1Mandaj Diosca, cashnatapashmi nin: “Chai punllacunapica, Judá llactata jatun mandajcunapaj, cati mandajcunapaj, sacerdotecunapaj, profetacunapaj, Jerusalenbi causajcuna huañushcacunapaj tullucunatami, pambashca utujucunamanda llujchinajunga.
2Chai tullucunataca, indiman, lunaman, jahua pachapi tiyaj tucui luzerocunamanmi shitanajunga. Paicuna causashpaca, chaicunatami juyashpa, catinajun carca. Chaicunatami, cungurishpa imatapash tapunajun carca. Tullucunataca, pipash na tandachishpa pambanajungachu. Ashtahuangarin, mapa huanushnami, alpapi sirinajunga.
3Chai na ali gentecunamanda puchushcacunataca, caita chaitami cachasha. Paicunaca, maipi causanajushpapash, huañunata munaillami causanajunga” ninmi tucuita Mandaj Diosca.
4Cashnatapash villangui: “Mandaj Diosca, cashnami nin:
‘Maijambash urmashpaca, ¿nachu cutin jatarin?
Ñanda chingachij runapash, ¿nachu ñanda mascashpa cutin tigran?
5¿Imashpata Jerusalenbi causanajuj gentecunaca, Ñucataca, napacha cazushpa causanajun?
Umachishpalla causashpami, Ñucapajman tigrangapaca na munan.
6Ñucaca, tucuitami ali uyajuni.
Aliguta rimajca, pipash na tiyanllu.
Na alita rurashcamanda llaquirishpa tigrarij runaca, shujllapash na tiyanllu.
¿Imatata rurajuniyari? nishpa, paillata tapurijun runallapash, na tiyanllu.
Tucuicunami, paicunapaj munaitalla rurashpa, caballota cacharijpi, macanajuiman calpanshna rinajun.
7Cigüeña animalpash, jahua pachata ricushpaca, ima quillapi maiman rinata yachanmi.
Urpipash, grulla animalpash, golondrinapash, ima quillapi paicunapaj pushtuman tigranataca yachanmi.
Ashtahuangarin Ñuca agllashca gentecunaca, Mandaj Dios Ñuca aliguta ricushpa mandashcataca, na cazushpami causanajun’.
8Shina cashpapash, ¿imashpata cangunaca:
‘Ñucanchica, alipacha yachajushcami canchi.
Mandaj Dios mandashca shimitaca, ñucanchimi charinchi ninajunguichi?
Chai mandashcacunataca, quilcaj runapaj plumami, llullaman tigrachinajurca.
9Alipacha yachajushcacunapash pingai tucurcami.
Ninanda manllarishpami imatapash na rurai ushanajurca.
Mandaj Diospaj Shimitaca napacha uyangapa munanajurcachu.
Shina cashpaca ¿Imatata ali yachajushca canga?
10Chaimandami paicunapaj huarmicunatapash, chagracunatapash, cai llactata quichungapa shamujcunaman cugrini.
Paicunaca, uchillamanda callarishpa, jatungamanmi, charijyanatalla munashpa causanajun.
Profetamanda callarishpa, sacerdotecunacamanmi tucuicuna llullashpa yachachinajun’.
11Ñuca agllashca pueblota llaquichijpica cashnami ninajun:
‘Ima llaquipash na tiyanllu, tucui alimi causanajunchi’ ninajunmi.
Ashtahuangarin, ali causaica napacha tiyanllu.
12Chashna na alita rurashcamandaca ¿Imatallapash pingai tucunajungachu?
Paicunaca, napacha pingai tucunllu. Pingai tucunataca yachaitapash, na yachanllu.
Shinamandami, Ñuca llaquichijpi tucuicuna llaquita apanajunga” ninmi Mandaj Diosca.
13Mandaj Diosca, cashnatapashmi nin:
“Ñucaca tucuillatami tucuchigrini.
Uva chagrapica, shuj uvallapash na saquiringachu.
Higo yurapipash, shuj higollapash na saquiringachu.
Yuramanda fangacunapashmi chaquishpa urmanga.
Ñuca imatalla carashcacunataca, tucuillatami tucuchisha” ninmi.
14Israel gentecunaca cashnami nin:
Ñucanchica, ¿imapata caipi tiyanajunchiyari?
Cunanga tandanajushpa, muyundi pircacunahuan rurashca pueblocunaman yaicushpa huañungapa rishunchilla.
Ñucanchita Mandaj Taita Diosca, huañushpa tucurichunmi ñucanchitaca saquishca.
Mandaj Diosta fiñachishpa juchata rurashcamandami,
Paica, huañuchinalla jayaj yacuta ufiachun saquishca.
15Ali causaita shuyanajujpipash, ima alipash na tiyarcachu.
Nanaimanda jambirina punllatami shuyanajurcanchi, ashtahuangarin llaqui apanallami tiyan.
16Fiñajcunapaj caballocuna fucushpa shamunajunpash, Dan ayllupaj llactamandapachami uyarimurca.
Chai caballocunaca, tucuilla llacta cuyujtami huacashpa calpamunajurca.
Paicuna chayamushpaca, tucui cai alpapi imalla tiyajtami tucuchirca.
Pueblotapash, chaipi causajcunatapashmi tucuchirca.
17Mandaj Diosca: “Cangunata llaquichijuchunga, huañuchij culebracunatami cachamuni.
Chaicunataca, canguna imatapash na rurai ushajpimi, canishpa tucuchinga” ninmi.
Judá llactamanda, Jerusalén pueblomandami huacashca18Chashna llaquicuna tiyanata uyashpami, shungumandapacha llaquirini.
19Ñuca llactapi causajcuna llaquirishpa caparinajujpash, carumandapachami uyarimujun.
Paicunaca: “Mandaj Diosca, ¿nachu Sion pueblopi imatayari?
Jatun Mandajca, ¿nachu chaipi imatayari?” ninajunmi.
Diosca: “¿Imashpata rurashcalla dioscunahuan, yanga shuj dioscunahuan fiñachihuarca?” ninmi.
20Paicunaca: “Granocunata tandachina rupai punllacunaca, ñami yalirca.
Ashtahuangarin ñucanchitaca, pipash na quishpichishcachu” ninajunmi.
21Ñuca llactapi causajcuna ninanda llaquichi tucunajujpimi, ñucapash ninanda llaquirini.
Jatun llaquihuan cashpami, ninanda manllashpa causajuni.
22Galaad shuti llactapica, ¿ima jambillapash nachu tiyanga?
Chaipica ¿Nachu shujllapash jambij tiyanga?
¿Imamandata ñuca llactapi causajcunapajca, ima jambillapash na tiyan?
Who We AreWhat We EelieveWhat We Do
2025 by iamachristian.org,Inc All rights reserved.
