HECHOS 19 - Quichua Imbabura 2016

Éfeso pueblopimi Pabloca villajushca

1Corinto pueblopi Apolos cajpimi, Pabloca urcucunatalla rishpa, Éfeso puebloman chayarca. Chaipi huaquin crijcunahuan tuparishpami,

2cashna nishpa tapurca:

“Canguna Jesusta crishpaca, jucha illaj Diospaj Espirituta ¿chasquishcachu canguichi?” nirca. Shina nijpica:

“Jucha illaj Diospaj Espíritu tiyajtaca, uyaitapash na uyashcanchica” ninajurca.

3Shina ninajujpimi:

“¿Imamandata cangunataca bautizarca?” nishpa tapurca.

Shina tapujpimi:

“Juan yachachijujta uyashpami, bautizai tucurcanchi” ninajurca.

4Shina nijpimi Pabloca, paicunata cashna nirca:

“Llaquirishpa Diospajman tigrarijpimi, Juanga bautizajurca. Shina bautizajushpaca: ‘Ñucapaj jipa shamujtami, crina canguichi’ nishpami, tucuicunaman yachachijurca. Chai Cristoca, Jesusmi” nircami.

5Shina villajta uyashpami paicunaca, Apunchi Jesuspaj shutipi bautizarinajurca.

6Chai jipaca, paicunapaj umapi Pablo maquita churajpimi, jucha illaj Diospaj Espirituca paicunapajman shamurca. Shina cashpami paicunaca, shuj shuj rimaicunapi, Dios imata yarichishcata villanajurca.

7Paicunaca, chunga ishcaipurami carca.

8Pabloca, sinagogaman yaicushpami quimsa quillatashna ninan ushaihuan villajurca. Taita Dios mandajuj llactamandaca, shinllitapacha rimarishpa, tucuicuna crij tucuchun, imatapash na manllashpami villajurca.

9Ashtahuangarin huaquingunaca, shinlli shungu tucushpami, na cringapa munanajurca. Shina cashpami paicunaca: “Jesusta crinaca napacha alichu nishpa, na alicachishpa, tucuicunapaj ñaupajpi rimanajurca”. Shinamandami, Pabloca, Tiranno shuti runa yachachij huasiman tucui crijcunata pushashpa, punllandi yachachijurca.

10Pabloca, ishcai huatatami Asia llactapi causajurca. Chaipi Apunchi Jesusmanda villajujpimi, judiocunapash, griegocunapash tucuicuna uyanajurca.

11Taita Dios ushaita carajpimi Pabloca, pipash na rurai ushashcacunata rurashpa ricuchijurca.

12Shinamandami, Pablopaj ficharina finducunata, paipaj jahualla churajunacunata, huañujuj gentecunapaj jahuapi churangapa apanajurca. Chaicunata churajpimi, huañujuj gentecunamanda ungüicunapash anchurijpi, ayacunapash llujshijpi tucuicuna ali tucunajurca.

13Shinallata, huaquin judiocunapash, ayacunata rimashpa llujchijlla cashpami: “Ñucanchipash Apunchi Jesuspaj shutipi rimashpa llujchishunllami” yanajurca. Shina cashpami, ayacunataca: “Pablo villajuj Jesuspaj shutipi llujshi ninchimi” ninajurca.

14Sacerdotecuna mandaj Esceva shuti judío runapaj canchis churicunami, chashna ruranajurca.

15Ashtahuangarin, chai na ali ayaca: “Jesustaca rijsinimi. Pablo maijan cajtapash yachanimi. Ashtahuangarin cangunaca, ¿pita canguichiyari?” nircami.

16Shina nishpami, chai aya jundashca runa jatarishpaca, paicunatara japishpa chugrichingacaman ninanda macarca. Shina macajpimi, chai huasimandaca lluchulla pacajushpa calpanajurca.

17Chashna tucushcataca, Éfeso pueblopi causanajuj judiocunapash, griegocunapash tucuicunami yacharca. Chaimandami tucuicuna manllarishpa, Apunchi Jesustaca ninanda alicachinajurca.

18Shinallata, tauca crijcunami, paicuna naraj crij cashpa ima na alita rurashcatapash, villangapa shamunajurca.

19Shinallata, yachaj yumbucuna tucungapa, yachajuna quilcacunata apamushpami tucui gentecunapaj ñaupajpi rupachinajurca. Chai tucui quilcacunata yupashpa ricujpica, picha chunga huaranga culquipa randinashnami carca.

20Chashnami, Diospaj shimica, tucuita mishashpa, ninan ushaihuan mirajurca.

21Chai jipami Pabloca, Macedonia, Acaya llactacunapi purijushca jipaca, Jerusalenman ringapa yarijurca. Chaipi cashca jipaca: “Roma pueblomambash rinapachami cani” yajurcami.

22Chashna cashpami, paita yanapajpuramanda Timoteota, Erastota agllashpa, ishcandita Macedoniaman ñaupachishpa cacharca. Pabloca, tauca punllacunatami, Asia llactapillata saquirirca.

Éfeso pueblopimi caparinajushca

23Chai punllacunapimi Éfeso pueblopica, Jesusmanda villajujpi ninanda fiñashpa jatarinajurca.

24Chaitaca, Demetrio shuti runami callarichirca. Paica, Diana shuti rurashcalla diospaj uchilla huasicunata, culquipi rurashpa causajmi carca. Chashna ruranata yachajcunaca ninandami culquinajun carca.

25Shina cashpami, chashnata rurajpuracunata tandachishpa cashna nijurca: “Tucui jaricuna, cangunallata yachanguichimi”. Ñucanchica cashnata rurashpami, ninanda charijyashcanchi.

26Ashtahuangarin: “Maquihuan rurashcalla dioscunaca, napacha dioscunachu” nishpami, chai Pabloca ashtacacunata pandachishpa purijun. Chaitaca, cangunallata ñami ricunguichi, uyanguichi. Paica, na cai Éfeso pueblopilla chashna nijunllu. Ashtahuangarin, Asia llactapipash, ashamandallami na tucuicunaman chashna yachachishpa crichishca.

27Cunanga, na ñucanchipaj jatunalla tucurigrinllu, ashtahuangarin, tucuicunapajmi ninan llaqui tiyagrin. Ñucanchipaj jatun Diana huarmi diostaca, Asia llactapi causajcunapash, tucui cai pachapi causajcunapashmi ninanda alicachin. Shinallata: “Diana diosta yarina huasitapash tucuchishpami yangapi churagrin” nijurcami.

28Shina nijta uyashpaca, tucuicuna ninanda fiñarishpami:

“¡Ñucanchi cai Éfeso pueblopi causajcunapaj Diana diosca jatunmari!” nishpa caparinajurca.

29Shinamandami tucuicuna ninanda fiñarishpaca, Pablota cumbashpa purij, Macedonia llactamanda Gayo runatapash, Aristarco runatapash tucuicuna tandanajushpa japirca. Paicunataca, tandanajushpa ricuna jatun huasimanmi aparca.

30Pabloca, chai gentecunapajman ringapa munajujpipash, crijcunaca na saquircachu.

31Asia llactata mandajcunapash, huaquingunaca, Pablopaj cumbacuna cashpami: “Chai ucumanga napacha rinachu capangui” nishpa jarcachun cacharca.

32Chaipi tandanajushca gentecunaca, maitapash shujta shujtami rimashpa caparinajurca. Ashtahuangarin shujcunaca, imapa tandanajushca cajtapash na yachashpami musparinajurca.

33Chai gentecunapaj chaupimandami, judiocunaca tucuicunaman villachun, Alejandrota tangashpa cacharca. Paica, upalla cachun maquihuan ricuchishpami, judiocunapaj randi rimangapa munarca.

34Ashtahuangarin Alejandrotaca, judío runa cajta rijsishpami, tucuicuna shujllashnalla tucushpa, ishcai pachacamajshna:

“¡Cai Éfeso pueblopi causajcunapaj Diana diosca jatunmari!” nishpa caparinajurca.

35Chai pueblopi quilcaj runaca, tucuicunata upallayachishpami, cashna nijurca: “Éfeso pueblopi causajcuna. Jatun Diana diospaj huasitapash, Júpiter luzeromanda urmamushca, paiman rijchaj rumitapash, cai Éfeso pueblopi causajcunami ricurianchi. ¿Chaitaca, maijan runata na yachanyari?

36Chaitaca, na shinachu nitaca pipash na ushangachu. Chaimandami, imatapash na nishpa, upalla ricushpa, narapash yachashpaca, na ñapash imatapash ruranalla canguichi.

37Canguna apamushca cai runacunaca, Diana diospaj huasimandapash, na imatapash shuhuashcachu, shinallata, na ali shimicunatapash na rimashcachu.

38Demetrio runatapash, paihuan tandanajujcunatapash pipash fiñachijpica, mandajpuralla tandanajushcaman villagrinatami charin. Chai mandajcunapaj ñaupajpimi, imatapash chimbapurana canguichi.

39Canguna ashtahuan imatapash ninata charishpaca, tucuicuna tandanajushcapaj ñaupajpimi ima cajta yachashun.

40Cunan na cazushpa, chashna tandanajushcata pipash villajpica, llaquichi tucugrinchimi. Imamanda chashna tandanajushcatapash na villai usharingachu” nijurcami.

41Shina nishpami, chai tandanajushca gentecunataca “cayacaman” nishpa cacharca.