JOB 42 - Quichua Imbabura 2016

Job runa, pai pandashcata villashcamanda

1Job runaca, cashna nishpami Mandaj Diosman tigrachirca:

2“Can tucui ushaita charijtaca yachapanimi.

Cambaj ñaupajpica, ima yuyaipash na pacalla cai ushanllu.

3¿Ali yuyaitaca, pita napash yachashpata pandachingapa munan?

Shinamandami ñucaca, napash yachashpata rimarijurcanilla.

Ñucapaca, na yachashca yapa manllarina yuyaicunami cashca.

4Ñuca rimashcata uyapai

Ñuca tapujpica, Canmi yachachihuangui.

5Ñucaca, shujcuna villashcatallami Canmandaca uyarcani.

Ashtahuangarin cunanga, Candaca, ñuca ñavihuambachami ricujuni.

6Shinamandami, ñucamandallata millanayachirini.

Tucuimanda llaquirishpami, ñutu alpapi, uchufapi tiyarini” nijurcami.

7Mandaj Dios cai shimicunata Job runata rimashca jipaca, Temán llactamanda Elifaz shuti runatami, Mandaj Diosca cashna nirca: “Canhuambash, cambaj caishuj cumbacunahuambash, Ñucaca ninandami fiñarircani. Cangunaca, Ñucapajta ruraj Job runashnaca, ima alicunatapash Ñucamandaca na rimashpami tiyanajunguichi.

8Chashna rurashcamanda cunanga, canchis jari shicuta, canchis jari llamata apashpa, Ñucapajta ruraj Job runapajman richi. Chaipimi cangunaca, Ñucaman cushpa tucuillata rupachina canguichi. Ñucapajta ruraj Job runami, cangunamandaca mañahuanga. Pai mañajujta uyashpami, cangunata ninanda llaquichinataca saquisha. Cangunaca, Ñucapajta ruraj Job runashnaca, ima alicunatapash Ñucamandaca, na parlashpami tiyanajunguichi” nijurcami.

9Shina nijpimi, Temán llactamanda Elifaz, Súah llactamanda Bildad, Naamat llactamanda Zofar shuti runacunaca, Mandaj Dios mandashcashnallata ruranajurca. Chaimandami Mandaj Diosca, Job mañashcataca chasquirca.

Diosca, Job runataca cutinmi bendiciashca

10Job runa, paipaj quimsa cumbacunamanda Diosta mañashca jipami Mandaj Diosca, chai llaquicunataca anchuchirca. Job runa imatalla punda charishcamandaca, chaupitapash yalishpa mirachishpami tucuita cararca.

11Shinamandami, tucuilla paipaj huauquicunapash, paipaj tucuilla panicunapash, tucui punda rijsishcacunapash, paipaj huasiman shamushpa, paihuan micunajurca. Shinallata Mandaj Dios, Job runaman llaquicunata cachashcamandaca, paicunapash llaquirishcata ricuchishpami, ali shimicunata parlashpa cushichinajurca. Paicunaca, tucuicunami culquitapash, curi surtijatapash, shuj shuj caranajurca.

12Mandaj Diosca, Job runataca, punda bendiciashcatapash yalimi bendiciarca. Shinamandami paica, chunga chuscu huaranga llamacunata, sucta huaranga camellocunata, huaranga yunta huagracunata, huaranga burrucunata charirca.

13Canchis churicunatapash, quimsa ushicunatapashmi charirca.

14Punda ushitaca, Jemima shutitami shutichirca. Jipa ushitaca, Cesia shutitami shutichirca. Ishcaipaj cati ushitaca, Keren-hapuc shutitami shutichirca.

15Tucui chai llactapica, Job runapaj ushicunashna juyaillacunaca, na tiyarcachu. Job runaca, paicunapaj turicunaman carashcashnami, imatalla japina cashcataca cararca.

16Chai jipaca Job runaca, patsaj chuscu chunga huatatami causajurca. Paica, paipaj huahuacunapaj huahuacunatapash, chai huahuacunapaj huahuacunatapashmi ricurca. Paica, chuscu miraicunata ricungacamanmi causajurca.

17Paica, unaitapacha causashpa, ña rucugupacha cashpami huañurca.