1 REYES 14 - Quichua Imbabura 2016

Jeroboam runata Dios llaquichinatami, Ahías runaca villashca

1Chai huatacunapimi, Jeroboam runapaj churi Abías huambraca, irquiyashpa huañugrijurca.

2Chaimandami Jeroboam runaca, paipaj huarmitaca cashna nirca:

“Ñuca huarmi cajta ama rijsichun, shuj churajunata churajushpa, Profeta Ahías causajuj, Silo shuti puebloman rilla. Cai llactapi ñuca jatun mandaj tucunataca, paimi villahuarca.

3Paiman carangapaca, chunga tandata, mishqui tandata, mangapi balun mishquitapash, apashpa paipajman rilla. Paimi, cai huahua ima tucunataca villanga” nircami.

4Jeroboam runapaj huarmica, tucuita chashna rurashpami, Silo shuti pueblopi, Ahías runapaj huasiman shamurca. Ahías runaca, ña rucugu cashpami, ñavipash na ali ricui ushajurca.

5Ashtahuangarin Mandaj Diosmi, Ahías runataca cashna nishca carca: “Jeroboam runapaj huarmimi, paipaj huañujuj huahua ima tucunata tapungapa, ama rijsichunga, shuj churajunata churajushpa shamunga. Pai shamujpica ima nina cashcata ninguilla” nishcami carca.

6Huasi punguta chai huarmi yaicumujunda Ahías runa uyashpami, cashna nirca:

“Jeroboam runapaj huarmi, yaicumuilla. ¿Imashpata na rijsinalla churajunata churajushca shamungui? Ñucami ninan llaqui tucunata canman villachun cachamushca runa cani.

7Jeroboam runapajman rishpa, cashna villagri: Israelcunata Mandaj Taita Diosca cashnami nin: ‘Ñucami candaca, Israelcunapaj chaupimanda agllashpa, ñuca agllashca Israelcunata mandaj cachun churarcani.

8Davidpaj huasi ucupuracuna mandanata quichushpami, canman curcani. Canga, na ñucapajta ruraj Davidshna canguichu. Davidca, ñuca mandashcacunata pactachishpami, tucui shungu cazushpa ñuca ñaupajpi alitalla rurashpa causajurca.

9Ashtahuangarin canga, cambaj punda taitacunatapash yalitami na alita rurashcangui. Canga, curita yacuyachishpa shuj dioscunata, imamambash rijchajcunata rurashpami, ñucataca saquishpa fiñachihuashcangui.

10Chaimandami Jeroboam runapaj huasi ucupurapica, jatun llaquita cachamugrini. Jeroboam runapaj miraicunataca gañan cajpi, na gañan cajpipash jaricunatami, Israelpuramandaca tucuchisha. Jeroboam runapaj huasi ucupuramanda miraicunataca, shujllatapash na saquishpami, huanuta fichashpa shitajshna tucuillata tucuchisha.

11Jeroboam runapaj miraipuramanda pueblopi huañujpica, alcucunami micunga. Maijambash pambapi huañujpica, jahuata rij alasyu animalcunami micunga. Mandaj Diosmi chashna nishca’ nishpa villangui.

12Canga, cambaj huasiman rilla. Puebloman can chayajhuanmi, huahuaca huañunga.

13Paimandaca, tucui Israelcuna ninanda yarishpa huacashpami pambanajunga. Jeroboam runapaj miraipuramandaca, paillami Israelcunata Mandaj Taita Diospaj ñaupajpica, ashallatapash ali ricurishca. Shina cashcamanda Jeroboam runapaj huasi ucupuramandaca, paillami pambai tucunga.

14Israelcunata paipaj randi mandachunga, shuj jatun mandajtami Mandaj Diosca churanga. Paimi, Jeroboam runapaj huasi ucupurataca, cai punllallata tucuchinga.

15Mandaj Diosca, yacu manñapi cuyurinajuj totoratashnami, Israelcunataca caiman chaiman cuyuchinshna llaquichinga. Paimi Israelcunataca, paicunapaj ñaupa taitacunaman cushca ali llactamanda llujchishpa, Éufrates yacu chimbacunaman, caiman chaiman cachanga. Asera shuti huarmi diosman rijchajcunata rurashpa, Mandaj Diosta fiñachishcamandami, chashna ruranga.

16Jeroboam runa juchata rurashpa, Israelcunatapash juchata rurachishcamandami, paicunata fiñajcunapaj maquipi churanga” nircami.

17Shina nijpi, Jeroboam runapaj huarmi rishpaca, Tirsa shuti pueblomanmi chayagrirca. Huasi punguta chai huarmi ña yaicujujpimi, huahuaca huañurca.

18Chai huahuataca, tucui Israelcunami ninanda yarishpa huacashpa pambanajurca. Mandaj Dios villashcashnallatami tucurca. Chaitaca, Paipajta ruraj profeta Ahías runami villashca carca.

19Jeroboam runa ashtahuan imatalla rurashcapash, jatun macanajuicunata rurashcapash, pai imashna mandajushcapash, Israel llactata jatun mandajcuna imatalla rurashcata quilcachishca libropimi tiyajun.

20Jeroboam runaca ishcai chunga huatatami mandajurca. Pai huañushpa, paipaj ñaupa taitacunahuan tandanajugrijpica, Nadab shuti paipaj churimi, paipaj randi mandajurca.

Roboam shuti runa mandajushcamanda(2 Crón. 12:1-16)

21Judá llactataca, Salomonbaj churi Roboam shuti runami mandajurca. Roboam runaca, chuscu chunga shuj huatata charishpami, mandai callarirca. Paica, chunga canchis huatatami, Jerusalenbi mandajurca. Chai pueblotaca Mandaj Diosmi, tucui Israel ayllupuramandaca, Paipaj shutita chaipi churangapa agllarca. Roboam runapaj mamaca, amonitapura Naama shutimi carca.

22Judá llactapi causajcunaca, mandaj Diospaj ñaupajpimi na alita ruranajurca. Paicunaca, paicunapaj ñaupa taitacuna tucui juchata rurashcatapash, ashtahuan yali na alita rurashpami, ninanda fiñachirca.

23Paicunapashmi, tucui loma jahuacunapi, fanga junda tucui quiru ucucunapi, Asera shuti huarmi diosman rijchaj rurashcalla dioscunata shayachinajurca.

24Chai llactapica, jaripurallata pacta siririshpa na alita ruraj sodomita runacunapashmi tiyarca. Israelcunapaj ñaupajmanda, Mandaj Dios llujchishpa cachashca gentecuna, na ricunayaicunata ruraj cashcashnallatami, paicunapash ruranajurca.

25Roboam runaca, ña picha huatata mandajujpimi, Egipto llactata jatun mandaj Sisac shuti runaca, Jerusalenbi causajcunahuan macanajungapa, vichai shamurca.

26Shina shamushpami, Mandaj Diospaj huasimandapash, jatun mandajpaj huasimandapash, imalla tiyashcacunata alichishcamanda llujchishpa, tucuillata aparca. Shinallata Salomón curihuan rurachishca, macanajuipi jarcarinacunatapashmi tucuillata aparca.

27Chai jarcarinacunapaj randica, jatun mandaj Roboam runaca, bronce jarcarinacunatami rurachirca. Chaicunataca, jatun mandaj mandana huasiman yaicuna pungupi chapaj runacunata mandajcunamanmi curca.

28Mandaj Diospaj huasiman jatun mandaj yaicujpica, chapaj runacuna shamushpami, chai jarcarinacunataca apashpa paihuan rinajun carca. Chai jipaca, chapaj runacunapaj ucupimi, tigrashpa saquigrin carca.

29Roboam runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna, imashna causashcata villajuj libropi quilcashca tiyajun?

30Roboam runaca, Jeroboam runahuanga tucui causaipimi macanajushpalla causanajurca.

31Roboam huañushpa, paipaj ñaupa taitacunahuan tandanajugrijpica, paipaj ñaupa taitacunata pambashcapillatami Davidpaj pueblopi pambarca. Paipaj mamaca, amonitapura Naama shutimi carca. Paipaj randica, Abiam shuti paipaj churimi mandajurca.