashna nirca:

“Ucha vichai rishpa, chai llactataca ñucanchipaj cachun japigrishunchi. Ñucanchimi, paicunataca yali shinllicunapacha canchi” nirca.

31Ashtahuangarin, Calebhuan rishca runacunaca:

“Chai llactapi causajcunahuan macanajungapaca, na vichai ri ushanachu canchi. Paicunaca, ñucanchita yali shinllicunapachami” ninajurcami.

32Ricungapa rishpa tigramushca runacunaca, Israelcunamanga na alitami cashna nishpa villanajurca:

“Ñucanchi ricungapa rishca alpacunaca, causangapa na ali cajpimi, gentecunaca huañungalla. Shinallata, chai llactapi causajcunapash, ñucanchita yali jatungunapachami cashca.

33Shinallata, Anac shuti runamanda miraicunatapash, manllanayai jatun runacunatami ricurcanchi. Paicunapaj ñaupajpica, langosta jurucunashnallami carcanchi. Paicunapash ñucanchitaca, chai jurucunatashnami ricunajurca” ninajurcami.