JUECES 1 - Quichua Imbabura 2016

Judapaj, Simeonbaj ayllucunami Adoni-bezec runata prezu japinajushca

1Josué huañushca jipami Israelcunaca, Mandaj Diosta cashna nishpa tapunajurca: “Ñucanchipuramandaca, ¿maijangunata cananeo gentecunahuan macanajungapa, punda vichai rina capanchi?” nijpimi,

2Mandaj Diosca: “Judá ayllurami vichai ringa. Chai llactataca, paicunapaj maquipimi ña churarcani” nirca.

3Shina nijpimi Judá aylluca, paicunapaj huauqui Simeón ayllutaca cashna nirca: “Ñucanchiman carashca llactata japingapa vichai rishpa, cananeo gentecunahuan macanajushunchi. Ñucanchipash, canguna japina llactaman rishunllami” nirca. Shina nijpimi Simeón aylluca paicunahuan rirca.

4Judá ayllu runacuna vichai rijpimi, Mandaj Diosca, cananeo shuti, ferezeo shuti gentecunatapash, paicunapaj maquipi churarca. Chaimandami paicunataca, chunga huaranga gentecunata, Bezec shuti pueblopi huañuchirca.

5Adoni-bezec shuti jatun mandajtapashmi, Bezec shuti pueblopi tuparirca. Paihuambash macanajushpami, cananeo shuti, ferezeo shuti gentecunataca mishanajurca.

6Ashtahuangarin Adoni-bezec runaca, pacajungapami calpajurca. Shina calpajujta catishpa japishpami, maquimanda, chaquimanda mama dedocunata muchunajurca.

7Shina rurajpimi Adoni-bezec runaca, cashna nirca: “Canchis chunga jatun mandajcunatami, paicunapaj maquimanda, chaquimanda, mama dedocunata cuchuchircani. Paicunaca, ñuca micuna, meza ucuman urmashcatami micunajuj carca. Taita Diosca, ñuca imashna rurashcashnami chashnallata llaquichihuashca” nircami. Chai jipaca, Jerusalenman apajpimi chaipi huañurca.

Judá aylluca, Jerusalén, Hebrón pueblocunata mishashcamanda

8Judapaj miraicunaca, Jerusalenbi causajcunahuan macanajushpa, chai pueblota japishpami, chaipi causajcunataca espadahuan huañuchishpa, chai pueblotapash rupachinajurca.

9Chai jipami Judapaj miraicunaca, urcucunapi, Neguev shuti chaquishca pambacunapi, lomalla pambacunapi causanajuj cananeo gentecunahuan macanajungapa urai rirca.

10Shinallata Judá miraicunapashmi Hebrón shuti pueblopi causanajuj cananeo gentecunahuanbashmi macanajungapa rirca. Chai puebloca pundaca, Quiriat-arba shutimi carca. Chai pueblopimi, Sesai, Ahimán, Talmai shuti mandajcunatapash huañuchirca.

Otonielca, Debir shuti pueblota mishashpami, Acsa shuti huarmihuan cazarashca(Jos. 15:15-19)

11Chai pueblomandami Judá aylluca, Debir shuti pueblopi causajcunahuan macanajungapa rirca. Chai puebloca pundaca, Quiriat-sefer shutimi carca.

12Chaipimi, Caleb runaca cashna nirca: “Maijambash, Quiriat-sefer shuti pueblopi causajcunata macanajushpa mishashpa, chai pueblota japijpica, Acsa shuti ñuca ushitami, paipaj huarmi cachun cusha” nircami.

13Chai pueblotaca, Caleb runapaj jipa huauqui, Cenaz shuti runapaj churi Otonielmi japirca. Chaimandami Caleb runaca, Acsa shuti paipaj ushitaca, Otoniel runapaj huarmi cachun curca.

14Otoniel runaca, paipaj huarmita pushashpa rijushpami: “Tarpuna alpacunata cambaj taitata mañai” nishpa ari nichirca. Chaimandami, chai huarmi burrupi tiyajushcamanda uriajujpi, paipaj taita Caleb runaca: “¿Imatata ningui?” nishpa tapurca.

15Shina tapujpimi paica cashna nirca: “Ñuca mañashcata carahuayari. Neguev pambapica, ñami alpacunata carahuarcangui. Shinallata, pugyu yacucunatapash carahuayari” nircami.

Shina mañajpimi Caleb runaca, janajmambash, uramambash pugyucunata cararca.

Judapaj, Benjaminbaj ayllucunaca, ashtahuanmi alpacunata japinajushca

16Ceneo gentecunaca, Moisespaj huarmipaj taitapaj ayllumanda miraicunami carca. Paicunaca, palmera quirucuna tiyaj pueblomandaca, Judá llacta jichushca pambamanmi, Judá runapaj miraicunahuan vichai rinajurca. Chai pambaca, Arad shuti puebloman chayanalla Neguev shuti pambapimi carca. Paicunaca, chaipi causanajuj gentecunahuan causangapami, chaipi saquirirca.

17Judá aylluca, paicunapaj huauqui Simeón aylluhuan rishpami, Sefat shuti pueblopi causanajuj cananeo gentecunahuan macanajushpa misharca. Chaimandami chai pueblotaca, Horma shutita shutichirca.

18Judá aylluca: Gaza shuti pueblotapash, Ascalón shuti pueblotapash, Ecrón shuti pueblotapash, chai tucuilla alpacunandimi japirca.

19Judá aylluca, Mandaj Dios ushaita cujpimi, urcucunapi causajcunataca llujchishpa cachai ushanajurca. Ashtahuangarin jatun pambacunapi causajcunataca, jirru carretacunata charijpimi, na llujchishpa cachai ushanajurca.

20Moisés imashna mandashcashnami, Hebrón pueblotaca, Caleb runaman curca. Chai pueblomandami paica, Anac shuti runapaj quimsa churicunata llujchishpa cacharca.

21Ashtahuangarin Benjamín aylluca, Jerusalenbi causanajuj jebuseo gentecunataca na llujchishpa cacharcachu. Chaimandami jebuseo gentecunaca, Benjamín aylluhuan Jerusalenbi cunangaman causanajun.

Josepaj aylluca, Bet-el shuti pueblotami quichushca

22Josepaj mirai ayllupashmi, Bet-el shuti pueblopi causajcunahuan macanajungapa vichai rinajurca. Mandaj Diosca, paicunahuanmi carca.

23Josepaj mirai ayllucunaca, Bet-el shuti pueblopica, pacalla ricujcunatami churarca. Chai puebloca, pundaca Luz shutimi carca.

24Pacalla ricuj runacunaca, pueblomanda shuj runa llujshijujta ricushpa, tuparishpami: “Cai puebloman maita yaicunata ñucanchiman ricuchihuai. Shina ricuchijpica, candaca na huañuchishunllu” ninajurca.

25Shina nijpimi chai runaca, chai puebloman maita yaicunata ricuchirca. Chaimandami paicunaca, chai pueblopi causajcunataca, espadahuan huañuchinajurca. Ashtahuangarin chai runatallami, paipaj tucui ayllucunandi llujshishpa richun saquirca.

26Chai runaca, heteo gentecunapaj llactaman rishpami, shuj pueblota shayachirca. Chai pueblotaca, Luz shutitami shutichirca. Chai puebloca, cunangamanmi chai shutihuanllata tiyajun.

Manasespaj, Efrainbaj ayllucunaca, ashtahuanmi alpacunata japinajushca

27Bet-seán, Taanac, Dor, Ibleam, Meguido shuti pueblocunapi, chaicunapaj muyundi uchilla pueblocunapi causajcunataca, Manasés ayllupash na llujchishpa cachai usharcachu. Chaimandami cananeo gentecunaca, chai llactapillata causashpa catinajun.

28Shina cajpipash Israelcunaca, ashtahuan shinlli tucushpami cananeo gentecunataca, gañan cachun charishpa, na calpachirca.

29Efraín ayllupash, Gezer shuti pueblopi causanajuj cananeo gentecunataca, na llujchishpa cachai usharcachu. Shina cajpimi, cananeo gentecunaca, paicunahuanllatami Gezer shuti pueblopi causanajurca.

Caishuj ayllucunapash, ashtahuanmi alpacunata japinajushca

30Zabulón ayllupash, Quitrón shuti, Naalal shuti pueblocunapi causanajuj cananeo gentecunataca, na llujchishpa cachai usharcachu. Ashtahuangarin, paicunahuanllata causanajujpimi paicunapaj gañan cachun charirca.

31Aser ayllupash: Aco, Sidón, Ahlab, Aczib, Helba, Afec, Rehob shuti pueblocunapi causanajuj cananeo gentecunataca, na llujchishpa cachai usharcachu.

32Llujchishpa cachaita na ushashcamandami, Aser aylluca chai llactapi causanajuj cananeo gentecunahuan causanajurca.

33Neftalí ayllupash, Bet-semes shuti, Bet-anat shuti pueblocunapi causajcunataca, na llujchishpa cachai ushajpimi, chai llactapi causanajuj cananeo gentecunahuan causanajurca. Bet-semes shuti, Bet-anat shuti pueblocunapi causajcunataca, gañanguna cachunmi charirca.

34Amorreo gentecunaca, Dan ayllupaj miraicunataca urcucaman calpachishpami, jatun pambacunaman urai richunga na saquinajurca.

35Shinamandami amorreo gentecunaca, Heres shuti urcupi, Ajalón shuti, Saalbim shuti pueblocunapi causanajurca. Shina cajpimi, Josepaj mirai ayllucunaca, ashtahuan shinlli tucushpa, amorreo gentecunataca, gañanguna cachun charirca.

36Amorreo gentecunapaj mujunga, Acrabim shuti lomaman vichai rinamanda, Sela shuti pueblocamanmi carca, Chaimandapash vichai catijurcarami.