EZEQUIEL 45 - Quichua Imbabura 2016

1Alpata chaupiringapa, pipaj urmajta ricunajushpaca, Mandaj Dios Ñucamanmi asha alpataca saquina canguichi. Ñucapajlla cachun shicanyachishca alpaca, largomanga, chunga ishcai kilómetro chaupi, anchomanga chunga kilometromi canga. Chai alpaca tucuillami, ñucapajlla shicanyachishca tiyajunga.

2Chai alpamandaca, Ñucapaj huasita rurana alpataca, largomambash, ñaupamanbash ishcai patsaj picha chunga metrotami chaupina canga. Chai alpa muyundipi ishcai chunga picha metro ñaupajman tiyajuj pambaca, michina pambacunami canga.

3Shinallata, chunga ishcai kilómetro chaupi largota, picha kilómetro alpatami ricuna cangui. Chai alpapimi Ñucapajlla huasitaca, shuj ucutapash, Ñucapajlla cachun huasichina cangui.

4Ñucapajlla shicanyachishca chai alpaca, sacerdotecunapajmi canga. Paicuna, Mandaj Dios Ñucapajman shamushpami, Ñuca huasipi Ñucapajta ruranajunga. Chai alpapimi, sacerdotecuna causana huasita ruranapash, Ñucapajlla huasita ruranapash canga.

5Shinallata Ñuca huasipi, Ñucapajta rurashpa causanajuchun, levita sacerdotecunaman alpataca shicanyachinami. Chai alpaca, chunga ishcai kilómetro chaupi largota, picha kilómetro anchotami charinga. Chaipimi, ishcai chunga, huasicunata rurashpa causanga.

6Israelcuna causana pueblota rurangapaca, Ñucapajlla huasita rurangapa shicanyachishca ñaupajpimi, chunga ishcai kilómetro chaupi largota, ishcai kilómetro chaupi anchota tupushpa saquina canga.

7Mandaj runapaj alpaca, Ñucapajlla huasita rurana alpahuan caimambash, chaimambash quimiriami canga. Shinallata chai alpaca, pueblota rurana alpaman quimiriami canga. Ñucapajlla huasipa saquishca alpa ñaupapimi canga. Pueblota rurana alpa ñaupamambashmi canga. Chai alpaca indi llujshimujmanda, indi huashajuncamanmi canga. Chashnami mujungunaca, manñamanda manñacaman canga.

8Israel llactaca, chai alpatami pai causangapa charinga. Ñuca churashca mandajcunaca, Ñuca agllashcacunataca, na ashtahuan llaquichishpa causanajungachu. Ashtahuangarin mashna ayllucuna cajpipash, alpacunataca pactanatami, Israelcunaman cunga.

9Mandaj Diosmi cashnatapash nijun: “¡Israel llactata mandajcunaca: Llaquichinatapash, shuhuanatapash ñami saquina canguichi! Ashtahuangarin tucuicunapaj ali canatami, imatapash rurana canguichi. Ñuca agllashca gentecunataca, na ashtahuan llaquichinachu canguichi. Mandaj Diosmi Ñucami, cai shimicunataca” nijuni.

10Ali pezanata, efa nishcata cashpa, bato cashpapash ali pezanatami charina canguichi.

11Granopajpash, yacupajpash chashnallata ali tupunatami charina canguichi. Efapash, batopash chashnallata alimi pezajmi canga. Batoca, shuj homerta chungapi chaupishcami canga. Shinallata, efapash, shuj homerta chungapi chaupishcami canga. Chaica, homer pezanami canga.

12Shinallata shuj siclo culquica, ishcai chunga geratami pezanga. Sucta chunga siclo culquica, shuj minatami pezanga.

13Ñucaman imatalla cunataca, cashnami cuna canguichi: Trigotaca tucuilla tandachishpa sucta chungapi chaupishpaca, shuj chaupishcatami cuna canguichi. Cebadatapash chashnallatami rurana canguichi.

14Aceitetaca, patsaj litromandaca, shuj litrotami cuna canguichi.

15Juchacunamanda, Dioshuan ali tucungapa, animalcunata Diosman cushpa, tucuillata rupachingapaca, ishcai patsajmandaca shuj ali racuyashca llamatami, Israelcunamanda cuna canguichi. Mandaj Dios Ñucami chashna nini.

16Tucui cai llactapi causanajuj gentecunami, Israel llactata mandajmanga ofrendata cushpa pactachina canguichi.

17Paimi, jatun cushijui punllacunapi, llullu lunapi, samana punllapi, Israelcuna cushijuita rurana punllacunapi, animalta Ñucaman cushpa rupachinajuchun, vinotapash Ñucaman cushpa talichun cunga. Paillatami, juchacunata anchuchijuchun, Ñucaman cunatapash, animalta Ñucaman cushpa tucuilla rupachinatapash, Ñucahuan ali cangapa imaguta caranatapash, Israelcunapaj juchata anchuchijuchun Ñucaman cunataca cushpa pactachijunga.

18Mandaj Dios Ñucami cashna nini: “Huatapaj callari quilla, callari punllapica, chairalla shicuta Ñucaman cushpa huañuchingui. Shina rurashpallami Ñuca huasitaca, mapa illajta saquingui.

19Juchamanda cushca animalpaj yahuartaca sacerdotemi, Ñuca huasiman yaicunapipash, altarcunata churana chuscundi manñacunapi, huasi ucuman yaicuna llujshinapipash, pilarcunapipash javinga.

20Maijambash pandarishpa, na cashpaca maijambash umachijpi juchata rurashcamandaca, huatapaj callari quilla canchis punllapimi, chashnallata rurana cangui. Ñuca huasi ama mapa saquirichunmi, animalta chashna cuna cungui.

21Huatapaj callari quillapica, chunga chuscu punllapimi, pascua micuna punllataca, canchis punllacunacaman rurana canguichi. Chai punllacunapica, levadura illaj tandatami micuna canguichi.

22Chai punllapica mandaj runami, paipaj juchamandapash, cai llactapi causaj gentecunapaj juchamandapash, shuj shicuta Ñucaman cushpa huañuchinga.

23Chai pascua micuna cushijuipica, tucuilla canchis punllapica, punllandimi canchis alipacha shicucunata, canchis jari llamacunata, Mandaj Dios Ñucaman cushpa tucuillata rupachinga. Shinallata cangunapaj juchamandapash, canchis punllacamanmi punllandi, shuj jari chivota huañuchinga.

24Maltun shicuhuanga, ishcai chunga ishcai kilo jacuhuanmi cuhuanga. Shinallata jari llamahuanga, ishcai chunga ishcai kilo jacuhuanmi cuhuanga. Ishcai chunga ishcai kilo jacuhuanga, sucta litro yali aceitetami cuhuanga.

25Mandajca, canchis quilla chayajpi chunga picha punllapi cushijuita rurashpaca, canchis punllapi rurashcashnami ruranga. Juchamanda animalta cunatapash, tucuillata rupachina animalta cunatapash, ofrendatapash, aceitetapash tucuillatami cushpa pactachinga” nircami.