ÉXODO 7 - Quichua Imbabura 2016

1Mandaj Diosca, Moisestaca cashnami nirca:

“Ricui, Ñucami candaca, Ñucapaj randi Faraonda rimachun churani. Cambaj huauqui Aaronga, can ima nishcatami villajunga.

2Tucui imatalla Ñuca mandashcataca, paimanmi villana cangui. Cambaj huauqui Aaronmi, Israelcunata chai llactamanda cacharichunga, Faraonhuan rimajunga.

3Faraonbaj shungutaca, Ñuca shinlliyachijpimi na cacharinga. Ashtahuangarin Ñucallatami, Egipto llactapica, pipash na rurai ushanallacunata, ninan llaquicunatapash punllandi mirachishpa ricuchisha.

4Ashtahuangarin, Faraonga, cangunataca na uyangapa munangachu. Ñucami Egipto llactataca, Ñuca maquihuan ninandapacha llaquichisha. Israelmanda mirai huahuacunataca, shican shican shayachishpami cai Egipto llactamandaca llujchisha.

5Ñuca ninan ushaihuan, Egiptopi causajcunata llaquichishpami, Israelcunataca paicunapaj chaupimanda llujchisha. Shina cajpimi, Egiptopi causajcunaca Ñucataca, Mandaj Dios cajta yachanajunga” nircami.

6Shina nijpimi Moisespash, Aaronbash, Mandaj Dios mandashcataca tucuita pactachinajurca. Paicunaca chashnatapachami ruranajurca.

7Faraonhuan parlanajushca punllacunapica, Moisesca pusaj chunga huatatami charirca. Aaronga, pusaj chunga quimsa huatatami charirca.

Aaronbaj vara caspimanda

8Mandaj Diosca, Moisesmambash, Aaronmambash cashnami nirca:

9“Faraonga cangunataca: ‘Pipash na rurai ushanallata rurashpa ricuchihuaichi’ nijpica, Aarondaca cashna ningui: ‘Cambaj vara caspita japishpa, culebraman tigrachun, Faraonbaj ñaupajpi shitai’ ningui” nircami.

10Shina nijpimi Moisespash, Aaronbash, Faraonbajman rishpa, Mandaj Dios mandashcashna ruranajurca. Aaronga, paipaj vara caspitaca, Faraonbaj ñaupajpi, cati mandajcunapaj ñaupajpimi shitarca. Shina shitajpimi chai caspica, culebraman tigrarca.

11Shinamandami Faraonga, ali yachajcunata, brujucunatapash caya cacharca. Egipto llacta brujucuna shamushpami, paicuna yachashcahuan chashnallata ruranajurca.

12Paicunapaj vara caspicunatapash, tucuicuna shitajpimi chai caspicunaca, culebraman tigrarca. Ashtahuangarin, Aaronbaj vara caspimi, paicunapaj caspicunataca langarca.

13Chashnata ricushpami, Faraonbaj shunguca, Mandaj Dios imashna nishcashna, ashtahuan shinlliyashpa na uyangapa munarca.

Yacuta yahuarman tigrachishcamanda

14Shina cajpimi Mandaj Diosca, Moisestaca cashna nijurca:

“Faraonbaj shunguca shinlliyashcapacha cashpami, Israelcuna richunga na saquinga.

15Canga, tutamandata Faraonbajman ringui. Paica, Nilo yacumanmi llujshijunga. Culebraman tigrashca cambaj caspitallata apashpa, pai chayana yacu manñapi shuyangui.

16Paitaca cashna ningui: ‘Hebreocunata Mandaj Taita Diosmi, cashna nichun cachamuhuan: Ñuca agllashcacunataca, jichushca pambapi Ñucata alicachingapa richun saqui. Cunangaman na uyangapa munashcanguichu.

17Chaimandami Mandaj Diosca cashna nin: Caita rurajpimi Ñucataca, Mandaj Dios cajta yachangui. Cunanga, ñuca maquipi charijuj caspihuan jatun yacupi huactajpimi, yacuca yahuarman tigranga.

18Shinallata, chai jatun yacupi pijicunapash huañujpi, yacupash ashnayajpimi, Egiptopi causajcunaca, chai yacumanda ufiangapaca millanayachinga’ ninmi ningui” nijurcami.

19Mandaj Diosca, Moisestaca cashnatapashmi nirca:

“Aarondaca cashna ningui: ‘Cambaj vara caspita japishpa, Egiptopi tiyaj yacucunaman maquita chutangui. Shina rurajpimi jatun yacucunapash, larca yacucunapash, cuchayashca yacucunapash, alichishca yacucunapash yahuarman tigranga. Shinami, tucui Egipto llactapi yacucunaca yahuarman tigranga. Shinallata, caspita rurashca, rumita rurashca jarracunapi yacucunapashmi, yahuarman tigranga’ ningui” nircami.

20Moisespash, Aaronbash, Mandaj Dios mandashcatami ruranajurca. Faraonbash, paipajta rurajcunapash ricujtami, Aaronga vara caspita vichai churashpami Nilo yacuta huactarca. Shina huactajpimi, tucuilla chai yacuca yahuarman tigrarca.

21Shinallata chai jatun yacupi tiyashca pijicunapashmi huañurca. Yacupash, huaglishpa ashnayajpimi, Egipto llactapi causajcunaca na ufiai ushanajurca. Tucuilla Egipto llactapi yacucunami yahuarman tigrarca.

22Egipto llactapi causaj brujucunapash, paicuna yachajushcahuanmi, chashnallata ruranajurca. Ashtahuangarin Mandaj Dios imashna nishcashnami, Faraonbaj shunguca shinlliyarca. Shinamandami, paicunataca na uyanayachirca.

23Faraonga, chaita ricushpapash yangapi churashpami, paipaj huasiman tigrarca.

24Nilo yacumanda na ufiai ushashpami, tucuilla Egipto llactapica, chai yacu manñacunapi pugyucunata allanajurca.

25Mandaj Dios, jatun yacuta yahuarman tigrachishca jipamandaca, canchis punllacunami yalirca.