1Mandaj Diosca, Jacobpaj miraicunataca llaquingami. Israelcunataca, Paipajlla cachun cutinllata cayashpami, paicunapaj alpacunapillata causachun saquinga. Shuj llactacunamanda shamushcacunapash, Jacobpaj miraicunahuan tandanajushpami paipura tucunajunga.
2Shuj llactacunapi causanajuj Israel gentecunatami, cutin tigrachimunga. Chashna shamushca, jaricunata, huarmicunataca, Israel gentecunami, Mandaj Dios cushca alpacunapi, paicunapajta rurashpa causachun churanga. Israel gentecunaca, paicunata prezu charishcacunataca, paicunapashmi prezu japishpa llaquichinga.
3Canguna manllashpa, llaquichi tucushpa, chaipi tucuita rurashpa causashcamandaca, Mandaj Diosmi samachinga.
4Chai punllapimi, Babilonia llactata jatun mandajtaca, yarichij cai shimicunahuan cashna rimana canguichi:
“¡Cai llaquichij na ali runaca, llaquinayaitamari tucurishca! ¡Curitalla munashpa causajcunapaj puebloca, llaquinayaitamari tucurishca!
5Mandaj Diosmi, Paita na manllajcunapaj tauna caspitaca faquishca. Mandajcuna mandana varatapashmi faquishca.
6Chai mandajcunaca, ninanda fiñarishpami, gentecunata llaquichishpa charirca. Shuj llactacunapi causajcunatapash, ninanda fiñashpami mandashpa charirca. Paicunataca, llaquitapash na llaquishpami catiriyashpa llaquichijurca.
7Cunanga, tucui cai alpapi causajcunaca, ima manllaipash illaj, cushijushpa causanajushpami, Diostapash alicachishpa candanajun.
8Babilonia llactata mandaj chashna llaquita apajujpica, ciprés quirucunapash, Libanomanda cedro quirucunapash, ninanda cushijushpami cashna ninajurca: ‘Can huañushca punllamandapacha, ñucanchita llaquichingapaca pipash na shamushcachu’ ninajurcami.
9Seolpash canda ricushpaca, ninandami manllarirca. Can chayajpica huañushcacunapash jatarishpami, canhuan tuparingapa llujshinajurca. Jatun mandajcunapash, cati mandajcunapash, paicuna tiyarinamanda jatarichishpami, chasquinajurca.
10Paicunaca, tucuicunami, candaca caparishpa cashna ninajunga: ‘¿Canbashchu ñucanchishnallata huañushpa, caiman shamuna carcangui?
11Arpacunata taquichishpa, jariyashpa causashpapash, cunanga cambashmi Seolman shamushcangui. Caipica, jurucunami cambaj camashna, cambaj jatanashna canga’ ninajungami.
12¡Punllayanallapi ricurij Luzerolla, jahua pachamandami urmarcangui! Canga, llactacunata mandashpa llaquichij cashpapash, alpacamanmi shitai tucurcangui.
13Cambaj shungupica, cashnami yajurcangui: ‘Jahua pachamanmi vichai risha.
Chaipica, Taita Diospaj luzerocuna tiyanajuj pushtucunapimi, ñuca mandashpa tiyajunataca churasha.
Dioshuan tandanajuna urcupimi, ashtahuan jahuapi tiyarishpa mandajusha.
14Fuyuta yalishpa, ashtahuan jahuamanmi vichai risha.
Chaipi tiyarishpaca, jahua pachapi causajuj Diospaj ushaitashnami charisha’ yajurcanguimi.
15Ashtahuangarin canga, Seolmanmi, yana yana ucuman shitai tucurcangui.
16Canda chaipi, ricushpaca, cambaj ñaupajpi cumurishpa ali ricushpami, cashna ninajunga:
‘¿Paichu, llactacunata mandajcunataca ninanda manllachishpa causajuj carca?
17Paica, tucui llactacunatami jichushca pambatashna saquirca.
Tucui pueblocunatapash tucuchij cashpami, prezu tiyanajujcunatapash napacha cacharin carca’ ninajungami.
18Llactacunata jatun mandajcunataca, ninanda yarishpa alicachishpami pambanajun,
shina cashpapash caipillatami sirinajun.
19Ashtahuangarin candaca, na ricungapa munashca huahuatashnami shitamushca.
Espadahuan huañuchi tucushcacunapaj churajunata churajushcashnami cangui.
Huañushpa sarui tucushcashnami cangui.
20Canga, cambaj llactapi causajcunata huañuchishpa tucuchishcamandami,
candaca, caishuj jatun mandajcunatashnaca na pambanga.
Ashtahuangarin na alita rurajcunapaj miraicunataca, napacha yarinajungachu.
21Taitacuna, na alita rurashpa, juchapi urmashcamandaca, paicunapaj huahuacunami huañunga.
Ama cutin macanajungapa jatarishpa llactacunata japichun,
cai pachapi tiyaj pueblocunapi ama ashtahuan jundachunga, paicunataca, huañuchinapachami canga” ninami canguichi.
22Tucuita Mandaj Diosmi cashna nin: “Ñuca jatarishpami, Babilonia llactataca tucuchisha.
Mandaj Diosca, cai jatun mandajpaj miraicunatapash tucuillatami tucuchisha” ninmi Mandaj Diosca.
23“Chai pueblopica, erizo shuti animalcuna causachunmi saquisha.
Yacu cuchacunatami churasha.
Fichanahuan fichanshnami, tucuillata tucuchisha” ninmi tucuita Mandaj Diosca.
Asiria llactata tucuchina cashcamanda24Tucuita Mandaj Diosca, cashna nishpami juramenturca:
“Ñuca imata rurashpa pactachisha nishcataca pactachishapachami.
25Ñuca llactapi causanajuj, Asiria llacta gentecunataca, Ñuca lomacunapi sarushpami tucuillata tucuchisha.
Shina rurashpami, ñuca gentecuna yuguta aparinshna llaquichi tucunajujtaca, cacharichishpa samachisha” nircami.
26Tucui cai pachapi chashna ruranata yarijushpami, tucui llactacunataca,
Ñucapaj ninan ushaihuan llaquichishpa tucuchigrini.
27Tucuita Mandaj Diosmi chashnatapacha rurangapa yarijun.
Paita jarcaitaca, ¿pita ushangayari? Paipaj ninan ushaihuan chashna rurajujtaca, ¿pita jarcai ushangayari?
Filistea llactata llaquichina cashcamanda28Jatun mandaj Acaz huañushca huatapimi Isaiasca, Dios ima nishcata cashna villajurca:
29Filistea llactapi causajcuna, cangunata llaquichishpa charishca jatun mandaj huañushcamandaca, na cushijunachu canguichi.
Culebrapaj miraimandaca, shuj millai culebrami cutin llujshinga.
Chai culebramandacarin, alasyu culebrami llujshinga.
30Tucuita yali huajcha gentecunaca, paicunata michijtami charinga.
Huajchacunapash, imatapash na manllashpami samanajunga.
Ashtahuangarin cangunapaj miraicunataca, yarjaimanda huañuchunmi saquisha.
Huaquin puchushcacunatapash tucuchishami.
31Filistea llacta pueblocunapi causajcunapash, ninanda caparishpa huacaichi.
Cangunaca llaquichi tucunapachami canguichi.
Jahuaman tiyaj llactamandaca, yana cushnishnami shamunga.
Chashna shamushpaca, paicuna tandanajushcapica, shujtallapash causajtaca na saquinllachu.
32Chai llactacunamanda villaj shamujcunataca, ¿imatashi nina canga?
“Mandaj Diosmi, Sion lomataca shinlli tiyajuchun churarca.
Pai agllashcacuna llaquita apanajushpaca, caipimi pacajungapa shamunga” ninami canga.
Who We AreWhat We EelieveWhat We Do
2025 by iamachristian.org,Inc All rights reserved.
